Advertisement
 
 
 
 
 
 
 
 

Amakuru | Mu Rwanda

Kigali: Abana bavuka ku bakora uburaya bashengurwa no kwimwa indangamuntu   

  Yanditswe na GATETE JEAN BOSCO
 June 2016

 
 

Bamwe mu bana bavutse ku bakora umwuga w’uburaya bageze igihe cyo gufata indangamuntu mu mujyi wa Kigali bahangayikishijwe n’uko bambuwe uburenganzira bwo kubona ibyangombwa nk’abandi banyarwanda kubera irangamimerere ryabo riburamo umubyeyi w’umugabo.

Bamwe mu bana baganiriye n’Imvaho Nshya bavuze ko bitaboroheye gushaka indangamuntu kandi ari kimwe mu byangombwa bikenerwa cyane mu buzima bwa buri munsi.

Umwe muri abo bana uri mu kigero cy’imyaka 17 yavuze ko kutamenya se bimuhoza mu gikomere, ati “Indangamuntu nayirukanseho n’ubu sindayibona kandi mushiki wanjye yarayibonye kuko we yabaruwe ku wundi mubyeyi kuko tudahuje data.”

Yavuze ko kutagira indangamuntu bituma agenda yikandagira yumva ari buyibazwe mu nzira, ntashobora gufunguza konti muri banki n’andi mahirwe menshi.



Umwe mu bakora uburaya utuye mu kagari ka Nyakabanda ya I, Umurenge wa Nyakabanda mu karere ka Nyarugenge ahamya ko yabyaye abana bane batandukanije ba se bikaba binamugora kubamenya cyane ko umukuru muri bo agejeje imyaka 20.

Yagize ati “Nababyariye mu buraya, ntiwambaza umugabo kuko ntawe nigeze nahuraga n’abagabo benshi… ngibyo ibyari bintunze.”

Avuga ko iyo agiye kwakira umwana we indangamuntu abashinzwe irangamimerere bamusaba kuzana amazina ya se w’umwana kandi kugira ngo umwana yandikwe banamusaba ifishi y’aho yamukingirije kandi atari kubona uko amukingiza kuko nta mwanya yabihaga.

Karangwa Johnson Umunyamabanga nshingwabikorwa w’umurenge wa Nyakabanda kuri iki kibazo avuga ko itegeko risaba kutarenza iminsi 15 mu kwandikisha umwana ukivuka kuko iyo irenze habaho ibyo umubyeyi asabwa kugira ngo hemezwe ko umwana ari uwe.

Amabwiriza y’irangamimerere yerekana ko uwarengeje iki gihe uhabwa indangamuntu aba afite imyirondoro n’ababyeyi bombi bazwi yerekanye umwanzuro w’urukiko bikunze kuba mu gihe umwe mu babyeyi atemera umwana.

Ibyo ababyeyi basabwa ngo bikumira amakimbirane yazavuka nko kuba umwana yaburana imitungo itari iye kubera ko amazina ya se yibeshyweho.

Kazaire Marie Goretti ushinzwe irangamimerere mu murenge wa Nyakabanda yongeyeho ko “nta kindi kintu bashingiraho uretse icyemezo cy’urukiko kigaragaza umwirondoro w’uwo mwana utaranditswe mu gihe giteganywa n’amategeko.

Minisitiri w’Ubutabera, Busingye Johnston yavuze ko iyo umwana akuze atazi umubyeyi we bimutera ipfunwe rikomeye kuko buri wese aba akeneye kumenya inkomoko ye cyane ko biri mu bimufasha mu mikurire ye.

Ku bana bavutse mu buraya, avuga ko badakwiye kuba inzirakarengane y’amakosa n’uburangare bw’ababyeyi; kuri we abo bana bakwiye guhabwa indangamuntu.

Yijeje abatabona ibyangombwa ko uburyo bwo kubafasha buhari kugira ngo bashobore kumenya neza imyirondoro nyayo y’ababyeyi.

 

Comments

  • Refresher June 2016

    Aba bana rwose bakwiye kurenganurwa nawe tekereza ko ntawe uhitamo uko avuka !! none ngo ntibahabwe irangamuntu? Iri si ivangura koko?


pre-moderation

Igitekerezo cyanyu kiragaragara kimaze gusumwa n'umwanditsi mukuru wa Imvaho Nshya

Izina Ryanyu
IGITEKEREZO

 
 
Polisi y’u Rwanda n’iy’Ubutaliyani basinyanye amasezerano y’ubufatanye
Polisi y’u Rwanda n’iy’Ubutaliyani basinyanye amasezerano y’ubufatanye

Ku itariki ya 12 Mutarama, i Roma mu murwa mukuru w’igihugu cy’Ubutaliyani, habereye umuhango wo gushyira umukono ku masezerano y’ubufatanye hagati ya Polisi y’u Rwanda n’iy’Ubutaliyani, amasezerano (...)

Babiri bafunzwe bakekwaho guha ruswa abayobozi b’inzego z’ibanze
Babiri bafunzwe bakekwaho guha ruswa abayobozi b’inzego z’ibanze

Polisi y’u Rwanda mu turere twa Nyarugenge na Nyamasheke ifunze abagabo babibi bakekwaho kugerageza guha ruswa abayobozi b’inzego z’ibanze kugira ngo babakorere ibinyuranije n’amategeko. (...)

Nyarugenge: Polisi yafashe agatsiko k’abajura bibye mudasobwa muri GS Nzove
Nyarugenge: Polisi yafashe agatsiko k’abajura bibye mudasobwa muri GS Nzove

Abagabo 5 bafunzwe na Polisi y’u Rwanda ikorera mu karere ka Nyarugenge, nyuma yo gufatanwa ibikoresho by’ikoranabuhanga birimo za mudasobwa bari bibye mu ishuri ryisumbuye (GS) rya Nzove (...)

Polisi ya Uganda yashyikirije iy’u Rwanda uwashakishwaga akekwaho ubujura
Polisi ya Uganda yashyikirije iy’u Rwanda uwashakishwaga akekwaho ubujura

Polisi ya Uganda yashyikirije iy’u Rwanda Hategekimana Isaie w’imyaka 42 ukomoka mu murenge wa Nkanka mu karere ka Rusizi, washakishwaga na Polisi y’u Rwanda akekwaho ubujura yakoreye mu karere ka (...)

Polisi y’u Rwanda irishimira ubufatanye bwayo n’abaturage mu minsi mikuru
Polisi y’u Rwanda irishimira ubufatanye bwayo n’abaturage mu minsi mikuru

Polisi y’u Rwanda iravuga ko uretse impanuka nke zabaye, ubundi umutekano wari ntamakemwa mu minsi mikuru itambutse, uyu mutekano ukaba warabonetse kubera ubufatanye bwayo n’abaturage. Aganira (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.