2017-10-16 07:05:01 clouds 27o High | Kigali Rwanda

Dukurikire:
 
 

Umufasha wa Min. w’intebe wa Ethiopia yishimiye uko Abanyarwandakazi bashyigikiwe

Yanditswe na IMVAHO NSHYA

Kuya 2017-04-27 17:16:02

 
Share on:
 
Yasuwe:920
 
Yavuzweho:200
 
10
 
10

Umufasha wa Minisitiri w’Intebe wa Ethiopia, Roman Tesfaye, yishimiye uko abagabo bo mu Rwanda bashyigikira iterambere ry’abagore, avuga ko ari umuco mwiza yifuza ko wagera no muri Ethiopia.

Mu ruzinduko yagiriye mu karere ka Kayonza ku gicamunsi cyo ku wa Kane tariki ya 27 Mata 2017, Madamu Roman Tesfaye yasuye ibikorwa by’ikigo cya Women for Women, yerekwa ibikorwa bitandukanye by’iterambere ry’abagore ndetse anerekwa ahari itsinda ry’abagabo biyemeje gushyigikira gahunda ya He for She, aho batozwa gushyigikira abagore no gufatanya na bo.

Aba bagabo bagaragarije uyu muyobozi ko bamaze gusobanukirwa neza uruhare rw’umugore mu iterambere, ari na yo mpamvu biyemeje kubashyigikira.

JPEG - 188 kb
Madamu wa Minisitiri w’Intebe wa Ethiopia Roman Tesfaye (uwa gatatu uhereye iburyo) yerekwa ibikorwa bitandukanye by’abagore i Kayonza

Sibomana Emmanuel, umwe muri aba bagabo yagize ati “Hari abagabo bumva ko nta kintu bafasha abagore babo bityo ugasanga ingo zabo zihoramo amakimbirane, tumaze amezi abiri twigishwa ubu natwe tumaze gufasha ingo 8 zari zifite amakimbirane.”

Madamu wa Minisitiri w’Intebe wa Ethiopia yashimiye cyane aba bagabo, avuga ko inzira bahisemo ari nziza ndetse yifuza ko n’abagabo bo muri Ethiopia byaba byiza bageze ikirenge mu cy’aba banyarwanda.

Yagize ati “Iyi gahunda mbonye hano najye nzayijyana iwacu, nabonye iyi gahunda ari nziza cyane kandi natwe yadufasha.”

Mu bindi bikorwa Roman Tesfaye yasuye kandi harimo abagore bigishwa kuboha uduseke no gukora imigongo, aho bamugaragarije ko byamaze kubateza imbere, bakaba bifuza ko ubu bukorikori bwabo babwigisha n’abagore bo muri Ethiopia nabo bakiteza imbere.

Umwe mu bagore baboha uduseke, yagize ati “Turashima Leta yacu yadufashije ikaduha agaciro, twe nk’abagore ubu turifuza ko ibyo dukora twazabyigisha n’abanya Ethiopia nabo bakamenya gukora imigongo.”

Madamu Roman Tesfaye yakiriwe na Minisitiri w’Uburinganire n’Iterambere ry’Umuryango Nyirasafari Esperance, abayobozi b’Umuryango Imbuto Foundation ndetse n’abayobozi b’Akarere ka Kayonza.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE