2017-09-21 09:07:12 clouds 27o High | Kigali Rwanda

Dukurikire:
 
 

Rwamagana:Barishimira ko begerejwe amashanyarazi bazajya bacana batishyura

Yanditswe na IMVAHO NSHYA

Kuya 2017-06-13 07:51:53

 
Share on:
 
Yasuwe:30
 
Yavuzweho:200
 
10
 
10

Bamwe mu baturage bahawe amashanyarazi akomoka ku mirasire y’izuba mu murenge wa Mwurire mu karere ka Rwamagana, barashima Leta y’u Rwanda yabafashije kubona amashanyarazi batazajya bishyura.

Ihuriro ry’abafatanyabikorwa b’akarere ka Rwamagana rimaze gucanira ingo 60 mu ngo 180 biyemeje kuzaha amashanyarazi akomoka ku mirasire y’izuba, bamwe muri aba baturage bahawe aya mashanyarazi bakaba bavuga ko biteze kuyabyaza umusaururo.

Rudahusha Jean, umusaza uri mu kigero cy’imyaka 65, yagize ati “Leta yacu yadukoreye ibintu byiza cyane, yadukuye mu bwigunge idutuza ahantu heza, ubu noneho iri kutubuza ubutadowa kandi irabidukorera ituganisha ku majyambere.

Ubu turacana amatara, dukunda Leta yacu kuko ibyo idukorera ni byinshi cyane, ubu njye ndishimye cyane kuko mbonye amashanyarazi ntazajya nishyuzwa nk’uko numva abandi bavuga ngo umuriro wabuze bagiye kugura amashanyarazi, aya nkoresha ni ayo Imana yatwihereye nta gihe izuba ritaka.”

JPEG - 310.9 kb
Abafatanyabikorwa b’akarere bari kumwe na muzehe Rudahusha Jean, imbere y’inzu yubakiwe yashyizwemo amashanyarazi

Undi muturage nawe wacaniwe yagize ati “Njye narishimye, naranezerewe kuko aho nari ndi nari ahantu hakomeye cyane, nari narihebye ku buryo bukomeye cyane, ariko Uwiteka wenyine ni we wamenya icyo azahemba abayobozi b’igihugu cyacu kuko kudufasha gutya ni ibintu bigutera ibyishimo ukumva birakurenze.

Abazabona Perezida Kagame muzamubwire muti abantu wabatumyeho baratumitse, amashanyarazi ndayafite n’inzu ndayifite, ubu hehe no kwikanga inzoka kuko hatabona, nanjye ndacana nk’abandi bakire bose.”

Umuyobozi w’ihuriro ry’abafatanyabikorwa b’akarere ka Rwamagana, Uwayezu Valens, yemeza ko izi gahunda zo gufasha abaturage ndetse n’akarere kugera ku mihigo biyemeje bazazikomeza.

Yagize ati “Ubu dufite gahunda yo kuzacanira ingo 180 kandi ni gahunda ikomeza, twe nk’abafatanyabikorwa b’akarere ka Rwamagana twiyemeje gukurikiza umurongo wo kurwanya ubukene no gushyigikira iterambere rirambye twahawe na Nyakubahwa Perezida wa Repuburika, nta bwo tuzawureka ahubwo tuzakomeza twongere imbaraga kugira ngo tugere kuri byinshi bifatika.”

Abahawe amashanyarazi akomoka ku mirasire y’izuba ni abaturage bari kure y’aho babona umuyoboro w’amashanyarazi asanzwe, bityo nabo bagafashwa gukurwa mu bwigunge bacanirwa amashanyarazi akomoka ku mirasire y’izuba.

HAKIZIMANA YUSSUF

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE