2017-08-23 07:41:18 clouds 27o High | Kigali Rwanda

Dukurikire:
 
 

Ubuyobozi bw’akarere ka Rwamagana bwahagurukiye ikibazo cy’ingo zidafite ubwiherero

Yanditswe na IMVAHO NSHYA

Kuya 2017-06-20 08:01:31

 
Share on:
 
Yasuwe:51
 
Yavuzweho:200
 
10
 
10

Ubuyobozi bw’akarere ka Rwamagana buvuga ko hagomba gukorwa ibishoboka byose ikibazo cy’ingo zitagira ubwiherero kigakemuka, kuko ngo kutagira ubwiherero bishobora guteza ibibazo birimo n’indwara ziterwa n’umwanda.

Imibare itangazwa n’ubuyobozi bw’akarere ka Rwamagana igaragaza ko mu mezi 3 ashize ingo zirenga 2000 zitagiraga ubwiherero, ariko magingo aya habarurwa ingo zibarirwa mu 1000 zitagira ubwiherero kandi nazo ngo zigomba kububona vuba.

Umuyobozi w’akarere ka Rwamagana wungirije ushinzwe imibereho myiza y’abaturage, Umutoni Jeanne, avuga ko ubu hari gukorwa ibishoboka byose ngo izi ngo zidafite ubwiherero zibugire kandi bwiza.

Yagize ati “Ubundi twari dufite ingo zifite ubwiherero butujuje ibikenewe zari ibihumbi 13, izi kugira ngo zuzuze ubuziranenge biroroshye ni ukunyura muri ‘clubs’ z’isuku, hari gahunda y’amasibo, izi gahunda zose ziradufasha kuba abantu bavugurura ubwiherero bwabo.

JPEG - 199.4 kb
Umuyobozi w’akarere ka Rwamagana wungirije ushinzwe imibereho myiza Umutoni Jeanne

Abatabufite na mba mu mpera z’ukwezi kwa 4 bari 2354, ubu tuvugana bashobora kuba batarenze 1000, turifuza ko iki cyumweru kirangirana n’ikibazo cy’ubwiherero kuko ni yo gahunda yatumye dushyiraho iki cyumweru cy’isuku.”

Yakomeje agira ati “Ubwo abatabufite abatuye ahari igihuru bakijyamo, ariko cyane cyane wasangaga batizanya, mu gutizanya rero nabyo hari igihe usanga isuku yabyo atari nziza, ni nabyo tubakangurira kugira ngo dufashe abatishoboye tububakire.”

Abashinzwe isuku mu karere ka Rwamagana bemeza ko muri aba badafite ubwiherero harimo abafite ubushobozi bwo kuba bakwiyubakira ubwiherero, n’abandi bakwiye gufashwa, aba ngo inzego z’ibanze zifatanyije n’abaturage bari kubaha umuganda wo kububakira, akarere gafatanyije n’abafatanyabikorwa bako bagatanga isakaro.

Umwe muri aba batishoboye wahawe umuganda wo kubakirwa ubwiherero yagize ati “Ubu uko umbona aha nta mbaraga ngifite, mbere narahingishaga urutoki rwanjye rwakwera nkengamo urwagwa nkabonamo amafaranga none ubu imbaraga zarashize, muri utwo dufaranga ni two nifashishaga nkikorera ibintu byose, none ubu imbaraga ntazo, umusarane wanjye waruzuye ni ikibazo kuri njye kujya gutira byari bindembeje, uzi kubona umuntu mukuru ajya gutira ubwiherero, ni igisebo pe! Aba bantu bantekereje barakoze cyane.”

Ubu mu karere ka Rwamagana habarurwa ingo 74,287, izifite ubwiherero buzima ni 67,725 zingana na 93%, izitujuje ubuziranenge ni 5,562, izidafite ubwiherero namba zirabarirwa mu 1000.
HAKIZIMANA YUSSUF

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE