2017-06-23 06:25:07 clouds 27o High | Kigali Rwanda

Dukurikire:
 
 

Inama 8 Minisitiri Kaboneka agira abayobozi bashya

Yanditswe na IMVAHO NSHYA

Kuya 2016-03-24 05:49:40

 
Share on:
 
Yasuwe:3
 
Yavuzweho:200
 
10
 
10

Minisitiri w’Ubutegetsi bw’Igihugu Francis Kaboneka, yibukije abajyanama b’uturere n’Umujyi wa Kigali bari mu Itorero i Gabiro mu karere ka Gatsibo, ko nk’abayobozi hari ibyo bakwiye kwitondera n’ibyo kwirinda, ngo babashe kuzuza inshingano batorewe.

Ubwo hatangizwaga itorero ry’abajyanama b’uturere n’Umujyi wa Kigali, Minisitiri Kaboneka yibukije abo bayobozi ko imirimo batorewe hari ibintu 8 by’ingenzi ibategeka.

Yagize ati:“Umujyanama uwo ari we wese cyangwa umuyobozi wagiriwe icyizere, hari ibyo dusabwa kwirinda nk’abayobozi batowe n’abaturage.”

PNG - 723.7 kb
Minisitiri Kaboneka Francis yabwiye abayobozi ibyo bagomba kwirinda (Foto archive)

Yabasabye ibi bikurikira:

1. Kutanyuranya na gahunda zemejwe n’Abanyarwanda n’ubuyobozi bw’igihugu, kuko bashinzwe kuzishyira mu bikorwa.Aha bibukijwe ko badashinzwe kuzirwanya, ndetse ngo n’uwagerageza kuzirwanya abaturage nabo bamurwanya.

2. Kudaheza abaturage mu bibakorerwa: ntibikwiye kwicara ngo bumve ko batekerereza abaturage gusa cyangwa ngo bumve ko bakwiye kubaheza mu bibakorerwa.

3. Kwiremereza ukigira igitangaza: Abayobozi batowe basabwe kutiremereza ngo bigire ibitangaza, ahubwo ko bakwiye kugabanya intera iri hagari yabo n’abaturage kuko ari bo bakorera.

4. Minisitiri kandi yabasabye kwirinda gukora bari mu mibare y’aho bari bwunguke.Yasobanuye ko hari abakora bashaka aho bari bukure inyungu zabo ku giti cyabo, abibutsa ko inyungu iri mu kazi kabo ari ugukemura ibibazo by’abaturage.

5. Kutikubira ibya rubanda: Abayobozi bibukijwe ko bashinzwe kurengera umutungo w’abaturage no kubafasha kuwubyaza umusaruro, bityo bakwiye kwirinda kuwikubira.

6. Kwirinda kwiyandarika: Minisitiri Kaboneka yagize ati:“Nta muyobozi wiyandarika mu bikorwa ibyo ari byo byose, ntuzisange uri mu makimbirane aho gufasha ingo ahubwo urimo kuzisenya.

Byaba biteye isoni, mbere yo kubwira abandi ngo bareke amakimbirane banza wirebe, tugomba gutanga urugero rwiza.”

7. Kwirinda kugandisha abaturage.

8. Kwirinda udutsiko: Minisitiri Kaboneka yasabye abayobozi bari mu itorero kwirinda gukorera mu dutsiko, ahubwo bagakorera hamwe kandi bagahuza ibitekerezo ku cyabateza imbere.

Minisitiri w’Ubutegetsi bw’igihugu Francis Kaboneka, yijeje aba bayobozi ko izi nama nibazigenderaho bazuzuza inshingano zabo, bakarangiza manda batorewe byanaba ngombwa bagatorerwa kuyobora indi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE