2017-08-21 15:16:56 clouds 27o High | Kigali Rwanda

Dukurikire:
 
 

Rutsiro:Bashingiwe amapoto bategereza guhabwa amashanyarazi baraheba

Yanditswe na IMVAHO NSHYA

Kuya 2016-07-25 17:14:36

 
Share on:
 
Yasuwe:10
 
Yavuzweho:200
 
10
 
10

Abaturage bo mu kagari ka Gabiro mu murenge wa Musasa mu karere ka Rutsiro, barinubira kudahabwa amashanyarazi, kandi bamaze igihe barayemerewe ndetse n’amapoto akaba amaze igihe ashinze.

Ndagijimana Vincent, umwe muri abo baturage, avuga ko ayo mapoto yashinzwe mu mwaka wa 2015, bizezwa kubona umuriro vuba, none umwaka ukaba warashize bagitegereje gucanirwa.

Yagize ati:“Mu kwa Gatanu kwa 2015 nibwo aya mapoto yashinzwe batwizeza amashanyarazi, tugeze muri 2016 nta kizere dufite ko amashanyarazi azaza, turasaba ubuvugizi.”

JPEG - 64.5 kb
Banyotewe guhabwa amashanyarazi ngo bayabyaze umusaruro (Foto archive)

Undi muturage wo muri aka kagari yabwiye Imvaho Nshya ko nyuma yo kwizezwa ko bazahabwa amashanyarazi ndetse bagashingirwa amapoto batangiye kwizera ko bazayahabwa vuba, bamwe batangira kwitegura kubyaza umusaruro amashanyarazi, ariko ngo ubu abashoye amafaranga bitegura gutangira ibikorwa byabo amaso yaheze mu kirere bagwa mu gihombo.

Uyu muturage kimwe na bagenzi be bavuga ko baramutse bagejejweho amashanyarazi iterambere ryakwiyongera, kuko ntawakongera gucana agatadowa, ndetse ngo byanatuma bongera amasaha yo gukora, bakagura insyo zisya amasaka, ibigori n’ibindi, bagakora ubusuderi n’indi mirimo ishingiye ku ikoreshwa ry’amashanyarazi kandi ibyara inyungu zifatika.

Umuyobozi w’akarere ka Rutsiro Ayinkamiye Emerence, yabwiye Imvaho Nshya ko ikibazo bakizi kandi ko umwaka wa 2016 uzajya kurangira cyarakemutse, kuko ngo bateganya kuvugana n’ubuyobozi bw’ikigo cy’igihugu gufite mu nshingano gukwirakwiza amashanyarazi.

Yagize ati:”Mba Meya nasanze amapoto amaze igihe ashinze, mpajije nsanga harabayeho kutanoza iteganyabikorwa mu gukwirakwiza amashanyarazi, cyakora vuba aha tuzavugana n’abashinzwe gukwirakwiza amashanyarazi (REG), ku buryo umwaka wa 2016 uzarangira barabonye umuriro w’amashanyarazi, nibihangane.”

Uyu muyobozi nawe ahamya ko aho amashanyarazi ageze iterambere ryihuta, abafite imyuga isaba amashanyarazi igakorwa nko kogosha, kudefiriza, gusudira, gusya, n’abakora indi mirimo bakongera amasaha yo gukora, iterambere ry’abaturage rikihura, bityo n’akarere kakabyungikiramo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE