Advertisement
 
 
 
 
 
 
 
 

Amakuru | Mu Rwanda

Abaturiye Urugomero rwa Ntaruka bamaze imyaka 57 nta mashanyarazi   

  Yanditswe na NGABOYABAHIZI PROTAIS
 September 2016

 
 

Bamwe mu batuye mu tugari twa Nyangwe, Nkumba, Rwasa na Kidakama duturiye Urugomero rwa Ntaruka mu murenge wa Gahunga, Akarere ka Burera bahangayikishijwe no kuba bagicana agatadowa kandi baturiye isoko y’amashanyarazi acanira igihugu yashinzwe guhera mu mwaka 1959.

Nyuma y’imyaka 57 babona amashanyarazi abaca hejuru, barasaba ubuyobozi kubavuganira kuko n’abadaturiye ingomero benshi bamaze kugezwaho umuriro w’amashanyarazi mu gihugu.

Bavuga ko kuba nta mashanyarazi bigira ingaruka ku mibereho yabo kuko n’abayobozi babo bakora ingendo ndende bagiye gushaka umuriro wa mudasobwa na telefoni bigendanwa mu tundi tugari umuriro w’amashanyarazi wagezemo.

Umwe mu baturage bo mu kagari ka Rwasa umurenge wa Gahunga yagize ati “Tubona amatara yaka ahandi bikatubera ibitangaza; insinga zitunyura hejuru, yemwe n’akagari kacu nta muriro kagira. Njya mbona gitifu wacu nawe ajya gucaginga mu Rugarama no ku murenge wa Gahunga”.

JPEG - 77.4 kb
Abayobozi b’akagari nabo ngo bajye gusharija ahandi (Foto Ngaboyabahizi P.)

Akomeza avuga ko bibabaje kubona umuyobozi akorera mu icuraburindi, umuriro unyura hejuru y’ibiro bye.

Ati “Twatakambiye ubuyobozi bwacu ngo budukorere ubuvugizi, imyaka ibaye itatu twishyize hamwe dukusanya amafaranga ngo twizanire umuriro none aheze kuri konti y’ishyirahamwe ryacu. Amapoto asaziye aho twayarunze kuko baratubwiye ngo ntiyujuje ubuziranenge, urumva ni igihombo.”

Umuyobozi w’Umurenge wa Gahunga Theogene Nzeyimana ahamya ko ari ikibazo guturana n’urugomero ntubone amashanyarazi kandi akunyura hejuru. Yashimangiye ko ubuyobozi bw’umurenge n’ubw’akarere bukomeje gukora ubuvugizi mu kigo cy’igihugu gishinzwe ingufu (REG) kikaba cyaramaze kugirana amasezerano n’Akarere yo kugeza amashanyarazi kuri aba baturage.

Ati “Barangije no gupima, ubu ndizera ko mu minsi iri imbere amashanyarazi araba amaze kugera kuri aba baturage, uretse ko ntahamya neza igihe kuko ntabwo namenya nanone gahunda ya REG.”

JPEG - 100.1 kb
Bamaze imyaka 57 baturanye n’urugomero ariko bake ni bo bafite amashanyarazi

Kimenyi Vedaste Umuyobozi ushinzwe kubakisha imiyoboro y’amashanyarazi ku rwego rw’igihugu muri REG yemeje ko bafitanye amasezerano n’Akarere ka Burera ndetse n’umurenge wa Gahunga urimo n’ubwo utashyizwe mu hihutirwa hatangiye gukorwa.

Yavuze ko aho Akarere kabasabye kwihutisha hatarimo Umurenge wa Gahunga kuko babanje kubaka ahategerejwe kaminuza mu murenge wa Butaro.

Kimenyi ati “Muri Burera tuhafite amatsinda abiri yatangiye kubaka, ahandi tuzatangira kuhubaka vuba aha… Ndibuka ko hafi n’urugomero na ho hari aho tuzakora ariko amazina ni yo ntabasha guhuza neza.”

Yashimangiye ko imirenge iri mu masezerano ari Rusarabuye aho amashanyarazi azagezwa ku kagari ka Ruhanga no ku mashuri abiri, Umurenge wa Rwerere kuyageza kuri Site ya Tangata na Burindwa, uwa Gahunga akagezwa ahiswe Horana Umucyo na Rugezi, uwa Nemba akagezwa mu Mudugudu wa Muhororo naho Umurenge wa Cyeru akagezwa Nyaruyove na Butaro.

 

Comments

 
 
Antoine Hey yasabwe guhesha Amavubi itike ya CAN 2019
Antoine Hey yasabwe guhesha Amavubi itike ya CAN 2019

Umudage Antoine Hey yasinye amasezerano yo gutoza ikipe y’igihugu y’u Rwanda ejo hashize tariki 21 Werurwe 2017 ; yahawe amasezerano y’umwaka umwe ushobora kongerwa igihe yitwaye neza. Perezida (...)

Ingabo z’u Rwanda zirahugurwa ku kurinda ikoreshwa ry’abana mu gisirikare
Ingabo z’u Rwanda zirahugurwa ku kurinda ikoreshwa ry’abana mu gisirikare

Abasirikare 30 batangiye amahugurwa azamara ibyumweru bibiri, aho bazahabwa ubumenyi buzabafasha kugira uruhare mu gukumira iyinjizwa n’ikoreshwa ry’abana mu gisirikare. Ni amahugurwa (...)

 Arkiepiskopi wo muri Pologne yagizwe intumwa ya Papa mu Rwanda
Arkiepiskopi wo muri Pologne yagizwe intumwa ya Papa mu Rwanda

Arkiepiskopi wa diyosezi ya Lauriaco muri Pologne , Musenyeri Andrzej Jowzowicz, yagizwe intumwa y’umushumba wa Kiliziya Gatolika, Papa Francis mu Rwanda kuri uyu wa 18 Werurwe 2017. Jozwowicz (...)

U Buyapani bwahaye UNICEF Rwanda amadolari 636 000  yo kwita ku bana b’Abarundi
U Buyapani bwahaye UNICEF Rwanda amadolari 636 000 yo kwita ku bana b’Abarundi

Guverinoma y’u Buyapani yahaye UNICEF Rwanda amadolari ya Amerika 636 000 yo gufasha abana b’impunzi z’Abarundi bari mu Rwanda mu nkambi ya Mahama kugira ngo bafashwe mu myigire n’ubuzima rusange. (...)

REB ikomeje kuvumbura amakosa mu micungire y’abarimu hirya no hino mu gihugu
REB ikomeje kuvumbura amakosa mu micungire y’abarimu hirya no hino mu gihugu

Ubuyobozi bw’Ikigo cy’Igihugu gishinzwe Uburezi, buratangaza ko bukomeje kubona amakosa mu micungire y’abarimu mu turere dutandukanye tw’u Rwanda. Ni nyuma y’uko mu karere ka Nyagatare hagaragaye (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.