2017-06-25 11:03:04 clouds 27o High | Kigali Rwanda

Dukurikire:
 
 

MICT yijeje guta muri yombi abakoze Jenoside bakihishe

Yanditswe na IMVAHO NSHYA

Kuya 2016-04-21 05:08:39

 
Share on:
 
Yasuwe:6
 
Yavuzweho:200
 
10
 
10

Umushinjacyaha Mukuru Serge Brammertz w’Urukiko MICT rwasimbuye ICTR yijeje u Rwanda ubufatanye mu guta muri yombi no gutanga ubutabera ku bakoze Jenoside mu Rwanda bakihishahisha mu mahanga.

Ibyo yabitangarije i Kigali ku wa Gatatu 20 Mata 2016 ubwo yasuraga u Rwanda ku nshuro ya mbere ari nabwo agiye gutangira imirimo yo kuyobora uru rukiko rushya rwashyizweho n’Umuryango w’Abibumbye, (UNMICT: Residual Mechanism for the International Criminal Tribunal for Rwanda).

Mu kiganiro na Minisitiri w’Ubutabera akaba n’Intumwa Nkuru ya Leta Johnston Busingye, Umushinjacyaha Mukuru Serge Brammertz yavuze ko yumva neza akababaro abarokotse Jenoside bafite kuba hakiri bamwe mu bashakishwa ngo bahanirwe ibyo bakoze ariko amahanga akaba akibakingiye ikibaba, abizeza ingamba nshya.

JPEG - 104.8 kb
Umushinjacyaha Mukuru wa MICT ari rwo rukiko rwasimbuye ICTR, Brammetz Serge na Minisitiri w’Ubutabera Johnston Busingye ku cyicaro cya MINIJUST (Foto James R)

Yagize ati “Tuzakomeza ubufatanye bwiza n’inzego zose bireba, kandi nagira ngo mvuge nti ni imirimo mishya muri uru rwego rwa MICT kandi mu byo nakoraga mu rukiko mpuzamahanga byari ibifite aho bihuriye n’ibyo ku Rwanda, ubu rero ndumva uko bihagaze, agaciro kabyo, icyo bisobanuye ku barokotse Jenoside n’uko bameze uyu munsi n’icyo bibamariye igihe abakoze Jenoside bagejejwe mu butabera.”

Minisitiri Busingye yashimiye urukiko Mpuzamahanga ku bufatanye rwagize mu guta muri yombi Uwinkindi Jean, Munyagishari Bernard na Ntaganda Ladislas uherutse gutabwa muri yombi akaba ari kuburanishirizwa mu Rwanda.

Yagarutse ku mazina ya bamwe mu bagishakishwa na Leta y’u Rwanda ku byaha basize bakoze muri Jenoside n’uruhare rwabo barimo nk’umunyemari Felicien Kabuga.

Yagaye kandi igihugu nk’u Bufaransa bikigendesha biguru ntege imanza z’abakoze ibyaha muri Jenoside bwahawe nka Bucyibaruta Laurent na Munyeshyaka Wincelas, amusaba ubuvugizi.

Urukiko Brammertz agiye kuyobora ruje rusimbura urumaze igihe rurangije manda yarwo ICTR rwaburanishaga abakekwagaho ibyaha bya Jenoside yakorewe Abatutsi mu 1994 n’ibindi byaha byibasiye inyoko muntu.

MICT ifite inshingano yo gushakisha abakoze Jenoside bakiri hanze no gukurikirana imanza z’abanyabyaha zasizwe na ICTR.

Minisitiri Busingye yijeje umushinjacyaha mukuru Brammertz ko u Rwanda rwiteguye gufatanya n’Umuryango w’Abibumbye wemeye gushyiraho urwo rukiko ku gushaka aho ari ho hose hashoboka hazashyingurwa inyandiko z’imanza zaciwe n’Urukiko ICTR.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE