2017-10-16 07:05:01 clouds 27o High | Kigali Rwanda

Dukurikire:
 
 

U Rwanda na Congo byiyemeje gukemura amakimbirane ku musaruro w’ikiyaga cya Kivu

Yanditswe na IMVAHO NSHYA

Kuya 2017-03-22 10:25:25

 
Share on:
 
Yasuwe:803
 
Yavuzweho:200
 
10
 
10

Ubuyobozi bw’ibigo bitandukanye byo mu Rwanda no muri Kongo bikora ubushakashatsi ku kiyaga cya Kivu, buvuga ko ikibazo cy’amakimbirane yakundaga kugaragara mu gusangira umutungo kamere ugaragara mu kiyaga cya Kivu agiye kubonerwa umuti.

Aya makimbirane akunda kugaragara akenshi aba ashingiye ku kutumvikana ku buryo bwo kuroba amafi, isambaza n’ibindi binyabuzima biribwa bigaragara mu kiyaga cya Kivu.

Umushinga w’ubushakashatsi witwa SUSFISH uzakorwa n’abanyeshuri bo muri kaminuza y’u Rwanda,ikigo cy’igihugu cy’ubuhinzi n’ubworozi RAB ku ruhande rw’u Rwanda, ndetse na kaminuza yo muri Kongo yitwa ISP Bukavu, niwo witezweho gutanga igisubizo kuri aya makimbirane.

JPEG - 178.2 kb
Isambaza ni umwe mu misaruro itangwa n’ikiyaga cya Kivu (Foto Iyaremye Y)

Munyemana Gerard, umwe mu barobyi babarizwa muri amwe mu makoperative akora akazi ko kuroba mu kiyaga cya Kivu, avuga ko bakunda kugira ikibazo cy’amakimbirane aturutse ku gusangira no kugabana umusaruro w’amafi, aho baba batazi neza uruhande aherereyemo, ugasanga hari n’abari kwinjira mu mbago z’abandi.

Aragira ati “Hari igihe turoba ariko tutazi neza aho umusaruro uherereye neza ugasanga hose turi kugerageza amahirwe, niharamuka hakozwe inyigo kandi ku bufatanye uzasanga ibibazo bikemutse, hari ubwo twarwaniraga mu kiyaga n’abarobyi bo muri Kongo ugasanga bamwe barajya mu birindiro by’abandi ariko kuba hari ibigiye gukorwa ku mpande zombi bizadufasha.”

Kamanzi Emmanuel, umuyobozi wa EDCL avuga ko hazaba hagamijwe gukora inyigo ku mutungo w’amafi yo mu kiyaga cya Kivu n’uburyo ukoreshwa, akavuga ko ikiyaga cya Kivu ari umutungo uhuriweho n’ibihugu byombi ukwiye no kubahuza ubafasha gukorana mu kubyaza umusaruro uw mutungo, aho guhora mu bwumvikane buke bapfa amafi n’ibindi.

Yagize ati “Twagiye tugaragarizwa ibibazo by’amakimbirane hagati y’abarobyi b’ibihugu byombi kuba tugiye gukora ubushakashatsi dufatanyije ku mutungo duhuriyeho bizadufasha cyane kuko buri ruhande ruzamenya aho umusaruro uri, kuko ibyaba ku kiyaga ku ruhande rwacu byaba no ku ruhande rundi, ubwo rero igihe aho umutungo uri hazamenyekana bizatuma impande zombi zitajya zirirwa zishakisha bazenguruka, ahubwo bamenye aho amafi ari neza.”

Ikiyaga cya Kivu ni umutungo kamere uhuriweho n’u Rwanda na Repubulika Iharanira Demokarasi ya Kongo, ariko ubukungu burimo hakaba ubwo biteza amakimbirane akenshi aterwa n’uko nta mbago ikiyaga kigira ngo hagaragare igice cyo mu Rwanda n’icyo muri Kongo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE