2017-10-17 06:58:11 clouds 27o High | Kigali Rwanda

Dukurikire:
 
 

Abanyarwanda barasabwa guteza imbere ururimi kavukire

Yanditswe na IMVAHO NSHYA

Kuya 2017-03-25 07:28:04

 
Share on:
 
Yasuwe:421
 
Yavuzweho:200
 
10
 
10

Abanyarwanda barasabwa kurebera hamwe uburyo hashyirwa ingufu mu guteza imbere Ikinyarwanda mu burezi, ni mu gihe hizihizwa umunsi mpuzamahanga w’ururimi kavukire tariki 24 Werurwe 2017.

Umuyobozi mu Kigo cy’Igihugu gishinzwe Uburezi (REB) ushinzwe integanyanyigisho n’imfashanyigisho, Dr Musabe Joyce, yasobanuye ko ururimi kavukire rwatezwa imbere biciye mu nzira nyinshi.

Avuga ko mu bufatanye na Minisiteri y’Uburezi no kugira ngo Ikinyarwanda cyitabweho kandi gihabwe umwanya ukomeye mu mashuri, bashyize ingufu nyinshi mu guteza imbere umuco wo kwandika udutabo no kongera amasomero.

Yagize ati “Tugomba gushyira ingufu nyinshi mu guteza imbere ururimi kavukire, guhera mu mashuri, abarezi, ababyeyi n’abantu bose bashoboye kwandika, twabahaye umwanya wo kwandika, twongera n’amasomero kugira ngo bahindure imyumvire babone uko baha abana umusingi wo hasi.

JPEG - 218.2 kb
Umuyobozi w’Inteko Nyarwanda y’Ururimi n’Umuco, Niyomugabo Cyprien

Prof. Niyomugabo Cyprien, Intebe y’inteko Nyarwanda y’Umuco n’Ururimi, yavuze ko uruhare rw’umuryango mu kwigisha no kunoza Ikinyarwanda rukenewe mu kugira ngo abana bigishwa mu mashuri babashe kumenya n’izindi ndimi hamwe n’ubundi bumenyi muri rusange.

Yagize ati “Byagaragaye ko iyo umuntu yize ururimi rwe kavukire, ubumenyi bumworohera, kandi ngo utigishije umwana Ikinyarwanda kinoze aba amubujije byinshi, uvuga Ikinyarwanda kinoze, avuga n’izindi ndimi neza. Icy’ibanze ni ukwemera ko kugira ngo uzamenye ubumenyi, ugomba kubanza kwiga ururimi kavukire, kugira ngo ugire ubwenge buhamye.”

Bamwe mu barezi bavuga ko hakiri ikibazo mu myigishirize y’Ikinyarwanda, aho kigishwa n’abatakizi bigisha nko mu gihe cy’ubukoloni.

Umurezi witwa Karamuka Edouard yagize ati “Birambabaza kubona umwana yiga amateka y’igihugu cye mu zindi ndimi, uyamwigisha akamwigisha arwana n’amagambo na we adasobanukiwe. Ubwo uwo mwana azamenya amateka gute?”

Ikibazo cy’imyigishirize mu Kinyarwanda mu burezi cyagarutsweho mu nama y’Igihugu y’Umushyikirano ya 13.

Umwanzuro wafatiwe muri iyi nama ugira uti “Gushyiraho ingamba zo guteza imbere ururimi rw’Ikinyarwanda n’indangagaciro z’umuco Nyarwanda mu mashuri yose, bigakomeza kwigishwa no mu mashuri yisumbuye, amakuru na za kaminuza.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE