2017-06-24 09:49:51 clouds 27o High | Kigali Rwanda

Dukurikire:
 
 

FARG iributsa abagenerwabikorwa bayo kwibuka baharanira kubaho neza

Yanditswe na IMVAHO NSHYA

Kuya 2017-04-12 10:18:16

 
Share on:
 
Yasuwe:155
 
Yavuzweho:200
 
10
 
10

Muri iki gihe cyo kwibuka ku nshuro ya 23 inzirakarengane zazize Jenoside yakorewe Abatutsi, ubuyobozi bw’Ikigega gishinzwe gushyigikira no gutera inkunga abatishoboye barokotse Jenoside yakorewe Abatutsi (FARG) buributsa abagenerwabikorwa kwibuka baharanira kubaho neza.

Umuyobozi Mukuru wa FARG Bwana Ruberangeyo Theophile, yagize ati “Ubutumwa natanga muri iki gihe cy’icyunamo ni uko twakomeza kwibuka twiyubaka, no kurwanya ingengabitekerezo ya Jenoside. Ku barokotse Jenoside, by’umwihariko abatishoboye dushinzwe, turababwira ngo bakomere, hari aho bamaze kugezwa na Leta yabo ibakunda.”

JPEG - 201.8 kb
Umuyobozi wa FARG Ruberangeyo Theophile

FARG ni ikigega cya Leta cyashyizweho mu mwaka wa 1998, gihabwa inshingano zo gufasha abatishoboye barokotse Jenoside yakorewe Abatutsi gihereye ku batishoboye kurusha abandi.

Ruberangeyo ashimangira ko iki kigega kitazatezuka gufatanya n’abafatanyabikorwa mu guharanira imibereho myiza y’abatishoboye barokotse Jenoside yakorewe Abatutsi, binyuze muri gahunda zacyo eshanu zirimo ubuzima (kubavuza), inkunga y’ingoboka, uburezi, kubashakira imishinga ibyara inyungu no guhabwa amacumbi.

Ruberangeyo yagize ati “N’ubusanzwe twebwe dushyira ingufu cyane ku bikorwa bisanzwe dufashamo abarokotse Jenoside batishoboye, ibyo bigakorwa kugira ngo wa mugenerwabikorwa wacu atiheba akagira ibyo yifuza kandi Leta y’Ubumwe imuri hafi.”

FARG yiyemeje gukomeza kwinjiza abarokotse Jenoside yakorewe Abatutsi batishoboye muri gahunda z’iterambere ibinjiza mu mishinga itandukanye harimo na Gahunda ya Girinka, inavuza abafite uburwayi n’ubumuga butandukanye ku bufatanye na Minisiteri y’Ubuzima n’amavuriro ya Leta, ibitaro bya gisirikare, ibitaro bikuru bya Leta na bimwe mu byigenga.

JPEG - 69.9 kb
Urubyiruko rwiga muri Kaminuza rwakuye abarokotse Jenoside batishoboye mu bwigunge

Harateganywa gukomeza kwita ku barokotse Jenoside yakorewe Abatutsi 18000 barwaye, muri bo 15000 bafite ihungabana rikunze kwigaragaza cyane mu gihe cyo kwibuka.

Abanyeshuri bazakomeza kwitabwaho harebwa ku masomo abagirira akamaro cyane kurusha ayandi barangije, nk’ay’imyuga n’ubumenyi ngiro n’ayandi.

Incike n’abandi barokotse Jenoside batishoboye bazakomeza kubakirwa inzu zijyanye n’icyerekezo, n’abafite izangiritse basanirwe ku bufatanye n’izindi nzego za Leta n’abafatanyabikorwa.

FARG kandi izanafasha abagenerwabikorwa mu mishinga ibashishikariza kugana amabanki no kuboroza inka kuko byagaragaye ko ari umutungo ubafasha kuva mu bwigunge cyane ko abazibashyikiriza banababa hafi.

FARG yagaruriye benshi ubuzima bufite icyerekezo

Ruberangeyo ahamya ko ibikorwa bya FARG nyuma y’imyaka 19 ishize byagaruriye umubare munini icyizere cyo kubabo. Yagize ati “Nk’abanyeshuri, mu myaka yashize wakundaga kubona bahungabana cyane, ariko ubu ntabwo bikiri cyane. Umusaruro urahari kandi na bo barabyivugira.”

JPEG - 49.8 kb
Ku bufatanye n’ibitaro bya Gisirikare, abarokotse Jenoside bafite uburwayi bunyuranye baravurwa

Yakomeje atanga urugero rw’ababyeyi bagizwe inshike na Jenoside yakorewe Abatutsi batakiri mu bwigunge kuko bungutse abana babitaho bibumbiye mu miryango nka AERG na GAERG, umuryango Heritage n’indi yashinzwe n’urubyiruko rwarokotse Jenoside.

Ruberangeyo ati “Bafite ababyeyi bajya gufasha bakararayo, bakaganira, basimbuye ababyeyi babo. Ni ikintu cyiza cyane, umubyeyi umwe yaratubyiye ati ‘njyewe nari narazinutswe no kumva umwana, numvaga nta buzima mfite ariko nongeye kubona abana bagiye mu cyimbo cy’abanjye.”

Ruberangeyo yashimiye urubyiruko rukomeje kugaragaza urukundo n’umutima mwiza kuko bifasha abari barihebye kuva mu bwigunge bagatangira kubona ahazaza habo heza.

Ubuyobozi bwa FARG burashima kandi Nyakubahwa Perezida wa Repubulika Paul Kagame, Ingabo zari RPA bagobotse igihugu buri wese agasubirana icyerekezo cyo kubaho, ashimangira ko tugomba gusigasira intambwe imaze guterwa, hirindwa abakibiba urwango n’ingengabitekerezo ya Jenoside.

Burashima kandi abafatanyabikorwa badahwema gufasha abarokotse Jenoside yakorewe Abatutsi babicishije mu kigega FARG kuko uruhare rwabo rwunganira ibikorwa byinshi Leta imaze kugeza ku batishoboye barokotse Jenoside.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE