2017-09-25 08:13:20 clouds 27o High | Kigali Rwanda

Dukurikire:
 
 

BDF yatangije uburyo bushya bwo kwagura umubare w’abayigana

Yanditswe na IMVAHO NSHYA

Kuya 2017-06-22 17:33:53

 
Share on:
 
Yasuwe:99
 
Yavuzweho:200
 
10
 
10

Ikigega cy’ingwate mu Rwanda (BDF) cyatangije ubukangurambaga bushya bwiswe ‘BDF Business Clinic’ bwo kwagura umubare w’abaturage giha serivisi zinyuranye zibafasha gukorana n’ibigo by’imari bakiteza imbere.

Iyi gahunda ngarukamwaka itegerejwe ku wa mbere tariki 26 Kamena 2017 igamije gufasha abanyarwanda kurushaho gusonanukirwa na serivisi za BDF bamwe bacyitiranya abandi bakaba badafire amakuru ahagije ku nzira bacamo bakabona ubufasha giha imishinga mito n’iciriritse ikagera ku ntsinzi.

BDF itanga serivisi zirimo ingwate, gutanga inkunga, ikodeshagurisha rigenerwa udukiriro, gushora imari mu mishinga yungura abaturage, gutera inkunga imishinga y’urubyiruko n’abagore bakora ubuhinzi, kongerera SACCO ubushobozi, ubujyanama n’amahugurwa ku bashoramari.

Umuyobozi ushinzwe kumenyekanisha ibikorwa muri BDF Carine Mugwaneza, yavuze ko iyi gahunda yitezweho kongera amahirwe yo gukorana n’abanyarwanda benshi kandi banyura mu nzira zibafasha kugera kuri serivisi bifuza.

Yagize ati “Ubutumwa bugiye gutangwa ni ugusobanurira Abanyarwanda BDF, ibyo duha banyarwanda byaba ibishya cyangwa ibisanzwe byahindutse, ariko cyane cyane tuzabasobanurira byimbitse uburyo dukora.”

Umwihariko w’iyi gahunda ni uko hazagaragaza n’amahirwe yafasha ba rwiyemezamirimo bato n’abaciriritse kubona inguzanyo muri banki.

Muganeza akomeza avuga ko iyi gahunda igiye gutangira abakozi ba BDF basanga abakiriya ku mashami ya Banki ya Kigali, Banki y’Abaturage na COPEDU mu gihugu hose kugira ngo barusheho gusobanurirwa, mu yindi myaka serivisi ikajya yagurirwa no mu bindi bigo by’imari.

Na none kandi hari gahunda yo gukora ibitaramo byo ku muhanda (Road Shows) mu masoko yo mu mujyi wa Kigali nk’irya Nyamirambo, Nyabugogo, Kimisagara na Kimironko.

Umuyobozi ukuriye ishami ry’amategeko no gukurikirana imishinga muri BDF, Monique Umugwaneza yavuze ko kuri ubu bakorana na 45% y’ibigo by’imari 454 basinyanye amasezerano y’ubufatanye mu kunoza serivisi.

Kuva BDF yatangizwa na Leta y’u Rwanda ku bufatanye na BRD mu 2011, BDF imaze gutanga amafaranga y’ingwate n’inkunga abarirwa muri miliyari zigera kuri 42 ku mishinga y’Abanyarwanda 11 663. Imishinga 6000 yatewe inkunga yahawe amafaranga abarirwa muri miliyari 4 na miliyoni 233.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE