2017-06-25 09:02:18 clouds 27o High | Kigali Rwanda

Dukurikire:
 
 

Kicukiro: Urubyiruko rwasabwe kwitabira amatora kandi rugatora neza

Yanditswe na IMVAHO NSHYA

Kuya 2017-05-22 14:46:01

 
Share on:
 
Yasuwe:77
 
Yavuzweho:200
 
10
 
10

Urubyiruko rwo mu karere ka Kicukiro rwasabwe kwitabira amatora ya Perezida wa Repubulika ateganyijwe muri Kanama uyu mwaka, kandi bagashishoza bagatora umuyobozi uzabafasha gukomeza kwihutisha icyerekezo cy’iterambere ry’igihugu.

Mu nteko rusange y’urubyiruko rw’akarere ka Kicukiro yateranye ku wa 20 Gicurasi 2017, urubyiruko rwo muri aka karere rwasabwe gukomeza kurangwa n’indangagaciro zo kwihesha agaciro no gusigasira ibyagezweho, ariko bibutswa ko kugira ngo bagere kuri ibi byose basabwa gushishoza bagatora ubuyobozi bwiza, bubafasha gukabya inzozi z’iterambere bifuza.

Mu kiganiro yagiranye n’Imvaho Nshya nyuma y’iki kiganiro, Umuyobozi w’akarere ka Kicukiro Dr Nyirahabimana Jeanne, yavuze ko iyi nteko rusange y’urubyiruko yabaye umwanya mwiza wo gukangurira urubyiruko kwitabira amatora kandi bagatora neza, dore ko byagaragaye ko hari bamwe mu rubyiruko usanga bigize ba ntibindeba, ntibamenye ko gutora neza ari umusingi w’iterambere.

Yagize ati “Wari umwanya wo kwishimira ibyagezweho mu mihigo twahize mu rwego rw’urubyiruko, ariko tunabakangurira kuzitabira amatora kandi bagashishoza bagahitamo neza, bagatora umuyobozi ubereye u Rwanda kugira ngo dukomeze twubake ejo hazaza heza.”

Dr Nyirahabimana kandi yibukije urubyiruko gukomera ku ndangagaciro yo kwihesha agaciro, abasaba ko mu kwihesha agaciro hari ibyo bagomba kwirinda, birimo kunywa no gukwirakwiza ibiyobyabwenge, ubujura, ingengabitekerezo ya Jenoside, inda zitateguwe, ubuhezanguni n’ibindi.

JPEG - 78.6 kb
Umuyobozi w’akarere ka Kicukiro Dr Nyirahabimana Jeanne (Foto Twizeyimana F)

Rutikanga Jean Bosco ushinzwe ibikorwa by’amatora mu karere ka Kicukiro na Nyarugenge, yasabye uru rubyiruko kugira uruhare rugaragara mu myiteguro n’imigendekere myiza y’amatora, asaba abadafite ibyangombwa bibemerera gutora kubishaka vuba.

Yagize ati “Byaba bibabaje kubona umusaza yagutanze ku biro by’itora kandi uri umusore ushoboye. Byaba ari ikibazo kandi mu gihe wicaye nta byangombwa ufite bikwemerera gutora. Ni ahanyu rero ngo musuzume ibyo byose kugira ngo muzabashe kwihitaramo umuyobozi ubabereye”.

Niyitanga Irene, umuhuzabikorwa w’inama y’igihugu y’urubyiruko mu karere ka Kicukiro, yijeje ko urubyiruko rwo muri aka karere rwiteguye gukora ibishoboka byose ngo amatora y’Umukuru w’igihugu azagende neza, kuko bamaze gusobanukirwa agaciro ko gutora neza.

Yagize ati “Imbaraga n’ubushake turabifite kandi intego yacu ni ugushyigikira ubuyobozi buduha icyizere cyo kubaho no gutegura neza ejo hazaza”.

Muri iyi nteko rusange yari ifite insanganyamatsiko igira iti ‘Rubyiruko dusigasire ibyiza byagezweho, duhitamo neza ubuyobozi butubereye, twubake ejo hazaza heza’, urubyiruko kandi rwakanguriwe gukunda umurimo kuko ari byo bizarufasha kubaho neza no kugera ku cyerekezo cy’iterambere igihugu cyifuza.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE