2017-12-11 14:03:29 clouds 27o High | Kigali Rwanda

Dukurikire:
 
 

Ubuhamya: Uko izina rya Muhutukazi ryamufashije kurokoka Jenoside

Yanditswe na IMVAHO NSHYA

Kuya 2017-05-03 10:26:51

 
Share on:
 
Yasuwe:756
 
Yavuzweho:200
 
10
 
10

Muhutukazi Grace, ni umwe mu barokotse Jenoside yakorewe abatutsi mu 1994, atuye mu murenge wa Nyamirama mu karere ka Kayonza.

Muri Jenoside umugabo we n’abana babiri barishwe, ndetse ababyeyi be n’abavandimwe be bose bicwa muri Jenoside yakorewe abatutsi, we abasha kurokoka.

Mu buhamya bwe, agaragaza ko kuba yitwa Muhutukazi biri mu byatumye abicanyi bamushidikanyaho, ntibamwica bakeka ko ashobora kuba ari mwene wabo.

Yagize ati “Navutse mu mwaka wa 1962, kubera amateka mabi y’igihugu cyacu niswe Muhutukazi, ariko navuga ko iri zina wenda ryangiriye akamaro kuko ryatumye menya abicanyi ndetse nkanahamya ibyo bakoze, kuko akenshi abicaga nabiboneye n’amaso yanjye.

JPEG - 176.7 kb
Muhutukaze Grace yashinze itsinda ry’ubumwe n’ubwiyunge mu murenge wa Nyamirama

Mu minsi ya mbere ya Jenoside bari bataratangira kwica ahubwo bagendaga basaka mu ngo z’abatutsi kugira ngo bamenye abahari bose, baguye ku mpapuro zo mu rugo iwanjye babonaho izina ryanjye rya Muhutukazi, umwe yaravuze ati mwabonye ko uyu yitwa Muhutukazi, umuhutu mwene Kayinamura we nimumureke abane be bo tuzabica ejo.

Kuko nari mfite inda barambwiye ngo bazategereza mbyare uwo nzabyara bazahita bamwica kuko ngo nta mbuto y’umututsi bashaka.”

Muhutukazi akomeza avuga ko kuva icyo gihe bamubwiye ko izo mpapuro agomba kujya ahora azitwaje kuko umunsi azazisiga bazamwica, muri icyo gihe abakoraga ubwicanyi bose yarabiboneye, abashenye amazu bakarya inka z’abatutsi ngo arabazi, abatwikiye abantu nabo ngo yarababonye kuko we yabashaga kugenda hafi aho muri Nyamirama, ahari abantu bamuzi, bishyizemo ko ari umuhutu.

Ingabo zari iza FPR-Inkotanyi zenda kugera muri Nyamirama, zimwe mu nterahamwe zatangiye gutekereza ko uyu Muhutukazi bamusubiza iwabo ndetse bakamenya neza ko ari mwene Kayinamura, dore ko bari bamaze kuvumbura ko atari uwo bari bazi, gusa nta bwo ibyifuzo byabo byagezweho byo kwica Muhutukazi kuko ingabo za FPR-Inkotanyi zaje kugera i Nyamirama zitabara abatutsi bari basigaye na Muhutukazi arimo.

Nyuma y’inkiko Gacaca, ni bwo ngo abenshi bajyaga babwirana bati ese wa wundi twaretse burya na we yari “inyenzi” twanze kumwica none ni we uri kuvuga ibyacu byose!

Muhutukazi ubu afatanyije na bamwe mu bafunzwe bakemera icyaha bagasaba imbabazi, bashinze itsinda rihuza abarokotse Jenoside yakorewe abatutsi, abayigizemo uruhare ndetse n’Abanyarwanda batahutse bari barahunze mu 1959, mu rwego rwo kwimakaza ubumwe n’ubwiyunge, kandi ngo ubu babanye neza cyane nk’uko byemezwa na Muhutukazi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE