2017-06-28 15:02:12 clouds 27o High | Kigali Rwanda

Dukurikire:
 
 

Bakobwa, kubafasha mutabigizemo uruhare ntaho byatugeza –Jeannette Kagame

Yanditswe na IMVAHO NSHYA

Kuya 2017-03-28 14:03:43

 
Share on:
 
Yasuwe:416
 
Yavuzweho:200
 
10
 
10

Jeannette Kagame yatanze impanuro zo guteza imbere uburere n’uburezi, asaba buri wese mu cyiciro cye kongera imbaraga mu bisabwa ngo uburezi bw’abana w’abakobwa butere imbere bagere ku kigero basaza babo bariho ubu.

Yabitangaje kuri uyu wa Kabiri tariki ya 28 Werurwe 2017, ubwo yasozaga ku mugaragaro gahunda y’umushinga Imbuto Foundation yo gushishikariza abana b’abakobwa kwiga ibyiciro byose bashyizeho umwete, kuvanaho inzitizi no guhemba ababaye indashyikirwa.

Mu muhango wabereye mu karere ka Bugesera, mu murenge wa Mayange, Imbuto Foundation yasoje gahunda yo guhemba abanyeshuri b’abakobwa 91 bo mu mashuri abanza, no mu cyiciro cya mbere n’icya kabiri cy’amashuri yisumbuye.

Mbere yo gutanga ibihembo habaye ikiganiro kibaza impamvu abana b’abakobwa bataragera ku rwego rumwe n’ab’abahungu mu gutsinda neza ibizamini bya Leta n’inzitizi zigihari.

Abana biga mu mashuri atandukanye, bagaragaje ko hakiri inzitizi ku bana b’abakobwa bagishukwa bakajyanwa mu ngeso mbi, bakararuka ntibarebe ko hari ubundi buzima buri imbere, imirimo yo mu ngo no kwitinya.

Ababyeyi bamwe bagaragaje ko hakiri abana b’abakobwa bagihugira mu materefoni n’abasore bikabararura.

Madamu Jeannette Kagame yavuze ko ibyo byonyine byerekana ko ababyeyi bagifite umukoro.

Ati “Babyeyi duhereye ku nzitizi twumvise mu mitsindire y’abana bacu , cyane abana b’abakobwa buri wese yasobanukiwe uruhare rwe mu guhangana nazo. Nk’ababyeyi dushobora guhangana nazo tubereka akamaro ko kwiga ariko kandi tukubahiriza inshingano zacu zo kubashakira ibibatunga, kubabonera umwanya wo kuganira tubabera urugero no kubaha uburere buzima.”

Yibukije abana b’abakobwa ko umwana mwiza bamusiga yinogereza, bityo ko bagomba kwibuka ko uburezi bwiza ababyeyi baharanira nabo bagomba kubugiramo uruhare.

Ati “Ntaho byatugeza dukomeje gushyiraho ingamba ziborohereza, gusubizwa uburenganzira mwari mwarambuwe ngo mubashe kuba indashyikirwa nk’abo dushima uyu munsi, atari mwebwe mubigizemo uruhare. Abana b’abakobwa bafite inshingano zo gukorana umwete bakagira intego mu buzima aho bakeneye ubufasha bakabusaba ku babakuriye ariko kandi bakirinda no kurangara.”

Mu 2005 ubwo Imbuto Foundation yatangizwaga, abakobwa batsinze ibizamini bya Leta mu mashuri abanza bari 39,5% ariko mu mwaka wa 2016 abakobwa baje ku mpuzandengo ya 55%.

Mu bizamini bisoza amashuri abanza, mu mwaka wa 6, mu 2016 abatsinze 42,57% bari abakobwa mu gihe basaza babo bari 57,43%. Muri uwo mwaka kandi 37,8% by’abatsinze neza ibizamini bya Leta bisoza icyiciro cya mbere cy’amashuri yisumbuye bari abakobwa mu gihe abahungu bari 62,2%.

Imbuto Foundation imaze gufasha no guhemba abana b’abakobwa barenga 4 400, barimo n’abahawe amahugurwa yo kwiteza imbere ndetse n’abahawe buruse zo kwiga hanze.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE