Advertisement
 
 
 
 
 
 
 
 

Amakuru | Mu Rwanda

Agahinda k’umunyeshuri wahungiye mu Rwanda agiye guhabwa ‘diplome’   

  Yanditswe na NTAWITONDA JEAN CLAUDE
 3 months ago

 
 

Mu minsi 18 gusa Ntezintwari Naason yari yiteguye guhabwa impamyabumenyi (diplome) nyuma yo kurangiza amashuri yisumbuye, ariko ubwo umutekano muke wari umeze nabi mu Burundi yahisemo guhungira mu Rwanda ngo arokore ubuzima bwe.

Naason uri mu kigero cy’imyaka 23 y’amavuko yahungiye mu Rwanda ari kurangiza amashuri yisumbuye muri Lycée de Kagayi, ishuri riherereye i Muyinga; avuga ko atazibagirwa uburyo ubuzima bwe bwahinduriwe icyerekezo n’amakimbirane yabaye mu gihugu cye guhera muri Mata 2015.

Naason ngo ntazibagirwa uwamuteye kurata impamyabumenyi yatsindiye nubwo bitamubuza gukomeza ubuzima


Nubwo yahunze ubwicanyi mu gihugu cye akiza amagara ye yanze guheranwa n’agahinda biba ngombwa ko yihatira gukomeza kwigira mu buhunzi aho acumbikiwe mu Nkambi ya Mahama mu karere ka Kirehe.

Mu Kiganiro na Imvaho Nshya ubwo yasuraga impunzi zicumbikiwe mu Nkambi ya Mahama, Ntezintwari yagize ati “Njyewe navuye iwacu nsa n’uwarangije; nari ndindiriye ‘diplome habura iminsi 18 kugira ngo bayimpe. Reba ‘diplome’ yanjye nataye, n’ubu sinshobora kwibagirwa icyo ndi cyo ahubwo mpora nibuka uwakinteye. Narimo kurangiza muri Normal Primaire (ubwarimu).”

Kuri ubu ategereje gukorera ikizamini cya Leta mu Rwanda kuko yiga mu mwaka wa gatandatu w’amashuri yisumbuye mu nkambi, akareba ko yabona indi mpamyabumenyi isimbura iyo yakoreye iwabo atagitekerezaho cyane.

Naason ni umwe mu barenga ibihumbi 50 bacumbikiwe muri iyi nkambi nk’uko bigaragazwa n’Ishami ry’Umuryango w’Abibumbye ryita ku mpunzi (UNHCR). Abacumbikiwe mu nkambi ya Mahama bari mu barenga ibihumbi 80 bahungiye mu Rwanda kuva amakimbirane yatangira mu 2015.

JPEG - 450.8 kb
Yiyemeje kudaheranwa n’agahinda, akomeza kwiga mu buhunzi

Ese amahanga yibagiwe u Burundi?

Impunzi z’Abarundi ziri mu nkambi ya Mahama zirashimira Umuryango w’Abibumbye kuba ukora uko ushoboye ugafatanya na Leta y’u Rwanda mu kubungabunga ubuzima bwabo cyane ko hari na gahunda yo kubakura mu mahema bubakirwa inzu z’amatafari babamo mu buryo burambye.

Nubwo bashima uburyo babungabungiwe umutekano, babona Loni isa n’iyirengagiza gukoresha ububasha bwayo kuko iyoboye isi, ikaba ifite n’ububasha bwo kugarura amahoro mu gihugu cyabo aho kurebera ibitande neza bibangamiye uburenganzira bwa muntu.

Umwe muri bo yagize ati “Abadusura nabo bazaruha guhora badusanga mu nkambi, kandi byaba byiza badusanze i Burundi tukabaha amakuru meza atarimo amaganya nk’ayo dufite ubu.”

Undi yongeyeho ati “Ibyo kurya tubihabwa na Loni. Kuki yishimira kuduha ibiryo aho gukemura ikibazo cyacu? No kuduha ibiryo byari byiza ariko gukemura ikibazo ni byiza kurushaho, kugira ngo nugera mu rugo uzatere igitoki, wongere guhingwa imyumbati ugire indyo yuzuye n’ubuzima bwiza.”

JPEG - 277.7 kb
Nubwo bahabwa ibyo kurya, basanga Loni ikwiye kubafasha bagasubira mu gihugu cyababyaye

Mu mezi arenga 16 ashize, igihugu cyari mu mwiryane watumye ababarirwa mu bihumbi 250 bahunga igihugu mu gihe abagera ku 1500 ari bo bishwe.

Ububwicanyi i Burundi bwazamutse ubwo Perezida Pierre Nkurunziza yatangazaga kongera kwiyamamariza kuyobora manda ya gatatu muri Nyakanga 2015; abatavuga rumwe na we bamushinja kwangiza Itegeko Nshinga ariko byarangiye ari we wongeye kubona amajwi menshi mu matora akomeza kuyobora kugeza ubu.

JPEG - 307.1 kb
Abacumbikiwe mu Nkambi ya Mahama bishimira uburyo Leta na UNHCR bibitayeho

U Burundi bukomeje kubaka urukuta ku mubano n’u Rwanda

Muri uku kwezi Leta y’u Burundi, ibinyujije kuri Visi Perezida wa kabiri Joseph Butore, yafashe umwanzuro wo guhagarika ibikomoka ku buhinzi byinjizwaga mu Rwanda ndetse inaburira abaturage n’abayobozi ko abazarenga kuri iki cyemezo bazabiryozwa.

Iki cyemezo cyaje gikurikira icyo guhagarika imodoka zitwara abagenzi mu buryo bwa rusange ziva mu Rwanda n’izisohoka mu Burundi ziza mu Rwanda.

Inteko Ishinga Amategeko y’Umuryango wa Afurika y’Uburasirazuba (EALA) yanenze ibi byemezo by’ikubagahu, yemeza ko igiye kubikoraho ubugenzuzi hagafatwa n’imyanzuro ishobora kuba ibihano cyane ko ibi byemezo bibangamiye urujya n’uruza rw’abaturage bagize Umuryango wa Afurika y’Uburasirazuba (EAC).

JPEG - 348.9 kb
Abana ni bo biganje mu nkambi ya Mahama, barimo n’abahunze bonyine bibana mu nkambi ari na bo bagorwa cyane no kwiga
JPEG - 272.2 kb
Umubare munini w’abana waganye ishuri, kandi n’abakiri mungo harebwa uburyo bashishikarizwa kwiga
JPEG - 559.3 kb
Bamwe mu bagifite igishoro bahunganye bafite ubucuruzi nubwo bemeza ko kubona ababagurira mu nkambi bitoroshye
 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Ubwiza bw’indege ya mbere nini yaraye itashye mu Rwanda (mu mafoto)
Ubwiza bw’indege ya mbere nini yaraye itashye mu Rwanda (mu mafoto)

Indege nshya yiswe ‘Umurage’ yaraye itashye mu Rwanda ku wa 1 Ukuboza 2016 igaragaza umwihariko mu miterere n’ubwiza bibereye amaso. Ikigo RwandAir cyakiriye iyi ndege ‘Airbus 330-300’ ifite (...)

Abapolisi 60 barangije bahuguwe ku buyobozi bwa sitasiyo za Polisi
Abapolisi 60 barangije bahuguwe ku buyobozi bwa sitasiyo za Polisi

Mu rwego rwo gukomeza kongerera ubumenyi abapolisi, ejo icyiciro cya kabiri cy’amahugurwa y’ubuyobozi bwa sitasiyo za Polisi cyarangijemo abapolisi 60 ku Ishuri rikuru rya Polisi (NPC) riri mu (...)

Kibeho: Ikibazo cy’amaresitora n’amacumbi kiracyari ingorabahizi
Kibeho: Ikibazo cy’amaresitora n’amacumbi kiracyari ingorabahizi

Mu gihe tariki 28 Ugushyingo buri mwaka hizihizwa umunsi w’ibonekerwa i Kibeho mu karere ka Nyaruguru, abaturuka hirya no hino baba bitabiriye uyu munsi mukuru, batangaza ko umutekano basanga mu (...)

U Rwanda rwasabye guhata ibibazo abasirikare 20 b’Abafaransa
U Rwanda rwasabye guhata ibibazo abasirikare 20 b’Abafaransa

Ubushinjacyaha bw’u Rwanda bwasabye Urukiko Rukuru rw’u Bufaransa ubufatanye mu gukurikirana abasirikare b’Abafaransa bakurikiranyweho uruhare bagize muri Jenoside yakorewe Abatutsi muri Mata 1994. (...)

Leta yishimira kuba ibiribwa byinshi mu bitunze Abanyarwanda babyihingira
Leta yishimira kuba ibiribwa byinshi mu bitunze Abanyarwanda babyihingira

Leta y’u Rwanda yagaragaje ko iterwa ishema no kuba ibiribwa byinshi bitunze abaturage biva muri bo, ibindi bikeya akaba ari byo biva mu mahanga. Mu nama mu nama nyungurabitekerezo ku isano iri (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.