2017-09-21 09:07:12 clouds 27o High | Kigali Rwanda

Dukurikire:
 
 

Army Week: Ingabo zimaze kuvura abantu 60 000 mu kwezi kumwe

Yanditswe na IMVAHO NSHYA

Kuya 2017-06-06 13:50:35

 
Share on:
 
Yasuwe:322
 
Yavuzweho:200
 
10
 
10

Abaganga mu Ngabo z’u Rwanda n’abandi basanzwe mu bitaro n’ibigo nderabuzima, bamaze kuvura indwara zitandukanye abaturage basaga 60000 mu gihe cy’ukwezi kumwe mu gikorwa cya ‘Army Week.

Mu kiganiro n’itangazamakuru, kuri uyu wa 6 Kamena 2017, umuvugizi w’Ingabo z’u Rwanda, Lt. Col. Ngendahimana Rene, yavuze ko indwara abaturage bavuwe zirimo iz’amenyo, kubaga amagufwa, izo mu matwi, iz’abagore, n’iz’amaso; kandi zikavurwa ku buntu.

JPEG - 265.7 kb
Umuvugizi w’Ingabo z’u Rwanda, Lt. Col. Ngendahimana asobanura umusaruro wa Army Week 2017

Col. Dr. King Kayondo, wafashije mu bikorwa byo kwegereza ubuvuzi abaturage, yavuze ko mu bitaro ndetse n’ibigo nderabuzima bisaga 30 mu turere twose abaganga ba RDF bakoreyemo, bakoranye neza n’abaturage nubwo hakiri umubare munini w’abandi bakeneye kuvurwa.

Ati “Ikibazo nyamukuru ni icy’abaganga bacu bakiri bake hamwe n’abaturage bafite umuco wo gutindana uburwayi mu ngo zabo ntibajye kwivuza hakiri kare bitewe nuko abenshi muri bo usanga nta bwishingizi bwo kwivuza bagira… Mu rwego rw’ubuvuzi ikibazo gikomeye twahuye na cyo muri iki gikorwa cya Army week, ni icy’umubyeyi twavuriye mu bitaro bya Kibogora bari bahaye taransiferi, twaramubaze tumukuramo igisyo gipima ibilo 6, kandi ubu yarakize yasubiye mu rugo ari mu mirimo ye isanzwe’’.

Ushinzwe gukurikirana ibikorwa bya ‘Army week’ hirya no hino mu gihugu, Col. Ndore Rulinda, yibukije ko n’ubusanzwe Ingabo z’Igihugu iyo ari mu gihe cy’amahoro ziba zifite inshingano zo kwita ku baturage no kubafasha kugira ubuzima bwiza..

Yakomeje agira ati “Twe nk’Ingabo z’Igihugu umutekano duha abaturage tuwubonera mu buryo bugari atari ukurinda ubusugire bw’igihugu gusa, nko mu bihe by’amahoro twunganira n’abaturage kugira ubuzima buzira umuze, kubaka ibiraro, gusana amashuri n’imihanda n’ibindi…”

JPEG - 90 kb
Abaganga bo mu ngabo z’u Rwanda bavuye abaturage benshi hirya no hino mu gihugu

Mu rwego rw’ibikorwa remezo, ingabo z’u Rwanda zasannye ibiraro 219 mu gihugu hose, zegereza abaturage ibilometero 8 by’imiyoboro y’amazi meza, zisana imihanda itwara umusaruro ku masoko ifite uburebure bwa kilometero 135, zisana inzu 2 359 z’abatishoboye, zubaka ibyumba by’amashuri 18, ubwiherero 2 779 n’ibindi.

Gahunda ya ‘Army week’ izasozwa nyuma y’ukwezi kumwe hizihizwa umunsi wo Kwibohora uba ku ya 4 Nyakanga 2017.

TWAGIRA WILSON

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE