2017-07-27 11:26:56 clouds 27o High | Kigali Rwanda

Dukurikire:
 
 

Ubuhanuzi bwateje ubushyamirane mu itorero rya Methodiste Libre

Yanditswe na IMVAHO NSHYA

Kuya 2016-09-19 14:55:36

 
Share on:
 
Yasuwe:38
 
Yavuzweho:200
 
10
 
10

Ubuyobozi bw’itorero Methodiste Libre Paruwasi Kibimba, mu murenge wa Mutenderi buravuga ko muri iri torero harimo ubwumvikane buke, bwateje impagarara mu rusengero, zishingiye ku buhanuzi ‘bw’akagambane’, bwatumye bamwe bamena ibikoresho by’urusengero ngo babitumwe n’Umwuka wera.

Imbarutso yo gucikamo ibice mu basengera muri Methodiste libre Paruwasi Kibimba, ngo yaba yaratewe n’igikorwa cyabaye tariki ya 10 Nzeri 2016 mu ishami ry’uru rusengero riri mu kagari ka Karwema, ubwo abakiristo bo muri uru rusengero bamenaguye ibikoresho birimo ibikombe biterekwamo indabo, banatwika imitako, bavuga ko babibwirijwe n’umwuka wera.

Nyuma yo kumenagura ibyo bikoresho hanabayeho gufungirana bamwe mu bakirisito mu rusengero ku cyumweru (kibaziriza igishize), bikurura n’imvururu ku buryo hari abatawe muri yombi.

JPEG - 117 kb
Ubuyobozi bw’umurenge wa Mutenderi na bwo bwemeje ko habayeho ubushyamirane mu itorero Methodiste Libre

Pasitori Kimana Nehemiya uyobora itorero Methodiste Libre Paruwasi ya Kibimba, avuga ko ubwo buhanuzi ari ubw’ibinyoma kuko ngo nta mwuka wera wategeka abantu kwangiza ibintu byo mu rusengero, ahubwo agaragaza ko abakirisito bo muri uru rusengero basa n’abacitsemo ibice bibiri.

Yagize ati “Byatangiye umwana ahanura ngo ubuyobozi bukwiye guhinduka, sinibuka neza amazina yabo kuko abahanuye bari batatu, ku cyumweru barongeye barahanura mu materaniro, bafunga urusengero bizana ubushyuhe n’umuvurungano mu rusengero, mwarimu bimunanira kubihosha.”

Akomeza agira ati “Byamaze nk’amasaha atatu bafungiranye abakirisito ngo bari guhanura, bakinguye abakirisito barataha, ariko amateraniro ntiyabaye kuko batumvishe n’ijambo ry’Imana.”

Muri ako kavuyo, Polisi yahise ita muri yombi Nzaramba Vedaste wari umubitsi kuri uru rusengero, na Manirareba Didas ukekwaho kwihisha inyuma y’ayo makimbirane.

Hari amakuru avuga ko aba bakiristo bapfa imicungire y’amafaranga y’itorero kuri uru rusengero, ndetse ko n’ubwo buhanuzi ngo bushobora kuba bwari akagambane bakoze bagatuma abantu ngo babihanure.

Muragijemungu Arcade, umunyamabanga Nshingwabikorwa w’umurenge wa Mutenderi, avuga ko ikibazo cy’akavuyo kari kavutse mu itorero Methodiste Libre ryo mu murenge ayobora kari katejwe n’abantu bari bafite ibyo batishimiye.

Yagize ati “Hari igice cyavutse mu rusengero kigizwe n’abantu hagati ya 30 na 50, bavuga ko batashakaga ubuyobozi bw’itorero Matongo, bateje akavuyo bitwaje ubuhanuzi, bamenagura ibikoresho mu rusengero.”

Ubuyobozi bw’umurenge wa Mutenderi buvuga nyuma y’ako kavuyo, abatawe muri yombi na polisi bakekwaho guteza imvururu, baje kurekurwa nyuma yo kubumvikanisha n’ubuyobozi bw’itorero, ndetse hakabaho gusabana imbabazi no kwemera ibyaha, aba nyuma bakaba bararekuwe kuwa 15 Nzeri 2016.

Ubuyobozi bw’itorero Methodiste Libre mu murenge wa Mutenderi bugaragaza ko batandatu mu bateje akavuyo bahise bacibwa muri iri torero, abandi barahagarikwa, gusa ntibugaragaza agaciro k’ibyangijwe.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE