2017-08-22 09:34:31 clouds 27o High | Kigali Rwanda

Dukurikire:
 
 

Uburasirazuba:Toni ibihumbi 50 z’imyaka zatakariye mu isarura

Yanditswe na IMVAHO NSHYA

Kuya 2017-03-21 05:33:08

 
Share on:
 
Yasuwe:480
 
Yavuzweho:200
 
10
 
10

Mu ntara y’Uburasirazuba habarurwa toni 50 zatakariye mu isarura ry’isozwa ry’igihembwe cya mbere cy’ihinga, abayobozi bashinzwe ubuhinzi bakaba bemeza ko bashaka uburyo bwo kuzakemura iki kibazo kuko ngo uyu musaruro watakaye ari mwinshi.

Umuyobozi w’ikigo cy’igihugu gishinzwe ubuhinzi n’ubworozi mu ntara y’Uburasirazuba Sendege Norbert, yemera ko hari umusaruro utakara mu gihe cy’isarura, kandi ko hakwiye kugira igikorwa kugira ngo uyu musaruro udakomeza gupfa ubusa.

Yagize ati “Birasaba ko twongera imbaraga nyinshi mu kugabanya ibyo dutakaza mu isarura, ubu twejeje umusaruro ungana na toni ibihumbi 380 ku bigori twabonye, dufashe kuri 15% turatakaza amatoni arenga ibihumbi 50.”

JPEG - 453.9 kb
Mu gihe cy’isarura hari imyaka itakara kuko nta buryo bwihariye bwo kuyitwara buhari

Bimwe mu bibazo bituma abaturage batakaza umusaruro ungana utya ngo harimo kuba ubuhunikiro n’ubwanikiro bikiri bike, umwe mu baturage yemeza ko iki kibazo kiri mu bituma batakaza umusaruro.

Uwiragiye Deus, umuturage wo mu murenge wa Murundi yagize ati “Hari abantu bejeje umusaruro mwinshi babura naho bawubika, ubusanzwe tuba dukwiye kubirekera mu mirima bikumiramo cyangwa se twabisarura tugahita tubijyana mu bwanikiro, ariko ubu bwanikiro buracyari buke, abandi basarura batiyaye kuri ibyo uwo musaruro ukagendera aho, mbere twakoreshaga amashitingi ariko abazifite ni mbwarwa, hari abari baramenyereye kuzihabwa abatarazibonye barabyihoreye.”

Aba baturage bemeza kandi ko ikibazo cy’ubujura nacyo cyatumye basarura nabi basiganwa n’abajura.Umwe muri aba baturage yagize ati “Gusarura byasaga nk’aho dutanguranwa n’abajura, hari ubwo wazaga ugasanga abantu basaruye igice kimwe cy’umurima, ubwo nta kindi wakoraga ni ukubisarurira rimwe nta kindi witayeho ibyo, ugomba kwanika ukabyanikira mu rugo no ku irembo, ubu mu nzu abantu batondekanye n’imifuka y’ibigori bejeje.

Minisiteri y’ubuhinzi n’ubworozi isanga iki kibazo kizakemurwa n’uko bamwe mu bagura umusaruro w’abaturage bakwiye kubegera mu gihe bagitangira guhinga bakaba hamwe nabo kugeza igihe cy’isarura, ari nabwo bazabafasha gusarura neza ndetse nabo bakabona umusaruro wujuje ubuziranenge baba bashaka.

Intara y’Uburasirazuba ubu ibarizwamo abantu bakora umwuga w’ubuhinzi bagera ku bihumbi 170 n’amatsinda ya Twigire Muhinzi agera ku bihumbi 10, nk’uko bigaragazwa n’imibare itangwa n’ikigo cy’igihugu gishinzwe ubuhinzi n’ubworozi mu ntara y’Uburasirazuba.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE