2017-06-25 09:02:18 clouds 27o High | Kigali Rwanda

Dukurikire:
 
 

Seminari Nkuru ya Kabgayi yiyemeje gusenga igahashya ingengabitekerezo ya Jenoside

Yanditswe na IMVAHO NSHYA

Kuya 2017-04-13 11:06:06

 
Share on:
 
Yasuwe:240
 
Yavuzweho:200
 
10
 
10

Abiga n’abakora muri Seminari Nkuru ya Kabgayi (Grand Séminaire Philosophicum) bagaragaje ko amasengesho ari imwe mu ntwaro zibafasha mu guhangana n’ingengabitekerezo ya Jenoside.

Bashingiye ku biganiro bibiri bagejejweho n’ubuyobozi bw’Akarere ndetse n’ubw’ingabo muri aka Karere ka Muhanga, abakora n’abiga muri Seminari Nkuru ya Kabgayi bavuze ko isengesho ari ryo bashyize imbere mu ntwaro bifashisha bahangana n’ingengabitekerezo ya Jenoside.

Mu kiganiro yatanze, Umuyobozi wungirije ushinzwe iterambere ry’ubukungu mu Karere ka Muhanga, Kayiranga Innocent, yagarutse ku ruhare rw’abanyarwanda n’abanyamahanga mu kurwanya ingengabitekerezo ya Jenoside, avuga ko nta Jenoside ishobora kubaho Leta itayishyigikiye.

JPEG - 240 kb
Rubamburamanzi Yesaya, umwe mu barokokeye i Kabgayi atanga ubuhamya (Foto Muhizi E)

Kayiranga akavuga ko icyatumye Jenoside yakorewe Abatutsi mu Rwanda ibaho ari uko ubutegetsi bwari buriho icyo gihe bwayishyigikiye ndetse buyigiramo uruhare rukomeye.

Yagize ati “Jenoside yakorewe Abatutsi mu Rwanda yadusigiye ingaruka mbi kuko miliyoni irenga y’Abatutsi yishwe mu gihe cy’amezi atatu, miliyoni ebyiri z’indi z’Abanyarwanda bahungira mu bihugu duhana imbibi, niyo mpamvu tubasaba kwirinda icyo ari cyo cyose cyatuma ingengabitekerezo yayo yongera kuboneka mu Rwanda.»

Padiri Kayisabe Védaste, Umuyobozi mukuru wa Seminari Nkuru ya Kabgayi, atangaza ko bafata umwanya utari muto basenga, bereka Imana Abarokotse Jenoside yakorewe abatutsi kugira ingo ikize imitima yabo ifite intimba, ndetse bakayereka n’abagifite ingengabitekerezo ya Jenoside kugira ngo Imana ibafashe kuva ku izima, bareke ikibi.

Yakomeje agira ati “Iyo twibuka Jenoside yakorewe Abatutsi mu 1994, tubanza kuzirikana abarimu n’abanyeshuri bayizize tukongera gufata akanya ko kuzirikana nanone abarokotse.»

Col. Baguma Sam, Umuyobozi w’Ingabo mu Karere ka Kamonyi, Muhanga, Ruhango na Nyanza, atangaza ko impamvu nyamukuru yatumye batangiza urugamba rwo kubohora igihugu ari ukugira ngo barwanye amacakubiri yaranze Leta ya Kayibanda n’iya Habyarimana, zashishikarizaga Abahutu kwica Abatutsi icyo gihe.

Col.Baguma yavuze ko intambara y’amasasu yarangiye, kuri ubu bahanganye n’ingaruka ndetse n’ingengabitekerezo ya Jenoside kuko hakiri bamwe mu banyarwanda ikigaragaraho n’uyu munsi.

Yagize ati«Ku munsi w’ejo hari umuturage wahaye uburozi inka ebyiri z’umuturanyi we, amubwira ko agomba gutandukana n’umugore we w’Umututsikazi.»

Benshi mu banyeshuri biga muri Seminari Nkuru ya Kabgayi bavutse mu gihe cya Jenoside yakorewe Abatutsi abandi muri bo bakaba baravutse nyuma yayo, muri iki kiganiro bakaba bagaragazaga inyota yo kumva amateka yaranze u Rwanda, mu gihe cya Jenoside na mbere yayo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE