2017-10-18 07:01:40 clouds 27o High | Kigali Rwanda

Dukurikire:
 
 

Kwegereza serivisi z’Irembo abatuye ahatari amashanyarazi biracyarimo imbogamizi

Yanditswe na IMVAHO NSHYA

Kuya 2017-05-05 07:24:00

 
Share on:
 
Yasuwe:53
 
Yavuzweho:200
 
10
 
10

Bamwe mu baturage bo mu duce twitaruye imijyi, bavuga ko kutagira bimwe mu bikorwa remezo bituma batabona serivisi z’irembo cyangwa zikabahenda cyane iyo bagiye kuzishakishiriza ahandi.

Aba baturage bavuga ko bamaze gusobanukirwa na serivisi zitangwa binyujijwe mu ikoranabuhanga cyane cyane irembo, ariko ngo abenshi ntibabona izo serivisi uko bikwiye.

Sibomana Augustin, ni umuturage wo mu murenge wa Bwira mu karere ka Ngororero. Aho atuye nta mashanyarazi ahari, nta murongo wa interineti uhaboneka ndetse nta na banki ikoresha ikoranabuhanga yabafasha kwishyura amafaranga asabwa ngo bahabwe serivisi bashaka.

Agira ati «Nk’ubu kuva aha kugera i Gatumba aho nshobora gufotoza urupapuro cyangwa kubona banki, nkoresha amasaha atatu n’amaguru cyangwa bikantwara amafaranga ibihumbi bitandatu ngatega moto nshaka icyangombwa ubundi cyishyurwa amafaranga magana atanu».

JPEG - 59 kb
Abatuye mu cyaro bagorwa cyane no kubona serivisi z’Irembo

Ubusanzwe serivisi z’irembo zitangirwa ku mirenge ariko abasaba serivisi bagasabwa kuva mu tugari twabo bamaze gutanga amakuru ku byo basaba bikoherezwa ku murenge hifashishjwe ikoranabuhanga.

Mu kugerageza kunoza imitangirwe ya serivisi z’irembo, muri Werurwe 2017, akarere ka Ngororero katanze telefoni zigezweho 159 ku banyamabanga nshingwabikorwa b’imirenge n’utugari ndetse n’abashinzwe iterambere mu tugari kugira ngo bafashe abaturage.

Bamwe muri aba bazihawe nabo bakaba bavuga ko zishobora kutazatanga umusaruro kubera ibura ry’ibikorwa remezo.

Umuyobozi wungirije ushinzwe imari n’iterambere ry’ubukungu muri Ngororero, Kanyange Christine, avuga ko ibikorwa remezo bikiri imbogamizi koko, ariko ko bafatanyije n’abafatanyabikorwa b’akarere barimo gukemura bimwe ibindi na byo bikazakemuka buhoro buhoro.

Yagize ati:« Ubu turimo kuvugana n’ubuyobozi bw’ikigo gitanga serivisi z’amashanyarazi ndetse n’abacuruza itumanaho ngo twihutishe gukwirakwiza amashanyarazi na interineti nubwo tutazi igihe bizaba byarageze hose bitewe n’ubushobozi ndetse n’imiterere y’akarere kacu».

Serivisi z’irembo zashyizweho nk’igisubizo mu kugabanya imirongo n’imvune ku baturage baka serivisi zimwe na zimwe.

Mu karere ka Ngororero, 18% by’ingo zirenga gato ibihumbi mirongo inani, ni ukuvuga byibura ingo ibihumbi cumi na bine na magana ane ni zo zifite umuriro w’amashanyarazi, izo zikaba ziganje mu mijyi no ku muhanda wa kaburimbo ku gipimo cya 70%, mu gihe amashanyarazi ari igikorwa remezo cy’ibanze mu kubona byinshi mu bikoresho bikenewe ngo serivisi z’irembo zigende neza.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE