2017-10-17 06:58:11 clouds 27o High | Kigali Rwanda

Dukurikire:
 
 

Abanyamakuru basabwe gukunda u Rwanda byaba ngombwa bakanarupfira

Yanditswe na IMVAHO NSHYA

Kuya 2017-04-26 05:59:07

 
Share on:
 
Yasuwe:309
 
Yavuzweho:200
 
10
 
10

Minisitiri w’Ubutegetsi bw’Igihugu Kaboneka Francis, yasabye abanyamakuru kurangwa n’umuco wo gukunda igihugu, buri wese agaharanira ko u Rwanda ruvugwa neza.

Ubu butumwa Minisitiri Kaboneka yabugarutseho ejo hashize ku wa 25 Mata 2017, mu muhango wo gusoza icyiciro cya kabiri cy’Itorero ry’abanyamakuru, mu kigo cy’imiyoborere myiza cya Nkumba mu karere ka Burera.

Ubutumwa abanyamakuru bahawe bwibanze cyane ku muco wo gukunda igihugu, bagaragarizwa ko ari wo muco wahoze uranga Abanyarwanda kuva kera, ndetse ubafasha kwagura igihugu.

Yakomeje agaragaza ko uyu muco mwiza w’Abanyarwanda waje gucibwa n’abakoloni, umuco wo gukunda igihugu usimbuzwa umuco w’inda nini, ubumwe bw’Abanyarwanda burasenyuka, himikwa amacakubiri ari nayo yabyaye Jenoside yakorewe Abatutsi mu 1994.

Ahereye ku mateka y’igihugu, Minisitiri w’Ubutegetsi bw’Igihugu Kaboneka Francis, yasabye abanyamakuru kurangwa n’umuco wo gukunda Igihugu, uvuga nabi u Rwanda bakamuvuguruza bakoresheje inkuru batangaza, zigaragaza ukuri kw’ibyiza u Rwanda rumaze kugeraho.

Yagize ati “Nimugire umuco wo gukunda igihugu, kandi aho muri hose muharanire ko nta muntu n’umwe uvuga nabi igihugu cyawe, byanashoboka ukaba wabipfira, gukunda Igihugu kandi ntibigira umupaka”.

Uretse n’umuco wo gukunda igihugu ku buryo bwihariye, Minisitiri Kaboneka yanasabye aba banyamakuru gusigasira umuco nyarwanda muri rusange, kuko ari wo pfundo rihuje Abanyarwanda, abibutsa ko guta umuco ari ukwihakana Igihugu.

Yagize ati “Iyo umuco wacuye, iyo wacuramye, uracika, ubwo umuryango nawo uba wacitse. Guta umuco rero ni ukwihakana Igihugu cyawe, nimuharanire ko umuco w’Igihugu cyanyu ari cyo u Rwanda utazimira mukazima.”

Abanyamakuru bitabiriye iki cyiciro cya kabiri cy’Itorero Impamyabigwi, bahawe amasomo ku birebana n’indangagaciro z’umuco nyarwanda na kirazira, amateka y’igihugu n’itangazamakuru by’umwihariko, imikorongiro, imyitozo ngororamubiri, n’andi masomo abatoza kurushaho gukunda Igihugu ku rwego rwo kuba banagipfira igihe bibaye ngombwa.

Tuyishime Jean de Dieu, umunyamakuru wa RBA witabiriye iri torero, yabwiye Imvaho Nshya ko bahakuye impamba ihagije izabafasha gukomeza kunoza umurimo wabo, kandi babijyanisha n’indangagaciro zo gukunda Igihugu.

Yagize ati “Muri iri torero tuhakuye amasomo menshi cyane, ndetse ni impamba ikomeye mu mwuga wacu, kuko burya hari n’ubwo hari bamwe mu banyamakuru bakora uyu mwuga w’itangazamakuru ariko batazi neza amateka y’Itorero n’Igihugu cyacu. Aha rero twongeye gushyirwamo ingufu, ariko na none nsanze umuco wo gukunda igihugu ari wo utuma kigera ku iterambere kandi kikubahwa.”

Intore z’Impamyabigwi muri rusange ziyemeje guharanira kugaragaza no gusigasira ibyiza u Rwanda rumaze kugeraho, abagambiriye kwanduza isura nziza y’Igihugu bakaburizwamo.

Iri torero ryatangiye ku wa 16 Mata 2017 risozwa kuri uyu wa Gatatu tariki ya 26 Mata 2017.Ryitabiriwe n’abanyamakuru 152, barimo abagabo 118 n’abagore 34.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE