2017-08-22 09:34:31 clouds 27o High | Kigali Rwanda

Dukurikire:
 
 

Kubika amakuru ni ubucuruzi buruta ubwo kubika amafaranga – Minisitiri Nsengimana

Yanditswe na IMVAHO NSHYA

Kuya 2017-05-08 14:06:35

 
Share on:
 
Yasuwe:94
 
Yavuzweho:200
 
10
 
10

Minisitiri w’Urubyiruko n’Ikoranabuhanga (MYICT) Jean Philbert Nsengimana arasaba Abanyarwanda kwitabira ishoramari riri mu ikoranabuhanga ryo kubika amakuru kuko biri mu bucuruzi mu minsi iri imbere bugiye gusumba ibigo by’imari bibika amafaranga y’abantu.

Yabitangaje ejo tariki ya 8 Gicurasi 2017 ubwo yatangizaga ku mugaragaro inama nyunguranabitekerezo igamije kureba uburyo iterambere rishingiye ku ikoranabuhanga ryakihutishwa, abatuye isi bose bakarigezwaho bityo bakaribyaza umusaruro.

Nsengimana yavuze ko abantu batarumva neza ibanga riri mu ishoramari ryo kubika amakuru, bagahera mu kuyabika hanze no mu bundi bucuruzi kandi hari ishoramari rifite abakiliya bo ku isi hose biyongera umunsi ku wundi uko umuntu akomeje kubika amakuru menshi.

Ati “Nitwandika turi benshi abafite indirimbo, filime, amasomo kugira ngo yigwe n’isi yose, ibitekerezo, inzenya, imikino byose bigashyirwa hariya, kandi bikabikwa mu Rwanda ibyo ni byo bizatuma igiciro cyo kubika amakuru kimanuka noneho na twe tugatangira kubikira abandi kuko kubika amakuru uyu munsi ni ubucuruzi bugiye kuruta ubwo kubika amafaranga y’abantu.

Ibyo biradusaba kugira ngo abantu bashishikarire kwandika, ntibakajye bajya kuri interineti gusoma ibiriyo no kureba ibyo abandi banditse gusa, bajye bamenya ngo ibintu byahageze kuko byahashyizwe n’umuntu, wowe kuki utashyirayo ibyawe.”

Uhagarariye Umuryango w’Abibumbye wita ku burezi, ubumenyi n’umuco (UNESCO), Indrajit Banerjee yavuze ko kongera imbaraga mu ikoranabuhanga bifasha kwihutisha uburezi bwiza bushingiye ku kuvumbura udushya mu ikoranabuhanga.

Muri iyo nama y‘iminsi ibiri, hararebwa uburyo bw’imikoranire mu mbaraga zose kugira ngo abatuye isi bagera kuri miliyari enye badakoresha ikoranabuhanga batangire kurikoresha.

Minisitiri Nsengimana yakomeje agira ati “Icyo naganiriye abo bantu, ni ukubabwira ngo reka turebe miliyari ya nyuma kugeza igihe za miliyari enye z’abatagira murandasi zizaba zikoresha iyo murandasi. Ni ho tuzaba tumenye ngo buri munyafurika wese ukeneye ikoranabuhanga na we arimo, ntihagire n’umwe usigazwa inyuma.”

Ibibazo byagaragajwe bikibangamiye isakazwa ry’ikoranabuhanga mu giturage no mu bindi bice by’imijyi bigomba gushyirwamo imbaraga; birimo kubura ingufu z’umuriro, ibikoresho bibagezaho iryo koranabuhanga n’ubumenyi bwo kubibyaza umusaruro.

Mu bindi iyi nama izibandaho harimo gushaka uburyo bwakoreshwa ngo amakuru abikwa mu ikoranabuhanga abikwe mu ndimi abantu bose bibonamo mu duce baherereyemo bidasabye ko baba bazi cyane indimi ziganje mu makuru y’ikoranabuhanga.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE