Advertisement
 
 
 
 
 
 
 
 

Amakuru | Mu Rwanda

‘Abayisilamu babonye amahirwe menshi Perezida Kagame ayoboye’   

  Yanditswe na IYAREMYE YVES
 5 months ago

 
 

Abasobanukiwe amateka y’Idini ya Islamu mu Rwanda bavuga ko yasanywe n’Abarabu b’abacuruzi ndetse n’abasirikare b’abirabura bakoreraga Abadage mu myaka ya 1900, ariko icyo gihe abariyobokaga babitaga ‘Abaswahili’ bigatuma hari amahirwe batabona arimo n’ayo mu myanya y’ubuyobozi.

Umuyobozi w’Intara (Division) ya Kigali n’Uburasirazuba Maj. Gen Mubarak Muganga ubwo yaganirizaga abayobozi n’Abamenyi b’Idini ya Islam mu karere ka Kicukiro yahamije ko mu mateka y’u Rwanda, nyuma yo guhagarika Jenoside yakorewe Abatutsi ari bwo Abayisilamu bagiriwe icyizere mu miyoborere kuko inzego zose bazisangira n’abandi banyarwanda.

JPEG - 126.4 kb
Maj. Gen Mubarak Muganga Uyobora Intara ya Kigali n’iy’Uburasirazuba mu bya Gisirikare

Izi ngero yazitanze agaragariza Abayisilamu mu Rwanda ko nta mpamvu n’imwe bafite zo kwigomeka kuri Leta cyangwa kwishora mu butagondwa kuko uburenganzira bakeneye bwose babubonye.

Yagaragaje ingero yihereyeho kuko ayoboye kimwe cya kane cy’igihugu mu by’umutekano akurikizaho Minisitiri w’Umutekano mu Gihugu (Sheikh Musa Fazil) n’abandi batandukanye mu gihe mbere umusirikare yibuka wari ukomeye yari Sergent Major na we wari umushoferi.

Yagize ati "Ubu baduha ubwisanzure mu nzego zose ariko mu mateka dufite mu ngabo za Ex-FAR Umuyisilamu wari umusirikare mukuru yari Sergent Major kandi na we yari umushoferi; si uko bari bananiwe kuba bamuzamura ariko bakavuga ngo ‘uwo muntu w’Umuswahili muramujyanahe?’ Bamenyaga ko ari umuyisilamu bakamwita umuswahili…"

Yakomeje agira ati "Dufite abayobozi batandukanye murabizi. Njyewe nshinzwe umutekano muri iyi Ntara … Nk’uyoboye kimwe cya kane cy’igihugu iyo kiba icyizere gike cyangwa bakavuga bati ‘nyabuneka nimubimuha turashira’ ntabwo nakabaye ndi muri abo bane."

Ababazwa n’uko hari abayisilamu bakomeje kwangiza amahirwe babonye ku buyobozi bwa Perezida Paul Kagame kandi ari bwo babonye menshi yo guhamya imyemerere yabo babana neza n’Abandi banyarwanda.

Ati "Ubu mufite Minisitiri w’Umutekano mu gihugu kandi noneho abakora amarorerwa bayakora ku bantu bashinzwe umutekano. None se ni ikiraka mushaka kuduha? Nta kintu twabuze muri iyi Leta, ariko iduha byinshi tukabyiyima kubera ubumenyi buke. Bavuga gahunda za Leta ukumva nyine zitakureba…"

Yasabye Abayisilamu mu Rwanda kwirinda kumvira Abarabu babashuka bakabinjizamo imyumvire y’ubutagondwa kuko ibyo bababwira bishoboka mu bihugu byabo ariko bitakunda mu Rwanda kuko rwihariye ku mateka.

Ati "Iminsi iri imbere bakubwira bati nubwo uri umugore ugomba kujya kureba muganga bati ‘Uramureba ute se kandi ari umugabo?’ Murumva ni ukuvangavanga ibintu ariko Leta yo yarabiduhaye... Kagame afite igihugu gifite ubutunzi nk’ubwo mu bihugu by’Abarabu, umukene muri twebwe yaba afite velo-moteri kuko arakandakanda ahashoboka tukagira icyo tubona."

Ubunyarwanda burenze Idini

Maj. Gen Mubarak yibukije abayisilamu ko mbere yo kuba abayoboke b’idini ari Abanyarwanda bityo bakwiye guharanira kwiteza imbere aho kumvira ababashuka bagamije kubambura ubuzima.

Yagize ati "Nimwigisha mujye mwigisha ku bintu bifatika; Mushake ubumenyi nibiba ngombwa mugere mu Bushinwa. Tugize imana tukagira ubumenyi Djihad nziza yaba kurwanya ubukene… Mutekereze icyatuma igihugu cyacu kiba cyiza hanyuma ibyo kujya hanze umunsi abanyamahanga bashatse ubufasha bazaca mu nzira zemezwe tubafashe nk’uko dutabara aho dukenewe hose ku Isi."

JPEG - 238.4 kb
Abayisilamu biyemeje kudakingira ikibaba abashaka kubaharabika

Abaketsweho iterabwoba bakanguye inzego zose

Hashize iminsi hakorwa ubukangurambaga ku guhashya iterabwoba kubera ingero z’abo ryagaragayeho mu Rwanda bamwe bakahasiga ubuzima bagerageza gutoroka inzego z’umutekano.

Ibikorwa by’Iterabwoba byatangiye kuvugwa ku musirikare witwa Rashid warashe bagenzi be bane mu bari kumwe mu butumwa bw’amahoro bwa Loni muri Centrafrique. Nyuma hagiye haboneka izindi ngero ari na byo byakanguye inzego z’ubuyobozi mu guhangana n’iki kibazo bagereranya n’icyorezo mu rubyiruko.

Umuyobozi w’Ingabo mu ntara y’Iburengerazuba Gen. Maj. Alexis Kagame na we yibukije ko u Rwanda rufite abanzi barimo FDLR ndetse ko umutekano ureba buri wese ubwo yakanguriraga abatuye i Rubavu kwishora mu bikorwa by’iterabwoba mu minsi ishize.

Usibye Abayisilamu hanagaragajwe nabamwe mu bayoboke b’amadini ya Gikirisitu bitwikira amajoro bakajya gusengera ahantu hatazwi bagahanura iterabwoba nk’intambara nibindi.

JPEG - 74.2 kb
Gen Maj Alexis Kagame uhagaze Guv Mukandasira (ibumoso),basaba abaturage kurwanya icyorezo cy’ubutagondwa (Foto Iyaremye Y)

Umwe mu bapasiteri bo mu karer eka Rubavu yagize ati "Mu matorero yacu naho hari abahanura ibinyoma birazwi, ariko twarabihagurukiye. Twebwe iyo duhuye n’ibintu nk’ibyo tutazi ibyo umuntu agiye gukora n’aho agiye kubikorera, ntabwo tumufata nk’umuyobozi wacu."

Intara y’Uburengerazuba yahagurukiye iki kibazo by’umwihariko cyane ko ingero nyinshi z’abagaragayeho ibikorwa by’iterabwoba bakomoka cyangwa babikoreye muri yo.

Guverineri w’Intara y’Iburengerazuba Mukandasira Caritas aherutse kwibutsa abaturage ko bagomba kumenya ikibazo gihari bakakigira icyabo buri wese akaba ijisho rya mugenzi we.

Abayisilamu na bo biyemeje kugira uruhare mu guhangana n’abaharabika idini n’imyemerere yabo, ubusanzwe iharanira amahoro n’imibereho myiza ku Isi.

JPEG - 76.7 kb
Bamwe mu bayisiramu batangiye gutunga urutoki abo bakeka ko bakorana n’imitwe y’iterabwoba (Foto Iyaremye Y)

Soma indi nkuru bifitanye isano

 

Comments

 
 
Min. Kanimba  yasabye umunyamabanga wa EAC gushyira ingufu mu mavugurura
Min. Kanimba yasabye umunyamabanga wa EAC gushyira ingufu mu mavugurura

Minisitiri w’Ubucuruzi, Inganda n’Ibikorwa by’Umuryango w’Afurika y’Uburasirazuba, François Kanimba, yakiriye mu biro bye Umunyamabanga Mukuru w’Umuryango wa Afurika y’Uburasirazuba, EAC, Amb. Libérat (...)

Abahoze ari abajura muri Nyabugogo bashinze ihuriro
Abahoze ari abajura muri Nyabugogo bashinze ihuriro

Urubyiruko rugera ku 157 rwahoze rukora ibikorwa by’ubujura bitandukanye mu gace ka Nyabugogo mu Mujyi wa Kigali rwiyemeje kubireka, ubu rukaba rwarashyizeho ihuriro ryabo ryitwa” Hinduka uhindure (...)

Polisi y’u Rwanda yafatiye ibiyobyabwenge na magendu mu mikwabu
Polisi y’u Rwanda yafatiye ibiyobyabwenge na magendu mu mikwabu

Imikwabu Polisi y’u Rwanda yakoze mu mpera z’icyumweru gishize mu turere twa Huye, Kirehe, Gicumbi na Nyanza yayifatiyemo ibiyobyabwenge by’ubwoko butandukanye na magendu. Uwitwa Ntirenganya Jean (...)

Abatwara imodoka zijyana  abana ku ishuri  baravugwaho kubatendeka
Abatwara imodoka zijyana abana ku ishuri baravugwaho kubatendeka

Ishami rya Polisi y’u Rwanda rishinzwe umutekano wo mu muhanda rirasaba abatwara ibinyabiziga bijyana cyangwa bivana abana b’abanyeshuri ku mashuri yabo, kubahiriza amategeko y’umuhanda kuko hari (...)

U Rwanda na Ecosse byiyemeje ubufatanye mu kurwanya ihohoterwa rishingiye ku gitsina
U Rwanda na Ecosse byiyemeje ubufatanye mu kurwanya ihohoterwa rishingiye ku gitsina

Abapolisi babiri bo ku rwego rwa Ofisiye bakuru bo mu gihugu cya Ecosse bari kumwe na Ambasaderi w’u Bwongereza mu Rwanda, William Gelling, ku wa mbere tariki ya 6 Gashyantare basuye Polisi y’u (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.