Advertisement
 
 
 
 
 
 
 
 

Amakuru | Mu Rwanda

Abayobozi 456 bo mu karere ka Nyarugenge batangiye Itorero ry’igihugu   

  Yanditswe na BASANDA NS OSWALD
 August 2016

 
 

Abayobozi b’inzego z’ibanze 456 bo mu karere ka Nyarugenge mu mujyi wa Kigali batangiye itorero ry’igihugu bazamaramo icyumweru, i Tumba mu karere ka Rulindo.

Uretse kwigishwa indangagaciro na kirazira z’umuco nyarwanda, mu masomo y’ibanze izi ntore z’Inkomezamihigo zizahabwa harimo kunoza imitangire ya serivise baha abaturage, ndetse no kwihutisha gahunda z’icyerekezo 2020 u Rwanda rwihaye.

Abagiye gutozwa ni icyiciro cya kabiri, kuko mbere hari hatojwe abandi bayobozi 618 baturutse mu mirenge 10 igize Akarere ka Nyarugenge.

Umuyobozi w’Akarere ka Nyarugenge Kayisime Nzaramba, yavuze ko abatojwe mbere byabagiriye umumaro cyane, kuko barushijeho kunoza akazi kabo ka buri munsi, bituma n’abaturage babagana bishimira uko bakirwa, bityo akaba asaba abaje gutozwa muri iki cyiciro kuzacengerwa n’inyigisho nziza bagiye kumara icyumweru bahabwa.

JPEG - 84.8 kb
Abayobozi 456 bagiye kumara icyumweru batorezwa i Tumba (Foto Basanda O)

Umuyobozi wungirije ushinzwe imibereho myiza y’abaturage mu mujyi wa Kigali, Kazayire Judith, yasabye aba bayobozi b’inzego z’ibanze gukorera hamwe, gukorana umwete kandi bigakorwa mu cyerekezo kimwe nta gusobanya.

Yagize ati “Turabasaba ko mwarushaho kwegera abaturage mugatanga serivise zinoze, harimo ubwisungane mu kwivuza, kugira ngo umuturage agire ubuzima bwiza, kuko umuturage iyo agize ikibazo ni mwe bareba bwa mbere.

Imicururize y’akajagari n’imyubakire idahwitse mufite uruhare mu kubirwanya bigacika burundu”.

Aba bayobozi basabwe gukora bagamije kwesa imihigo, buri wese agaharanira ko aho ayobora haba aha mbere, kuko ibi ari byo bizatuma u Rwanda ruhora ku isonga muri Afurika no ku isi yose.

Nyiransabimana Jeannette, intore yaturutse mu murenge wa Rugarama, kimwe na bagenzi be, bavuze ko bazakurikira neza amasomo bazahabwa mu Itorero, kuko bizeye ko azabongerera ubumenyi n’imbaraga mu kuzuza inshingano zabo.

Yagize ati “Umuturage ni we uri ku isonga, agomba guhabwa serivize zinoze kandi aho adasobanukiwe tukamwereka icyo yakora kugira ngo twese tujyane mu cyerekezo kimwe”.

Mu bindi bibazo izi ntore zigomba gufatira ingamba muri iri torero, harimo gushakira umuti ikibazo cy’imirimo idahagije cyane cyane mu rubyiruko, abana bata ishuri, imirire mibi, ruswa muri gahunda ya Girinka, abacukura amabuye y’agaciro mu buryo budasobanutse, ibibazo mu makoperative n’ibindi.

Insanganyamatsiko y’iri torero iragira iti “Twubake ubushobozi bw’inzego z’ibanze zatowe, hagamijwe impinduramatwara mu iterambere, binyujijwe mu Itorero ry’igihugu”.

 

Comments

 
 
  Itangazamakuru ryasabwe gufata iya mbere mu kurinda abangavu gutwara inda zitateguwe
Itangazamakuru ryasabwe gufata iya mbere mu kurinda abangavu gutwara inda zitateguwe

Umuryango nyarwanda ugamije guteza imbere ubuzima, HDI, urasaba ko itangazamakuru gufasha abanyarwanda guhindura imyumvire no gukuraho imbogamizi ababyeyi bahura na zo mu kuganiriza abana babo (...)

Uganda yagaruye abanyarwanda babiri bari barayihungiyemo batorotse gereza
Uganda yagaruye abanyarwanda babiri bari barayihungiyemo batorotse gereza

Polisi y’u Rwanda yashyikirijwe abagabo babiri bari barahungiye muri Uganda nyuma yo gutoroka gereza, ikaba yarabakiriye ku italiki ya 21 Gashyantare ku mupaka wa Gatuna. Abagaruwe ni (...)

Min. Kanimba  yasabye umunyamabanga wa EAC gushyira ingufu mu mavugurura
Min. Kanimba yasabye umunyamabanga wa EAC gushyira ingufu mu mavugurura

Minisitiri w’Ubucuruzi, Inganda n’Ibikorwa by’Umuryango w’Afurika y’Uburasirazuba, François Kanimba, yakiriye mu biro bye Umunyamabanga Mukuru w’Umuryango wa Afurika y’Uburasirazuba, EAC, Amb. Libérat (...)

Abahoze ari abajura muri Nyabugogo bashinze ihuriro
Abahoze ari abajura muri Nyabugogo bashinze ihuriro

Urubyiruko rugera ku 157 rwahoze rukora ibikorwa by’ubujura bitandukanye mu gace ka Nyabugogo mu Mujyi wa Kigali rwiyemeje kubireka, ubu rukaba rwarashyizeho ihuriro ryabo ryitwa” Hinduka uhindure (...)

Polisi y’u Rwanda yafatiye ibiyobyabwenge na magendu mu mikwabu
Polisi y’u Rwanda yafatiye ibiyobyabwenge na magendu mu mikwabu

Imikwabu Polisi y’u Rwanda yakoze mu mpera z’icyumweru gishize mu turere twa Huye, Kirehe, Gicumbi na Nyanza yayifatiyemo ibiyobyabwenge by’ubwoko butandukanye na magendu. Uwitwa Ntirenganya Jean (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.