2017-06-24 09:49:51 clouds 27o High | Kigali Rwanda

Dukurikire:
 
 

Abanyarwanda bose nibaba intore igihugu kizabasha kwigira - Rucagu

Yanditswe na IMVAHO NSHYA

Kuya 2017-06-11 13:29:04

 
Share on:
 
Yasuwe:437
 
Yavuzweho:200
 
10
 
10

Umutahira w’Intore Rucagu Boniface avuga ko ubwo Abanyarwanda bose bazaba baraciye mu itorero ry’igihugu, baramaze gusobanukirwa akamaro ko kuba Intore bazihesha agaciro igihugu kibonereho kwigira mu ruhando rw’amahanga.

Mu kiganiro n’Imvaho Nshya, mu ngingo zirenga icumi, Rucagu yagarutse ku musaruro u Rwanda ruzagira mu gihe Abanyarwanda bose mu bikorwa no mu ngiro bazaba barabaye intore.

Avuga ko Leta y’ u Rwanda izagira abaturage bazima kandi bakunda igihugu bityo biganishe ku iterambere igihugu cyifuza.

Ati “Ubumwe bw’Abanyarwanda bazaba barabugize intego, bazumva ko buzajya bubakemurira ibibazo mu buzima bwa buri munsi. Kurandura ingengabitekerezo ya Jenoside, iyi yatumaga tutibonamo ubunyarwanda, bizaba bigeze ahashimishije.”

“ Umuntu umubonamo ubunyarwanda nk’ubwo akubonamo; njye nawe tugafatanya kuririmba ubunyarwanda, twahurira no mu mahanga tukaramukanya nk’abahuje igihugu, umuco n’icyerekezo tukuzuzanya aho kugira ngo duhure ngushakire abakugirira nabi cyangwa nawe ubinkorere kubera ko tutari twagira ubumwe n’ubwiyunge.”

JPEG - 328.6 kb
Rucagu Boniface, Umutahira Mukuru w’Intore (Foto James R)

Rucagu yakomeje agaragaza ko igihe Abanyarwanda bazaba biyumvamo umuco w’ubutore, Leta izagira abaturage bafite imico myiza yo kubaha no kubahana, umukuru akubaha umuto n’umuto akubaha umukuru.

Leta izaba ifite abaturage bumva bagomba guharanira icyiza aho guharanira ikibi, bumva bagomba guharanira ishema ry’u Rwanda mu ruhando rw’amahanga.

Ati “Ahasigaye bazasigara bumva bagomba gukomeza guhesha agaciro igihugu cyabo n’abagituye, baharanire kwigira, kugira indangagaciro na kirazira, ukagira n’umuco wo kwigira biguheshe agaciro ubwawe.”

Tariki ya 23 Kamena itorero ry’igihugu rizahuriza i Kigali imitwe y’Intore igera kuri 21, mu gitaramo cy’ibigwi n’imihigo y’imitwe y’Intore zivuga uko zesheje imihigo zahize zijya ku rugerero.

Iki gitaramo kizakurikirwa na gahunda yo kwegereza itorero ku gicumbi cyaryo, ku midugudu, Abanyarwanda bataratozwa bakazajya batorezwa aho bavuka.

Itorero ry’Igihugu rifite intego yo kubaka Umunyarwanda ukunda igihugu, ukunda umurimo, ufite indangagaciro na kirazira z’umuco Nyarwanda n’umuco w’ubutore.

Rucagu asoza agaragaza ko gahunda yo gutoza Abanyarwanda amahame y’imico myiza Leta y’u Rwanda yagaruye kuva mu 2007, izatuma bose bageraho bakamenya amahame y’intore, indangagaciro nyazo, imigambi y’igihugu n’uburyo bwo kuyigeraho.

MUTUNGIREHE SAMUEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE