2017-06-22 11:06:50 clouds 27o High | Kigali Rwanda

Dukurikire:
 
 

Kigali: Bagiye guhamiriza rubanda uko ubuhinzi bwabinjije mu bashoramari

Yanditswe na Claude Ntawitonda

Kuya 2016-11-30 13:37:00

 
Share on:
 
Yasuwe:11
 
Yavuzweho:200
 
10
 
10

Abahinzi nyarwanda bamaze gusobanukirwa n’ubuhinzi bujyanye n’icyerekezo biyemeje guhamiriza abandi uko ubuhinzi bwabinjije mu bashoramari, kuri ubu bakaba bakirigita ifaranga mu gihe abagikora ubuhinzi gakondo bavuga ko babuze umusaruro.

Aba bahinzi n’aborozi bagiye guhurira mu imurikabikorwa i Kigali rigamije kugaragariza Abanyarwanda amahirwe y’ubuhinzi atabyazwa umusaruro uko bikwiye, abakibukora mu buryo bwa gakondo bakavuga ko nta musaruro ubamo.

JPEG - 224.4 kb
Bamwe mu bahinzi ntibumva uburyo ubuhinzi burumba kandi hari amahirwe menshi yo gukirigita ifaranga

Iri murikabikorwa mu buhinzi n’ubworozi rizagaragaza ibyagezweho binyuze mu ihuriro ry’ubuhinzi n’ubworozi nka rimwe mu mahuriro 10 agize urugaga rw’abikorera mu Rwanda (PSF), guhera tariki 2 kugeza ku ya 5 Ukuboza 2016.

Tugirinshuti Evariste ukorera ubuhinzi bw’ibigori mu murenge wa Kigarama Akarere ka Kirehe ku buso bwa hegitari eshatu ntiyemeranywa n’abavuga ko ubuhinzi butakigira umusaruro akurikije uburyo bwamuhinduye umumiliyoneri.

Mu buhinzi akorera kuri hegitari eshatu, mu gihembwe gishize yasaruye toni zirenga 13 kandi ngo iyo imvura itaza kubura yateganyaga gusarura toni 25 z’ibigori.

JPEG - 196.2 kb
Kongerera agaciro ibikomoka ku buhinzi ni imwe mu nzira zo guhanga imirimo ku rubyiruko

Yagize ati “Kugeza uyu munsi aho dutangiye gahunda yo gukora ubuhinzi buvuguruye, buhuje ubutaka, abahinzi bariyubatse mu buryo bushimishije. Umuhinzi ufite hegitari imwe byanze bikunze ku mwaka ashobora kubona hagati ya miliyoni imwe na miliyoni ebyiri; kuri hegitari imwe havamo toni esheshatu.”

Nzabarinda Isaac rwiyemezamirimo ukora ubutubuzi bw’imuto z’ibirayi mu karere ka Musanze, akaba na Perezida wa federasiyo y’amakoperative y’abahinzi b’ibirayi mu Rwanda, na we yahamije ko abavuga nabi ubuhinzi ari abataramenya amahirwe menshi atabyazwa umusaruro kandi yafasha benshi mu gihe ababarirwa muri 80% bakora ubuhinzi mu Rwanda.

JPEG - 233.6 kb
Ubuhinzi bwa kijyambere buratanga icyizere gihambaye mu buhinzi mu Rwanda

Yashimangiye ko igifasha umucuruzi wese ari ukudacia intege, kuko ibyago byo guhomba cyangwa amahirwe yo kunguka bijya kungana.

Yagize ati “Ubundi rwiyemezamirimo ntiyigera acika intege, kandi bizinesi ni ukwishora. 50% ushobora kunguka cyangwa ugahomba, ugomba gutinyuka ugakorana n’amabanki. Mu myitwarire iranga umushoramari nyawe ni uko atagomba gucika intege kandi agomba guhora ahanga udushya; ntiyumva amabwire kandi iteka ryose amafaranga ahora amuhumurira.”

Biteganyijwe ko iri murikabikorwa rizitabirwa n’abahagarariye koperative 17 zihuriye mu ihuriro ry’abahinzi muri PSF. Abanyarwanda barasabwa kuza kwihera ijisho bakunguka ubumenyi bwabafasha kuba abashoramari batarinze kureba ku byo badafite.

Mungwarareba Donacien Umuyobozi w’ishami rishinzwe ubuvugizi itumanaho no guhuza ibikorwa by’abakozi muri PSF yahamije ko biteze byinshi kuri iri murikabikorwa kuko uretse kwerekana uruhererekane rwo gutunganya umusaruro mu buhinzi, n’urubyiruko ruzagaragarizwa ko rushobora no kubona akazi binyuze mu kongera imirimo ishingiye ku kongerera agaciro ibikomoka ku buhinzi n’ubworozi.

Donatien yakomeje agira ati “Turashaka ko abantu baturutse hirya no hino mu gihugu baza bakabyigiraho cyane ko ubuhinzi budakorerwa mu mujyi nk’uko bukorerwa mu byaro ahari ubutaka bunini.”

Na none kandi muri iri murikabikorwa hazagaragazwa ibibazo by’abahinzi birimo kubura igishoro hanatangwe umuti urambye cyane ko banki na zo zizaba zatumiwe.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE