2017-11-23 07:27:17 clouds 27o High | Kigali Rwanda

Dukurikire:
 
 

Kiliziya Gatolika yasabiye imbabazi abayoboke bayo bakoze Jenoside

Yanditswe na IMVAHO NSHYA

Kuya 2016-11-20 09:30:00

 
Share on:
 
Yasuwe:13
 
Yavuzweho:200
 
10
 
10

Nyuma y’imyaka 22 hakozwe Jenoside yakorewe Abatutsi, Kiliziya Gatolika yasabye imbabazi ku bw’abayoboke bayo bagize uruhare bikaba bimaze iki gihe cyose ari umutwaro utoroshye kuko yashinjwaga kwinangira gusaba imbabazi mu gihe hari Kiliziya zahindutse inzibutso’

Mu itangazo ryasomwe kuri uyu wa 20 Ugushyingo 2016, mu butumwa busoza umwaka wa Yubile y’Impuhwe z’Imana Kiliziya Gatolika yasabye imbabazi ku bw’abayoboke bayo bagize uruhare muri Jenoside yakorewe Abatutsi mu 1994 nubwo Kiliziya ubwayo atari yo yabatumye ngo bayikore.

Iri tangazo ryashyizweho umukono n’Abepisikopi icyenda ba diyosezi zindandukanye mu gihugu, riragira riti " Nubwo Kiliziya ntawe yatumye kugira nabi, twebwe abepiskopi gatolika, ku buryo bw’umwihariko, twongeye gusaba imbabazi kubera bamwe mu bana bayo, abasaseridoti, abihayimana n’abakiristu bagize uruhare muri Jenoside yakorewe Abatutsi. Koko rero bakoze icyaha gikomeye cy’inabi ya muntu."

JPEG - 338.1 kb
Zimwe muri Kiliziya ziciwemo Abatutsi benshi zahindutse inzibutso za Jenoside

Kiliziya iributsa Abakirisitu Gatolika kuba kuba ipfundo rikomeye ry’ubuzima, bakarangwa n’ubumwe, ubwumvikane n’urukundo bamurikiwe na Kristu.

Kiliziya Gatolika kandi yasabye urubyiruko rwayobotse nk’amizero ya Kiliziya n’u Rwanda gukunda Imana n’igihugu cyarubyaye, ruzira amacakubiri, rugendera kure urwango, ivangura ndetse n’ingeso mbi zose zangiza ubuzima.

Itangazo riti “Nirwirinde uwo ari we wese warushuka arujyana mu nzira zitajyanye n’ubukristu. Nirukurikire inzira igororotse rumurikiwe n’indangagaciro Kiliziya yigisha.”

Kuri uyu wa 20 Ugushyingo Kiliziya Gatolika yarangije umwaka wa mbere wa Yubile zizamara imyaka itatu. Ku itariki ya 7 Ukwakira 2017 hazasozwa Yubile y’imyaka 100 abasaserdoti ba mbere b’Abanyarwanda, Padiri Balitazari Gafuku na Padiri Donati Reberaho, bahawe ubupadiri.

Mu mwaka wa 2018 bazakomeza gutekereza ku bumwe n’ubwiyunge by’Abanyarwanda kugira ngo u Rwanda rube igihugu kirangwa n‘ituze, amahoro, ubumwe n’ubwumvikane byo bimenyetso by’ubumwe bwacu n’Imana.

Muri Diyosezi ya Kabgayi, Mgr Smaragde Mbonyintege, yashimangiye ko igihe cyari kigeze ngo Kiliziya Gatolika isabe imbabazi. Iri tangazo ryasomwe misa ihumuje muri kiliziya zose zo mu Rwanda.

Abapapa bamaze bamaze kugaragaza uruhande baherereyemo

Itangazo rigaragaza ko muri iyi myaka ishize uko ari 22, abapapa bagiyebagaragaza aho baherereye kuko basabye kudatinya kureba ukuri kw’amateka n’ingorane zayabayemo.

Ku ya 17 Gicurasi 1994, Papa Yohani Pawulo wa II yabaye uwa mbere wavugiye ku mugaragaro ku kibuga cya Mutagatifu Petero i Roma ko ubwicanyi bwaberaga mu Rwanda yari Jenoside irimo gukorwa, anavuga ko abayigiramo uruhare bazabibazwa n’Imana n’amateka.

Papa Benedigito wa XVI wamusimbuye, mu ruzinduko abepiskopi twagize ku ya 21 Gicurasi 2005, yasabye abepisikopi kudatinya guhangara amateka y’igihugu n’ingorane zose zayaturukaho.

Mu ruzinduko Abepisikopi bagiriye i Roma ku wa 3 Mata 2014, Papa Fransisko yabasabye gufatanya na Leta, kugira ngo bafashe Abanyarwanda kudaheranwa na Jenoside yakorewe Abatutsi n’ingaruka zayo.

Na none kandi ngo mu mwaka wa 2000 ubwo hizihizwaga Yubile y’imyaka 100 Kiliziya Gatolika imaze ishinze imizi mu Rwanda, yongeye gusabira imbabazi abakirisitu gatolika bijanditse muri Jenoside.

Uyu mwaka Yubile y’impuhwe z’Imana watanze uburyo bwiza bwo kongera gushyira mu bikorwa icyifuzo cyo kureba amateka y’Igihugu Kiliziya ikayarebana amaso y’ukwemera.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE