2017-06-24 12:54:56 clouds 27o High | Kigali Rwanda

Dukurikire:
 
 

Antoine Hey yasabwe guhesha Amavubi itike ya CAN 2019

Yanditswe na IMVAHO NSHYA

Kuya 2017-03-22 06:00:09

 
Share on:
 
Yasuwe:210
 
Yavuzweho:200
 
10
 
10

Umudage Antoine Hey yasinye amasezerano yo gutoza ikipe y’igihugu y’u Rwanda ejo hashize tariki 21 Werurwe 2017 ; yahawe amasezerano y’umwaka umwe ushobora kongerwa igihe yitwaye neza.

Perezida w’Ishyirahamwe ry’umupira w’amaguru mu Rwanda “FERWAFA”, Nzamwita yatangaje ko bamuhaye intego yo guhesha ikipe y’u Rwanda itike ya CHAN 2018 izabera muri Kenya ariko intego nyamukuru ishobora no gutuma amasezerano aseswa akaba ari uguhesha u Rwanda itike ya CAN 2019.

Nzamwita yavuze ko uyu mutoza azungirizwa n’abatoza b’Abanyarwanda. Aha yongeye gushimangira ko umutoza wungirije agomba kuba nta yindi kipe (Club) atoza.

Yakomeje avuga ko mu bo bazahitamo basanzwe bafite akazi bazareka bakagasoza kuko ntibamuvane mu ikipe ye ariko umwaka w’imikino warangira ntazasubire muri iyo kipe.

JPEG - 173.9 kb
Umutoza mushya w’Amavubi, Antoine Hey yasabwe gusubiza u Rwanda muri CAN ruherukamo muri 2004 (Foto Bugingo F)

Umutoza Antoine Hey yavuze ko yiteguye gukora ibishoboka byose ikipe y’u Rwanda igakina amarushanwa akomeye. Antoine Hey yavuze ko mu 2014 yakurikiranye ikipe y’u Rwanda ubwo yasezereraga Libiya mu gushaka itike ya CAN 2015 akabona ari ikipe nziza.

Ubwo uyu mutoza yatangazwaga ko ari we wahawe akazi ko gutoza Amavubi, tariki 28 Gashyantare 2017, ikinyamakuru “Jeune Afrique” cyatangaje ko azahabwa amasezerano y’imyaka 2, akazizanira abamwungirije ndetse akazajya ahembwa ibihumbi 20 by’amadolari aho u Rwanda rugomba gutanga ibihumbi 10 naho ishyirahamwe ry’umupira w’amaguru mu Budage rigatanga ibindi bihumbi 10.

Umuyobozi wa Siporo muri Minisiteri y’Umuco na Siporo “MINISPOC”, Bugingo Emmanuel yavuze ko ibyo nawe yabibonye mu binyamakuru ashimangira ngo uyu mutoza azahembwa nk’uko n’abandi bahembwaga. Gusa akaba atahishuye umushahara uyu mutoza azajya ahabwa.

Uyu mutoza Hey na we yanze kugira icyo abivugaho gusa yemeza ko mu byumweru bibiri umunyamakuru w’inkwakuzi ashobora kuzaba yawumenye.

Antoine Hey azajya atoza ikipe nkuru ndetse n’iy’abatarengeje imyaka 23 naho umutoza wungirije akazaba umutoza w’abatarengeje imyaka 20.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE