2017-10-17 06:58:11 clouds 27o High | Kigali Rwanda

Dukurikire:
 
 

Inzego z’umutekano z’u Rwanda zifite umwihariko – Guverineri Kazaire

Yanditswe na IMVAHO NSHYA

Kuya 2017-05-22 05:57:25

 
Share on:
 
Yasuwe:119
 
Yavuzweho:200
 
10
 
10

Guverineri w’intara y’Uburasirazuba Kazaire Judith, avuga ko abagize inzego z’ingabo na Polisi y’igihugu bafite umwihariko wo gufatanya n’abaturage mu bikorwa by’iterambere, akavuga ko ari ubudasa bukomoka ku buyobozi bw’u Rwanda.

Uyu muyobozi avuga ibi abishingiye ku kuba kuri ubu mu gihugu hose hari kuba gahunda z’ibikorwa by’ingabo na Polisi zifatanyamo n’abaturage, bigamije guteza imbere abaturage, bijyana na serivise z’ubuvuzi bw’indwara zikomeye zivurwa n’ingabo z’u Rwanda. Izo gahunda za Army Week na Police Week zose zatangirijwe mu ntara y’Uburasirazuba.

Ibikorwa by’ingabo biri kwibanda ku kwifatanya n’abaturage mu bikorwa by’ubuhinzi, ubuvuzi, gusana ibiraro n’ibindi bikorwaremezo, mu gihe ibikorwa bya Polisi biri kwibanda ku kwegereza abaturage ibikorwaremezo by’amazi n’amashanyarazi akomoka ku mirasire y’izuba, byose kandi bijyana n’ubutumwa bukangurira abaturage kwirinda ibiyobyabwenge, ruswa, akarengane n’ibindi byaha.

JPEG - 359.5 kb
Guverineri Kazaire afatanyije n’ingabo na Polisi y’igihugu mu gikorwa cya Police week

Guverineri Kazaire Judith avuga ko kuba ingabo na Polisi b’u Rwanda ku nshingano zikomeye zo kubungabunga amahoro n’umutekano basanzwe bafite, bongeraho kwegera abaturage no kwifatanya nabo mu mu bikorwa by’iterambere, ari umwihariko n’ubudasa bw’ubuyobozi bw’u Rwanda, burangajwe imbere na Perezida wa Repubulika y’u Rwanda Paul Kagame.

Ati “Ibikorwa by’ingabo z’igihugu bishimwa n’ubuyobozi n’abaturage. Tuzi ko ubundi inzego z’umutekano zirinda ubusugire bw’igihugu, zikarinda abaturage n’ibyabo. Ariko umwihariko w’inzego z’umutekano zacu mu Rwanda tunashima cyane, ni uko batera n’intambwe bakaza mu mibereho y’abaturage ya buri munsi.”

Yakomeje agira ati “Twe tubona ubwo ari ubudasa bw’ubuyobozi bw’igihugu cyacu burangajwe imbere na Nyakubahwa Perezida wa Repubulika. Ni imiyoborere myiza, kandi tunashima ubufatanye bw’ingabo na Polisi n’izindi nzego uburyo dufatanya mu kubungabunga umutekano, no gukumira ibyaha.”

Uyu muyobozi w’intara y’Uburasirazuba kandi anagaragaza ko ibikorwa by’iterambere nko kwegereza abaturage amazi meza, umuriro, gusana imihanda n’ibiraro, n’izindi gahunda nyinshi; bikorwa n’ingabo z’u Rwanda bizahindura ubuzima bw’abaturage batari bake.

Si ubuyobozi gusa bushima ingabo na Polisi by’u Rwanda kuko abaturage nabo bagaragaza ko bashima ubufatanye bw’inzego z’umutekano, mu gushyigikira iterambere ryabo.

Mutuyemariya Veronika wo mu karere ka Kirehe ni umwe mu baherutse gahabwa amazi n’umuriro na Polisi y’u Rwanda.

Yagize ati “Polisi y’u Rwanda yaje inaha batubwira ko bagiye tugezaho amazi n’umuriro tubanza kumva bidashoboka. Ariko twagiye kubona mu gihe gito, nubwo hano ari kure cyane, twumvaga iterambere rizatugeraho ritinze, ariko babikoze mu gihe gito. Ubu batugejejeho amazi meza n’amashanyarazi, turabashimira cyane.”

Ndabakenga Samuel na we wahawe amashanyarazi mu nzu yagize ati “twarabyumvise, tumva ari ibintu byiza kandi twishimiye ko baje mu gihe gito bakaduha umuriro.”

Ubwo hatangizwaga gahunda y’icyumweru cyahariwe ibikorwa by’ingabo Army week mu karere ka Ngoma, abaturage benshi babwiye Imvaho Nshya ko bashimishijwe cyane uburyo ingabo z’u Rwanda zabegereye zigafatanya nabo mu bikorwa byo guhinga ibijumba.

Biteganyijwe ko gahunda ya Police week muri uyu mwaka wa 2017, izasiga mu ntara y’Uburasirazuba imiryango igera ku bihumbi 773 ihawe amashanyarazi; aturuka ku mirasire y’izuba.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE