2017-10-18 18:43:44 clouds 27o High | Kigali Rwanda

Dukurikire:
 
 

2010-2017: Urugendo rw’iterambere muri Kamonyi

Yanditswe na IMVAHO NSHYA

Kuya 2017-07-26 14:50:07

 
Share on:
 
Yasuwe:103
 
Yavuzweho:200
 
10
 
10

• Ingo zakoreshaga amashanyarazi zari 0% ubu ni 17%
• Abagore baboneza urubyaro bari 35% ubu ni 68.5%
• Abari bafite amazi meza bari 66% ubu ni 71.1%
• Amavuriro y’ingoboka yari atanu ubu ni 19
• Agaciro k’umuganda kari Frw 300 000 000 ubu ni Frw 738 000 000

Mu myaka irindwi ishize ya manda ya kabiri ya Perezida Paul Kagame, hagezweho byinshi mu gihugu. By’umwihariko, mu karere ka Kamonyi mu Ntara y’Amajyepfo, iyi myaka yabaye iy’urugendo rw’iterambere.

Ubuyobozi bw’Akarere ka Kamonyi, butangaza ko mu gihe cy’imyaka irindwi ishize umusaruro mu nzego zitandukanye wagiye wikuba, ibi bakaba babikesha imiyoborere ya Perezida Paul Kagame, umukandida w’Umuryango FPR-Inkotanyi mu matora y’Umukuru w’Igihugu azaba ku ya 3 Kanama ku Banyarwanda baba mu mahanga, no ku ya 4 Kanama 2017 ku bari mu gihugu.

Muri raporo akarere ka Kamonyi kashyize ahagaragara, hari impinduka zikomeye zagiye ziba mu bikorwaremezo, aho mu mwaka wa 2010, mu karere ka Kamonyi ingo zari zifite umuriro w’amashanyarazi zari ku kigero cya 0%, kandi nta murenge n’umwe wacanaga.

JPEG - 162.4 kb
Aka karere gasigaye gakorera mu nyubako ijyanye n’icyerekezo cy’u Rwanda

Muri uyu mwaka wa 2017, ingo zifite amashanyarazi mu karere ka Kamonyi zingana na 17%, imirenge yose 12 igize aka karere yagezemo umuriro w’amashyanyarazi.
Ubuyobozi bw’aka karere buvuga ko muri 2010 nta matara yo ku muhanda yari ahari, ariko ubu uvuye kuri Nyabarongo werekeza ku Kamonyi, ayo matara rusange yashyizwe ku bilometero bitandatu.

Ingo zagerwagaho n’amazi meza muri 2010 zari 66%, manda y’Umukuru w’Igihugu Paul Kagame igeze ku musozo ingo zibona amazi meza zigera kuri 71,1%.

Muri 2010, ingo zingana na 42% ni zo zari mu midugudu yateganyijwe, zavuye kuri uwo mubare zigera kuri 47,6%.

2010, abaturage bakoranaga n’ibigo by’imari muri Kamonyi bari 14,5%, ubu barazamutse bagera kuri 44,8% mu 2017. Kugeza ubu, muri ako karere habarizwa banki z’ubucuruzi 3, ibigo by’imari 4, Imirenge Sacco 13 n’Umwalimu Sacco.

Aka karere gakomeza gatangaza hubatswe inganda 2 zitunganya umusaruro ukomoka ku buhinzi (umuceri na kawa), uruganda rutunganya amabuye rwa NPD/COTRACO, uruganda rw’ibitoki n’ibigori, ahatunganyirizwa kawa ubu hagera kuri 12, hubatswe n’agakiriro kamwe.

Mu rwego rw’ubuhinzi Kamonyi yateye intambwe ifatika

Iki cyegeranyo kigaragaza ko mu 2010, mu karere ka Kamonyi, ubutaka buhujwe bwahinzweho imyumbati kuri hegitari 9 528,5; ibigori kuri hegitari 2 200, umuceri wari uhinze kuri hegitari 766, soya yari ihinzwe ku buso bungana na hegitari 450, ibishyimbo bihingwa kuri hegitari 16 455 imboga zihingwa kuri hegitari 499,5.
Naho kugeza ubu mu 2017, ubutaka buhujwe bwahinzweho ibigori kuri hegitari 4 245, umuceri kuri hegitari 989,6; soya kuri hegitari 513, ibishyimbo kuri hegitari 26 904.

Hamaze gutunganywa ibishanga binyuranye harimo igishanga cya Mukunguri, Ruboroga, Bishenyi, Rwabashyashya, Gikoro, Kayumbu, Kavunja kuri hegitari 660. Muri 2010kuhira imusozi byari kuri 0% muri 2017byakozwe kuri hagitari 24. Mu kurinda ubutaka gutwarwa n’isuri haciwe amaterasi y’indinganire.

Imibereho myiza yitaweho mu myaka irindwi ishize

Gahunda y’uburezi bw’ibanze bw’imyaka 9, muri 2010 nta mibare igaragaza inyubako zubatswe, nta macumbi y’abarimu yabagaho, nta kaminuza yari ihari, hari VTC ebyiri gusa.

Muri 2017, hari amashuri y’uburezi bw’ibanze bw’imyaka 12, amashuri abanza aragera kuri 93, ibigo by’amashuri yisumbuye 55, hubatswe ibyumba by’amashuri 371, ubwiherero 614, amacumbi y’abarimu 12, ishuri ry’imyuga rya Runda na Kabuga, n’ishuri ribanza rya Kabuga, VTC kuri ubu ni enye.

Muri 2010 abana bigaga mu mashuri abanza bari 76 115 naho abigaga mu mashuri yisumbuye bari 15 480. Kuri ubu mu 2017, umubare w’abana biga mu mashuri abanza warazamutse bagera kuri 84 078 (abahungu bangana na 50,1%, abakobwa 49,9%), mu mashuri yisumbuye, abayigamo ubu ni 18,490 (abahungu bari ku gipimo cya 43,4%; abakobwa bakaba 56,6%)

Abarokotse Jenoside batishoboye muri 2010 bari bubakiwe inzu 2132, muri 2017abarokotse Jenoside bari bamaze kubakirwa banasanirwa amazu agera 2539.

Muri aka karere kandi mu 2010, nta nzu yubakiwe abaturage bari batuye muri nyakatsi, mu gihe muri 2017hari hamaze kubakwa inzu 359 zagenewe abaturage bakuwe muri nyakatsi. Muri 2010 kandi hubatswe inzu 20 zahawe Abanyarwanda birukanywe mu gihugu cya Tanzaniya, muri 2017 hubakwa izindi 20 na zo zigenewe abo Banyarwanda birukanywe muri Tanzaniya.

Muri 2010 nta mushinga w’abatishoboye watewe inkunga, mu gihe kugeza mu 2017, imishinga 17 y’abatishoboye yahawe inkunga mu buryo bw’amafaranga.

JPEG - 398.4 kb
Nta rugo na rumwe rwari rufite amashanyarazi muri Kamonyi mu mwaka wa 2010, ariko yageze kuri 17%

Muri 2010 abahabwaga inkunga y’ingoboka mu karere ka Kamonyi muri gahunda ya VU P bari 1 055 baturuka mu ngo 507, abakora imirimo rusange muri iyi gahunda ariko batishoboye bari 1 314.

Ubu, muri 2017, abaturage bahawe inkunga y’ingoboka muri gahunda ya VUP ni 5 883 mu mirenge 12, abahawe imirimo rusange ni 1 857 bo mu mirenge 8 yakorewemo iyo gahunda.

Mu rwego rw’ubuzima, muri 2010 hari ibitaro 1, ibigo nderabuzima 11 n’amavuriro y’ingoboka 5, muri 2017 hari ibitaro 1, ibigo nderabuzima 13 n’amavuriro y’ingoboka 19.

Mu myaka irindwi ishize kandi muri aka karere ka Kamonyi hubatswe ikigo nderabuzima cya Karama, ibyumba 3 by’inzu z’abagore. Hubatswe kandi ibigo nderabuzima nka Kayenzi, Kamonyi na Gihara, laboratwari, ikigo cya ‘One Stop Center’, ikigo cy’ubutabazi n’icyumba cy’uburuhukiro mu bitaro bya Rukoma.

Muri 2010 ku bitaro by’Akarere hari abadogiteri 7 ariko, ubu muri 2017 ni 11. Abagore bakoreshaga uburyo bwo kuboneza urubyaro banganaga na 35% mu 2010, nyuma y’imyaka 7 uwo mubare warazamutse ugera kuri 68.5% muri 2017.

Akarere kakoreraga mu nyubako ishaje muri 2010, ariko muri 2017 akarere kimukiye mu nyubako nshya igezweho. Ibikorwa bya ‘Army Week’ na ‘Police week’ bikorwa buri mwaka bigira uruhare mu gufasha abaturage haba mu bijyanye n’ubuvuzi, ndetse no mu bikorwa bibateza imbere.

Ikindi kandi muri 2010 Inkiko Gacaca zarasojwe ariko urukiko rwa Gacurabwenge nta muyoboro wa Interineti wahageraga, muri 2017 haciwe imanza z’imitungo ku kigero cya 98,7%, urukiko rwa Gacurabwenge rwabonye umuyoboro wa Internet.

Muri 2010, nta gahunda y’ubumwe n’ubwiyunge yari yakagera muri kariya karere ka Kamonyi, mu gihe muri 2017 hagiyeho amahuriro y’ubumwe n’ubwiyunge kuri buri murenge kugera ku rwego rw’akarere.

Itorero n’urugerero muri kariya karere muri 2010 ryari ritaratezwa imbere ariko kugera muri 2017 hatojwe intore 14 628 na gahunda y’urugerero ibyiciro 5.

Ku birebana n’umuganda, agaciro kawo ubariye mu mafaranga kavuye ku mafaranga y’u Rwanda 300 000 000 muri 2010 kagera ku mafaranga y’u Rwanda 738 000 000 muri 2017.

Akarere ka Kamonyi ni kamwe mu turere 8 tugize Intara y’Amajyepfo, ubukungu bwako bushingiye ku buhinzi n’ubworozi. Aka karere kagizwe n’ibishanga byinshi birimo Rwabashyashya, Kibuza, Bishenyi, Gikoro, Kayumbu, Nyabarongo n’ibindi.

Ibi bishanga biri ku buso bungana na hegitari 1 935 byinshi bikoreshwa mu guhingwamo imyaka uretse igishanga cya Nyabarongo igice kinini gihingwamo ibisheke byifashishwa n’uruganda rwa Kabuye rugakoramo isukari.

Akarere ka Kamonyi gafite ibirombe by’imicanga n’amabuye bikoreshwa mu bwubatsi butandukanye, kandi aka karere gafite amabuye y’agaciro atandukanye nka Colta na Gasegereti aboneka mu murenge wa Kayenzi, Kayumbu, Ngamba, Mugina na Rukoma.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE