Advertisement
 
 
 
 
 
 
 
 

Amakuru | Mu Rwanda

Gishali: Ishuri rya Polisi y’u Rwanda rirakoresha gazi mu guteka   

  Yanditswe na RNP
 2 months ago

 
 

Ishuri rya Polisi y’u Rwanda rya Gishali (PTS) riri mu karere ka Rwamagana, ryaretse gutekesha inkwi; ubu risigaye rikoresha Gaz; nk’uburyo bugezweho mu guteka. Ibi kandi biri no mu byo Polisi y’u Rwanda yiyemeje mu kurengera ibidukikije ; nk’uko bikubiye muri gahunda ya Leta yashyizweho yo kurengera ibidukikije.

Umuyobozi w’Ishuri rya Polisi y’u Rwanda rya Gishali Commissioner of Police (CP) Joseph Mugisha, yavuze ko igitekerezo cyo kureka gutekesha inkwi hagakoreshwa Gaz, cyaturutse ku kuba barasuzumye neza bagasanga bakoresha inkwi nyinshi; ku buryo ndetse byangizaga ibidukikije kandi bidufitiye akamaro kanini.

CP Mugisha yagize ati "Polisi y’u Rwanda nk’urwego ruri ku isonga mu kurinda no kurengera ibidukikije, yasanze ari ngombwa kureka uburyo bwari busanzwe bumenyerewe bwo gutekesha inkwi, ku buryo bwagiraga ingaruka mbi ku kirere. Guhitamo gutekesha Gaz ni byiza, birihuta kandi nta ngaruka iyo ariyo yose ku bidukikije no ku buzima bw’abantu”.

Yakomeje avuga ko Gaz ifasha mu kugira isuku, hirindwa imyotsi n’imirayi, kandi ibiryo bishya vuba ku buryo hagabanyutseho amasaha arenga abiri ugereranyije na mbere bagikoresha inkwi.

Ku rwego rw’ubuzima, impuguke zerekana ko indwara ziterwa no guhumeka imyuka mibi iturutse ku myotsi yica abagera kuri miliyoni 4,3 buri mwaka ku isi yose. Iyi mibare ikaba iruta iy’abantu bahitanwa na SIDA, malariya ndetse n’igituntu bateranye.

Byaragaragaye kandi ko gutekesha inkwi binagira ingaruka mbi kuko amashyamba ashira, bityo hakabaho isuri, ubutaka buragenda, imisozi irahirima n’ibindi.

Yavuze kandi ko ukurikije uko ibiribwa bitekeshejwe Gaz biba bimeze, bifite itandukaniro rinini n’ibitekeshejwe inkwi kuko ibya Gaz biba bihiye neza; bityo bikagira ingaruka nziza ku buzima.



CP Mugisha yakomeje avuga kandi ko iri shuri ryiteguye gusangiza ubumenyi buri wese ubyifuza; haba kumenya imikoreshereze y’iyi Gaz no kwerekana uko igikoni cyayo cyubakwa; ku buryo umuntu wese yagira uruhare mu kutangiza ibidukikije, akareka gukoresha inkwi.

Ishuri rya Polisi y’u Rwanda rya Gishali rifite igikoni kirimo ikigega cyagenewe kubikwamo Gaz ingana n’ibiro ibihumbi 28; aho ishobora gutekeshwa mu gihe cy’amezi 3; ku munsi hakoreshwa itekera abantu 400 ingana n’ibiro 28.

Cyakora kugeza ubu; igiciro cy’inkwi n’icya Gaz nta, tandukaniro rinini ririmo, cyeretse ko gukoresha Gaz bifite izindi ngaruka nziza zavuzwe mbere.

Ubuyobozi bw’Ishuri bwavuze uko byari byifashe mbere y’uko rifata icyemezo cyo gukoresha Gaz mu guteka. Ubuyobozi bwerekanye imibare igaragaza uko ikoreshwa ry’inkwi ryagiraga ingaruka ku bidukikije.

Mu mezi ane ashize nibwo batangije ubu buryo bwo gukoresha Gaz. Ku munsi bishyuraga amafaranga ibihumbi 22 y’inkwi ; ku buryo abapolisi banakoraga urugendo rurerure bajya mu karere ka Nyagatare, Rulindo n’ahandi kugurayo izo nkwi. Muri rusange bakoreshaga amasiteri abiri y’inkwi ku munsi; ni ukuvuga ko batemaga ibiti 20 biringaniye ku munsi kugira ngo babone izo nkwi zo guteka, ni ukuvuga ko bakeneraga ibiti 600 ku kwezi, ubwo ku mwaka ni ibiti 7200. Ibi rero byari imbogamizi ikomeye yo kubona inkwi.

Byatumye rero Polisi y’u Rwanda nk’urwego rugira uruhare mu kurengera ibidukikije ruhitamo gukoresha Gaz nk’igisubizo kirambye.

Kugeza ubu, igikoni cy’iri shuri rya Polisi y’u Rwanda rya Gishali; gikoresha ibiro ibihumbi 28 bya Gaz (iba iri mu kigega cyabugenewe); iyi Gaz ikaba ikoreshwa mu gihe cy’amezi atatu; ku buryo ku munsi kubera iyo Gaz hatekerwa abantu 400.

Ukuriye itsinda ry’abatetsi b’Ishuri rya Polisi y’u Rwanda rya Gishali, Ufitinema Jeremy yagize ati: gutekesha Gaz bifite akamaro cyane, kuko dusigaye dukoresha igihe gito mu guteka ndetse bikaba binaturinda ingorane mu gihe dutekesheje inkwi”.

Ufitinema yakomeje avuga ko yishimiye ko akazi ke kagenda neza kubera igikoni kigezweho gikoresha Gaz mu guteka ibiribwa.

Yagize ati:” Nta kintu gishimisha nko gutekera abari mu mahugurwa hano benshi mu gihe gito cyane kandi ku buryo bufite isuku”.

Uku gukoresha Gaz mu guteka byafashije mu migendekere myiza y’ikirere, kutangiza amashyamba; bikaba kandi bigira isuku no kurinda imyotsi n’ibindi.

Polisi y’u Rwanda irateganya kandi ko mu minsi iri imbere, no mu bindi bigo, amashuri n’amashami yayo ari hirya no hino mu gihugu, nabo bazakoresha Gaz mu rwego rwo kurengera ibidukikije.

 

Comments

  • Karimangingo November 2016

    Ahubwo mu ma restora yose byagombaga kuba itegeko bikaba mubyo ufungura uyifunguye agomba kugaragaza ndetse n’abakora imigati


pre-moderation

Igitekerezo cyanyu kiragaragara kimaze gusumwa n'umwanditsi mukuru wa Imvaho Nshya

Izina Ryanyu
IGITEKEREZO

 
 
Minisitiri Gen. Kabarebe yakiriye  Ambasaderi w’u Bubiligi mu Rwanda
Minisitiri Gen. Kabarebe yakiriye Ambasaderi w’u Bubiligi mu Rwanda

Ambasaderi w’u Bubiligi mu Rwanda, Arnout Pauwels ari kumwe n’Umujyanama wa Ambasade mu bya gisirikare mu Rwanda, Lt Col Alain Lambert, bakiriwe na Minisitiri w’Ingabo z’u Rwanda, Gen James Kabarebe (...)

Ahabereye ibikorwa by’ubutwari hagiye gushyirwa ibimenyetso
Ahabereye ibikorwa by’ubutwari hagiye gushyirwa ibimenyetso

Minisiteri y’Umuco na Siporo, ivuga ko ahabereye ibikorwa by’ubutwari hagiye gushyirwa ibimenyetso biharanga, kugira ngo amateka y’aho ahabwe agaciro n’Abanyarwanda. Mu kiganiro n’abanyamakuru (...)

Abana icyenda bigiye muri gereza bakoze ibizamini bya Leta batsinda neza
Abana icyenda bigiye muri gereza bakoze ibizamini bya Leta batsinda neza

Urwego rw’igihugu rushinzwe imfungwa n’abagororwa (RCS) rurishimira ko ku nshuro ya mbere abana bafungiye muri gereza y’abana ya Nyagatare bakoze ibizamini bya Leta bisoza amashuri abanza n’icyiciro (...)

Kicukiro: Umunyeshuri yafatanwe kashe 39 z’impimbano
Kicukiro: Umunyeshuri yafatanwe kashe 39 z’impimbano

Polisi y’u Rwanda ikorera mu karere ka Kicukiro yafatanywe kashe 39 zitandukanye umunyeshuri witwa Tuyishime Bernard wiga ibijyanye no gukora amazi mu Ishuri ry’Ubumenyingiro IPRC-Kicukiro. Izi (...)

Bamwe mu babyeyi bagaragaje ibanga ryatuma abana batsinda ibizamini bya Leta
Bamwe mu babyeyi bagaragaje ibanga ryatuma abana batsinda ibizamini bya Leta

Ku wa mbere ushize nibwo ikigo cy’igihugu cy’uburezi REB, cyamuritse amanota y’ibizamini bya Leta by’amashuri abanza ndetse n’icyiciro cya mbere cy’ayisumbuye. Abanyeshuri bakoze ibizami bisoza (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.