2017-07-21 15:15:02 clouds 27o High | Kigali Rwanda

Dukurikire:
 
 

Kwita Izina 13: Abana b’ingagi 14 bazitwa amazina

Yanditswe na IMVAHO NSHYA

Kuya 2017-06-21 14:24:11

 
Share on:
 
Yasuwe:61
 
Yavuzweho:200
 
10
 
10

Ikigo cy’Igihugu cy’Iterambere (RDB), cyatangaje ko umuhango wo Kwita Izina abana b’ingagi ku nshuro ya 13, uteganyijwe tariki ya Mbere Nzeri 2017, uzaba ufite umwihariko kuko hazitwa abana b’ingagi 14 bazitwa amazina bari kumwe n’izindi ngagi z’ingore enye zikuze.

Umuyobozi ushinzwe ubukerarugendo no kubungabunga ibinyabuzima muri pariki z’igihugu muri Belise Kaliza, mu kiganiro n’itangazamakuru kuri uyu wa 21 Kamena 2017 yavuze ko hazitwa amazina n’undi muryango mushya waje muri pariki y’Ibirunga ugizwe n’ingagi zirindwi.

Ushinzwe kubungabunga pariki Mutangana Eugene, yasobanuye ko impamvu hatazitwa abana b’ingagi gusa ari uko haba hari n’izindi ngagi zitamenyerejwe gusurwa kandi ziba mu ishyamba, bityo iyo zibonetse nazo zitwa amazina kugira ngo zimenyekane.

Ati “Hari n’izindi tutigeze tumenyereza ariko ziba mu ishyamba, birashoboka ko buri gihe hari izishobora kwiyunga kuri za zindi dukurikirana buri munsi.

“Hari za zindi ziba zitavutse ariko zaje ari nshyashya, izo nazo tugomba kuzita amazina kugira ngo bidufashe ndetse n’imiryango yindi igenda ivuka, cyane ko uko zigenda ziyongera ni ko zigenda zicikamo ibice bitewe nuko zabaye nyinshi mu miryango cyangwa se hari izindi mpamvu zirimo ko zarwanye.”

Ibarura riheruka ry’imyaka itanu (2010-2015) ryerekanye ko muri Pariki y’Ibirunga ihuriweho n’u Rwanda, Kongo (RDC) na Uganda irimo ingagi 880, muri zo izigera kuri kimwe cya kabiri zikaba zibera mu Rwanda.

Undi mwihariko mu kwitegura umuhango wo Kwita Izina ku nshuro ya 13, ni uko Abanyarwanda bafite isabukuru y’amavuko buri tariki ya 4 Nyakanga bashyiriweho ubwasisi ko bafitiwe tombola yo gusura ingagi ku buntu muri gahunda ya Temberurwanda izaba mu Gushyingo 2017.

Abana b’ingagi 239 bamaze guhabwa amazina kuva umuhango wo Kwita Izina watangira mu 2005.

MUTUNGIREHE SAMUEL

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE