2017-06-25 09:02:18 clouds 27o High | Kigali Rwanda

Dukurikire:
 
 

Abafite ubumuga bukomatanye bafite uburenganzira bwo gutora

Yanditswe na IMVAHO NSHYA

Kuya 2017-06-17 14:27:28

 
Share on:
 
Yasuwe:69
 
Yavuzweho:200
 
10
 
10

Umunyamabanga Nshingwabikorwa w’Ihuriro ry’Abafite ubumuga bwo kutumva no kutavuga mu Rwanda, Munana Samuel, atangaza ko abafite ubumuga bukomatanye (kutumva, kutabona no kutavuga) bafite uburenganzira bwo gutora nk’abandi Banyarwanda.

Ibi byatangajwe mu gihe u Rwanda rwitegura amatora y’Umukuru w’Igihugu, taliki ya 03 n’iya 04 Kanama 2017.

Munana Samuel ashimangira ko abafite ubumuga bukomatanye bafite uburenganzira bwo gutora, agira ati: “Turi kwitegura amatora ya Perezida wa Repubulika mu gihe kiri imbere ariko abafite ubumuga bwo kutumva, kutavuga no kutabona ari bwo bita ko bukomatanye, ntibazi ko ayo matora ariho, kandi ari uburenganzira bwa buri Munyarwanda wese gutora.

“Abafite ubwo bumuga, nta we urabegera ngo abamenyeshe ibijyanye n’amatora aho ageze, uko azagenda niba se hari abakandida bamaze gutangazwa n’ibindi byerekeranye nayo”.

Atangaza ko itumanaho ku bafite ubumuga bukomatanye ari ryo zingiro, ikaba ari nawo mushyikirano w’abafite ubwo bumuga.

Munana Samuel akomeza avuga ko kuvuga ubumuga hadakwiye kumvikana ubw’ingingo gusa kuko ari bwo abantu bihutira guha ubufasha kuko n’abafite ubukomatanye bakeneye gufashwa kubera ko nabo bafite uruhare mu iterambere ry’igihugu.

JPEG - 192.1 kb
Aba ni bamwe mu bafite n’ubumuga bafashanya gusobanukirwa níbyavugiwe mu kiganiro RUB yagiranye n’abanyamakuru

Abisobanura muri aya magambo: “U Rwanda ntirwatera imbere mu buryo bwuzuye hari abagifite ibibazo, akaba ari yo mpamvu dusaba ko hashyirwa imbaraga mu kubitaho”.

Uwibambe Lozata ni umwe mu bafite mu muryango we, umuntu ufite ubumuga bwo kutumva no kutavuga, avuga ko nk’uko yiteguye kwitabira amatora y’Umukuru w’Igihugu ari nako yamaze gutegura uyu ufite ubumuga, nyuma yo gusobanukirwa neza ko gutora ari inshingano za buri munyarwanda nk’uko komisiyo y’amatora ihora ibikangurira abantu.

Umukozi wa komisiyo y’igihugu y’amatora (NEC) ushinzwe guhuza komisiyo n’izindi nzego Moise Bokasa, avuga ko atari ikibazo kireba komisiyo yonyine, ahubwo kireba u Rwanda n’Abanyarwanda muri rusange, kuko abo bafite ubumuga ari Abanyarwanda nk’abandi nabo bafite uburenganzira bwo kuba batora no kumenya uburenganzira bwabo mu matora.

Agira ati: “Turakorana na komisiyo y’igihugu y’abafite ubumuga (NCPD) mu birebana n’imyiteguro no kumenya amabwiriza agenga amatora kugira ngo NEC isobanukirwe kurushaho ibibazo byihariye abafite ubumuga bafite ndetse n’ibyo yakwitaho mu kuyategura”.

Bokasa avuga ko NEC yagiye ikorana amahugurwa menshi y’ibyiciro byihariye n’inzego zihagarariye urubyiruko, inzego z’abagore hamwe n’inzego z’abafite ubumuga, bikagaragara ko NEC na NCPD bamaze kubonera umuti ikibazo cy’abafite ubumuga bwo kutabona kuko bo, bashyiriweho uburyo bwo kuzatora bakoresheje inyandiko yabo basomesha intoki (braille) ku buryo abashobora kuzisoma buzakoreshwa.

Bokasa agaruka kubataramenya gukoresha iyo nyandiko, avuga ko bazifashisha uburyo bari basanganywe mu matora yatambutse, ari bwo bwo gutora bifashishije abana bari hagati y’imyaka 14 na 18 akaba ari bo bashobora kubaherekeza bakabatorera.

Anagaruka ku bafite ubumuga bukomatanye ko, niba adashobora kubona, akaba atumva, ko NEC yatangiye kwifashisha abazi gukoresha ururimi rw’amarenga mu kwigisha kandi bikazanagaragara mu biganiro NEC izajya itanga bizajya bitambuka ku mateleviziyo.

SEZIBERA ANSELME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE