Advertisement
 
 
 
 
 
 
 
 

Amakuru | Mu Rwanda

2016: Abanyeshuri 10 bamaze guhitanwa n’impanuka muri Kigali   

  Yanditswe na MUGISHA BENIGNE
 June 2016

 
 

Polisi y’igihugu itangaza ko mu mezi atanu ashize abanyeshuri 10 bahitanwe n’impanuka naho 53 bagakomeretswa na zo, bamwe muri bo zibasigira ubumuga.

Ibi ni ibyatangajwe na SP Ndushabandi Jean Marie Vianney, Umuvugizi w’ishami rya Polisi ishinzwe umutekano mu muhanda, ubwo yagaragarizaga abari bitabiriye inama y’uburezi yaguye y’Umujyi wa Kigali uko umutekano w’abana bajya banava ku mashuri uhagaze n’ingamba zo kuwushimangira.

Ati “ Mu bana 10 bahitanwe n’impanuka, bamwe bagonzwe n’amagare, abandi moto, abandi bagongwa n’imodoka bava cyangwa bajya kwiga.”

Aha SP Ndushabandi yanenze ababyeyi bafata abana babo bakabategera moto imwe ari nka 3 kandi bazi neza ingaruka bishobora kubagiraho.

Avuga rero ko hari impanuka zatewe n’umubare munini w’abana babaga bari kuri moto imwe, bakora impanuka bagapfa bose cyangwa bagakomereka.

Yongeye kunenga n’abarezi batita ku mutekano w’abana mu mihanda, bigasa nk’aho bapfana ishuri gusa, byagera hanze yaryo ntibabiteho.

Ati “Hari ubwo abana basohoka mu mashuri ugasanga baragenda nabi mu mihanda kandi abarezi babireba, ntibabacyahe cyangwa ngo babafashe kwambuka muri iyo mihanda, biba bisa nk’aho bapfana ishuri gusa nyuma ya ryo bigasa nk’aho umurimo wabo warangiye.”

Uyu muyobozi yagarutse ku mpanuka zabaye muri aya mezi atanu ashize, azishyira mu bice 2, impanuka z’abanyeshuri bafite imodoka zibageza ku mashuri n’impanuka z’abana bajya kwiga n’amaguru.

Abajya ku mashuri mu modoka bazajya baherekezwa n’umuntu mukuru

SP Ndushabandi yafashe umwanya munini asaba ababyeyi bafite imodoka zibatwarira abana ku mashuri guhindura uburyo byakorwagamo, ashingira cyane ku mpanuka y’imodoka yari itwaye abanyeshuri ba Parent’School, aho avuga ko yatewe n’umuvuduko mwinshi, kuko hari hasigaye iminota mike ngo binjire kandi umushoboferi agifite abandi agomba kujya gufata.

JPEG - 210 kb
Impanuka zakunze kwibasira abanyeshuri bo muri Kigali muri uyu mwaka

Yasabye ababyeyi gushaka umuntu mukuru uzajya agendana n’abanyeshuri muri izo modoka, yaba umurezi cyangwa umubyeyi, bityo akagenda agenzura uko umushoferi atwara mu muhanda ndetse akanambutsa abana mu gihe ari ngombwa.

Ati “Ni ngombwa ko izi modoka zitwara abana zigendamo umuntu mukuru ugomba kureberera aba bana, akagenzura uko umushoferi agenda mu muhanda no kureba aho asiga abana niba batahahurira n’umutekano muke.”

Yanasabye abarezi gushishikariza abana kugenda neza mu muhanda, ndetse ku bigo bituranye n’umuhanda hagashyirwaho umuntu wambutsa abana n’aho bambukira hateganyirijwe abanyamaguru.

Ndushabandi avuga ko mu mabwiriza mashya yo gutwara abana mu mashuri, harimo ko ababyeyi bagomba gushaka umushoferi bazi neza imico n’imyitwarire ye, bakagirana amasezerano yanditse ndetse n’ubuyobozi bw’ikigo bukabigiramo uruhare.

Imodoka ibatwara igomba kuba yarapimiwe ubuziranenge

Polisi ivuga ko imodoka itwara abana igomba kuba yarapimwe ubuziranenge bw’ikinyabiziga (Controle technique), ifite uruhushyan rwo gutwara abanyeshuri (Autorisation de transport) n’amasezerano y’ababyeyi ndetse n’ubuyobozi bw’ishuri bukayashyiraho umukono.

Ndushabandi ati “Abana ntibagomba gutwarwa n’imodoka zishaje zakuwe mu muhanda, bagomba gutwarwa n’imodoka zujuje ubuzirange kandi zigomba kuba zifite ibara ry’umuhondo.”

Yongeyeho ko imodoka nini ari zo zemerewe gutwara abanyeshuri mu Mujyi wa Kigali, kandi hagashyirwamo umubare utarenze ubushobozi bwayo.

Ati “ Hari nk’imodoka yagombye kujyamo abana 25 ariko ugasanga umushoferi atwayemo abana 50, ibyo ntibikwiye ni amakosa rwose, nyamuneka ababyeyi n’abarezi mujye mukurikirana mumenye uko abana batwarwa muri izo modoka.”

 

Comments

 
 
Kaminuza ya Kigali yahaye impamyabumenyi abanyeshuri 673
Kaminuza ya Kigali yahaye impamyabumenyi abanyeshuri 673

Ku nshuro ya kabiri, Kaminuza ya Kigali (University of Kigali) yashyikirije impamyabumenyi abanyeshuri bayo 673 barangije icyiciro cya kabiri cya kaminuza mu mashami atatu n’abo mu bindi byiciro (...)

Imishinga y’ikoranabuhanga igamije iterambere ry’abagore yahembwe
Imishinga y’ikoranabuhanga igamije iterambere ry’abagore yahembwe

Umuryango DOT Rwanda wahembye imishinga y’ikoranabuhanga rigamije guteza imbere imibereho y’abagore, muri gahunda yo kwizihiza umunsi mpuzamahanga w’umugore, wizihizwa tariki ya 8 Werurwe buri (...)

Umukobwa aterwa  inda agacibwa, umuhungu wayiteye agashimwa - Min. Nyirasafari
Umukobwa aterwa inda agacibwa, umuhungu wayiteye agashimwa - Min. Nyirasafari

Minisitiri w’Uburinganire n’Iterambere ry’Umuryango, Nyirasafari Esperance, arasaba ko imyumvire y’uko umukobwa aterwa inda akagirwa igicibwa mu muryango mu gihe umuhungu wayiteye we abishimirwa (...)

Ingabo z’u Rwanda zarangije gusimburana mu butumwa bw’amahoro muri Centrafrique
Ingabo z’u Rwanda zarangije gusimburana mu butumwa bw’amahoro muri Centrafrique

Ingabo z’u Rwanda zasoje igikorwa cyo gusimbuza abasirikare bari mu butumwa bw’amahoro muri Santarafurika zatangiye ku itariki 28 Gashyantare 2017. Batayo ya 13 y’Ingabo z’u Rwanda yasimbuye iy’ 101 (...)

Musanze: Batandatu bafungiwe kwiba ibikoresho by’amashanyarazi
Musanze: Batandatu bafungiwe kwiba ibikoresho by’amashanyarazi

Abagabo batandatu bafungiwe kuri Sitasiyo ya Polisi y’u Rwanda ya Muhoza mu karere ka Musanze nyuma yo gufatanwa ibikoresho bitandukanye by’amashanyarazi bibye mu minsi ishize. Umuvugizi wa (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.