2017-08-22 09:34:31 clouds 27o High | Kigali Rwanda

Dukurikire:
 
 

Uburasirazuba:Ubwicanyi bushingiye ku makimbirane yo mu miryango buteye inkeke

Yanditswe na IMVAHO NSHYA

Kuya 2017-04-04 15:07:54

 
Share on:
 
Yasuwe:437
 
Yavuzweho:200
 
10
 
10

Inzego z’ubuyobozi mu ntara y’Uburasirazuba zemeza ko ubwicanyi bugaragara mu miryango itandukanye ari kimwe mu bibazo bihangayikishije ubuyobozi, bakaba basaba buri munyarwanda wese kwita kuri iki kibazo akamenya ko ahari amakimbirane akwiye kubafasha kuyakemura amazi atararenga inkombe.

Guverineri w’intara y’Uburasirazuba Kazaire Judith, yemeza ko bimwe mu bibazo bibangamiye iterambere ry’umugore harimo ubwicanyi bwa hato na hato mu miryango.

Yagize ati “Twiyemeje kuzakomeza gusigasira ibyiza twagezeho cyane cyane dushishikariza abatuye iyi ntara n’abagore by’umwihariko gukomeza guhangana n’inzitizi tugifite zikwiye kurandurwa burundu, harimo ikibazo cy’ihohoterwa rikorerwa abagore n’irikorerwa mu ngo, aho tukibona abashakanye bicana.

Imibare myinshi igaragaza ko abagabo bica bagore babo ari bo benshi nubwo hari n’abagore nabo bica abagabo babo, ni ikintu kidakwiye gukomeza kubaho muri sosiyete nyarwanda, dutekereje ku mateka mabi twanyuzemo ni ngombwa ko iki kintu twese dufatanyije dukwiye kukirwanyiriza hamwe.”

JPEG - 168.2 kb
Minisitiri w’uburinganire n’iterambere ry’umuryango Nyirasafari Esperance aganira n’abaturage

N’ubwo Guverineri Kazaire yabivuze ku rwego rw’intara y’Uburasirazuba ariko ni ikibazo kiri mu gihugu hose, kuko hirya no hino mu gihugu iki kibazo cyahavuzwe, ugasanga umugabo wishe umugore we cyangwa umugore wishe umugabo, abana bishe ababyeyi n’ababyeyi bishe abana.

Urugero rwa vuba ruri mu karere ka Rwamagana aho ku ya 29 Werurwe ahagana mu masaha ya Saa cyenda umugabo witwa Bizimana Theogene yijyanye kuri Polisi avuga ko yishe umwana we wari ufite imyaka 4 amujugunye mu musarane.

Minisitiri w’uburinganire n’iterambere ry’umuryango Nyirasafari Esperance, kuri iki kibazo cy’ubwicanyi mu muryango yemeza ko gihangayikishije inzego zose.

Yagize ati “Nagira ngo nsabe abantu babane mu bwubahane, ubwuzuzanye guhinduka ni byiza ariko ntiwagombye gutegereza ko wahinduka warakomerekeje mugenzi wawe mubana, wubashye umuntu ukamwubaha nk’ikiremwamuntu, ntushobora kumwica ntiwamukubita, muraganira niyo mwaba hari ibyo mutumvikanaho hari gahunda Leta yashyizeho zihurirwaho n’abaturage bose harimo umugoroba w’ababyeyi, hari inama y’umuryango, hari inshuti z’umuryango.”

Minisitiri Nyirasafari yemeza ko izi gahunda zose zihuriweho n’abaturage abantu bakwiye kuzifashisha mu buryo bwo gushakira ibisubizo amakimbirane baba bafitanye mu miryango, kandi abaturanyi nabo bakaba bashishikarizwa gufasha imiryango igaragaramo amakimbirane kuko ahenshi bicanye usanga abaturage bemeza ko bari basanzwe bazi ko uwo muryango utari ubanye neza.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE