2017-08-20 07:43:19 clouds 27o High | Kigali Rwanda

Dukurikire:
 
 

Microsoft irishimira uburyo u Rwanda rukoresha ikoranabuhanga mu burezi

Yanditswe na IMVAHO NSHYA

Kuya 2017-03-25 12:51:19

 
Share on:
 
Yasuwe:370
 
Yavuzweho:200
 
10
 
10

Sosiyete Microsoft Corp. y’umuherwe Bill Gates, yatangaje ko yishimira uburyo abanyeshuri n’abarimu bo mu Rwanda bagejejweho ikoranabuhanga mu myigire n’imyigishirize yabo.

Umuyobozi wa Microsoft muri Afurika y’Uburasirazuba n’iy’Amajyepfo, Sebuh Haileleul, yavuze ko anenejejwe n’ukuntu Minisiteri y’Uburezi ifatanyije na Microsoft, binyuze muri gahunda ya “Smart Classroom” yashoboye gukoresha ikoranabuhanga mu myigire ku rugero ruri hejuru mu myaka icumi ishize.

Ati “Muri iyi gahunda turi gufasha Minisiteri y’Uburezi, gukoresha ikoranabuhanga rigezweho duhindura imyigire n’imyigishirize kugira ngo tuzamure ireme ry’uburezi no kubaka abanyeshuri bafite ubumenyi buberanye n’ikinyejana cya 21.”

JPEG - 39.7 kb
Sebuh Haileleul, umuyobozi wa Microsoft muri Afurika y’Uburasirazuba n’iy’Amajyepfo

Ni mu gihe muri mudasobwa za Positivo BGH 130 000 zimaze gukorerwa mu Rwanda, 80 000 zahawe Ikigo cy’Igihugu cy’Uburezi, REB, kugira ngo zisaranganwe mu bigo by’amashuri.

Binyuze muri gahunda y’Abafatanyabikorwa mu Myigire, ku bufatanye na Microsoft, MINEDUC yashoboye gushyira porogaramu ya Windows 10 n’iya MS Office (Professional Plus) muri izo mudasobwa 80 000 .

Haileleul avuga ko byose bigamije kongerera ubumenyi abanyeshuri bo mu Rwanda binyuze mu ikoranabuhanga rigezweho.

Ati “Icyo tugamije ni ukuzana udushya no kongera ubumenyi bujyanye n’isoko ry’umurimo mu banyeshuri n’abarimu. Tuzabigeraho dufasha abarezi n’abayobozi b’ibigo guhanahana amakuru, gufashanya no gusangira ubumenyi.”

Asobanura ko Windows 10 izafasha abanyeshuri bo mu Rwanda, kuko irimo za apulikasiyo zitandukanye zizafasha abanyeshuri kwiyungura ubumenyi no gusura imbuga za internet zitandukanye.

Microsoft kandi yazaniye abahugura abarimu bo mu Rwanda ikoranabuhanga rya Microsoft Innovative Educator (MIE), rizatuma abarimu basobanukirwa ibyo kwigisha hakoresheje ibikoresho bigezweho muri iki gihe.

Kuri ubu ku Isi abarimu basaga 60 000 bamaze guhugurwa naho abanyeshuri, miliyoni 3.2 bamaze kugezwaho porogaramu za Word, Powerpoint, One Note n’ububiko bufite ububasha bwa Terabyte kuri internet.

Umuyobozi wa Microsoft muri Afurika y’Uburasirazuba n’iy’Amajyepfo, avuga ko bateganya kuzana mu Rwanda uburyo bworoshye bwo kubona internet mu bigo by’amashuri no gukoresha ikoranabuhanga ry’iki kigo mu kwiga imibare ikoranabuhanga, siyansi n’ubwenjeniyeri (STEM).

Ati “Iterambere tuzageraho binyuze mu mpinduka z’ikoranabuhanga ntirigira urugero, kuri ubu twamaze kubona ko gahunda zigezweho nk’iy’Ubwenge bw’Ubukorano (AI) zamaze guhindura byinshi mu burezi. Ibigo by’amashuri ubu bisigaye bifite ubushobozi bwo gukurikirana umunyeshuri hifashishijwe ikoranabuhanga, bikamenya niba ari kurushaho kuba umuhanga cyangwa niba yenda kuva mu ishuri.”

Minisiteri y’Uburezi yizeye ko gufatanya na Microsoft bizatanga impinduka zigaragara mu kuzamura ireme ry’uburezi mu Rwanda, n’umubare w’abanyeshuri batsinda ukiyongera.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE