2017-07-23 11:30:24 clouds 27o High | Kigali Rwanda

Dukurikire:
 
 

Abagizwe incike na Jenoside bakwiye kubaho neza kuko badufite-Jeannette Kagame

Yanditswe na IMVAHO NSHYA

Kuya 2017-06-30 05:03:53

 
Share on:
 
Yasuwe:203
 
Yavuzweho:200
 
10
 
10

Madamu Jeannette Kagame, yasabye abanyamuryango ba Unity Club ndetse n’abafatanyabikorwa b’uyu muryango, gukomeza guharanira ko ababyeyi bagizwe inshike na Jenoside yakorewe Abatutsi mu 1994, bakomeza kubaho neza.

Ubu butumwa yabugarutseho ejo hashize ku wa Kane tariki ya 29 Kamena 2017, mu muhango wo gutaha ku mugaragaro inzu y’icumbi yiswe Impinganzima, yatujwemo ababyeyi 100 bagizwe inshike na Jenoside yakorewe Abatutsi, mu karere ka Huye.

Madamu Jeannette Kagame, umuyobozi wa Unity Club yubakiye aba babyeyi iyi nzu, yavuze ko yishimira ubutwari aba babyeyi bahawe izina ry’Intwaza bagaragaza bwo kwihangana mu bubabare bagize ku mutima no ku mubiri, abizeza ko bazakomeza kwitabwaho, imibereho yabo ikarushaho kuba myiza.

Yagize ati “Babyeyi, ndabashimira uburyo muri intwari, kwihanganira ububabare mwagize, haba ku mubiri ndetse no ku mutima, hari umuryango mutatakaje ari wo gihugu cyacu, mukomeze mube Intwaza.

JPEG - 119.8 kb
Madamu Jeannette Kagame yatashye ku mugaragaro inzu y’icumbi yiswe Impinganzima, yatujwemo ababyeyi 100 bagizwe incike na Jenoside yakorewe Abatutsi mu 1994

"Banyamuryango ba Unity Club ndetse namwe bafatanyabikorwa bacu, ndabasaba ko mukomeza guharanira ko aba babyeyi babaho neza kandi bagakomeza kwitabwaho uko bikwiye, kuko baradufite.”

Aba babyeyi bagizwe incike na Jenoside bahawe izina ry’Intwaza, batangaza ko bishimira kuba bitabwaho, by’umwihariko kuba baregeranyijwe bakaba hamwe aho bashobora kuganira bakava mu bwigunge.

Mukakinani Cesarie, umwe muri aba babyeyi batujwe muri izi nzu bise Impinganzima, afite imyaka 100, yagize ati “Turakomeza gushimira ubuyobozi bwacu gutekereza kudushyira hamwe kuko byadukuye mu bwigunge.”

Iri cumbi ryuzuye ritwaye amafaranga asaga miliyoni 406, ryahawe izina ry’Impinganzima yo mu karere ka Huye, rikaba rigenewe ababyeyi b’Intwaza bagera ku 100, ariko kuri ubu abamaze gutuzwamo bagera kuri 90.

Aba babyeyi kandi banahawe umushinga w’ubworozi bw’inkoko zitera amagi zigera ku 1000, zizabafasha mu mirire myiza ndetse no kubona amafaranga bakwifashisha mu kugura ibindi bakenera.

Biteganyijwe ko amacumbi nk’aya yiswe Impinganzima azanubakwa mu turere twa Kamonyi, Rulindo na Kayonza.

UMUTONI BEATHA

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE