2017-10-19 07:53:31 clouds 27o High | Kigali Rwanda

Dukurikire:
 
 

Rutsiro:Abakoresha ibiyobyabwenge biganjemo abakobwa

Yanditswe na IMVAHO NSHYA

Kuya 2016-07-29 09:58:45

 
Share on:
 
Yasuwe:7
 
Yavuzweho:200
 
10
 
10

Mu mirenge itandukanye yo mu karere ka Rutsiro haravugwa ikibazo gikomeye cy’ibiyobyabwenge cyane cyane byibasiye rumwe mu rubyiruko rwaho, rwiganjemo ab’igitsina gore.

Inzego z’ubuyobozi bw’akarere n’iz’umutekeno zisaba urubyiruko kwirinda ibyo biyobyabwenge kuko bidindiza iterambere ryabo n’igihugu muri rusange.

Mu santere ya Gakeri mu murenge wa Ruhango, akarere ka Rutsiro, ni hamwe mu hakunda kugaragara ibiyobyabwenge by’ubwoko bwose.

Muri iki cyumweru Polisi y’igihugu ifatanyije n’abaturage bangije udupfunyika 11,161 tw’urumogi, imitego ya Kaningini 72, amapaki 200 y’amasashe n’udusukari bita Swiguru ngo kuko twangiza ubuzima bw’umuntu, byose bifite agaciro k’amafaranga 22, 856, 100, bikaba byarafatiwe mu mirenge itandukanye y’akarere ka Rutsiro.

PNG - 874.2 kb
Bimwe mu biyobyabwenge byatwiswe byafatanwe ab’igitsina gore(Foto Iyaremye y)

Umuyobozi w’akarere ka Rutsiro wungirije ushinzwe imari n’iterambere ry’ubukungu Gakuru Innocent, arasaba abaturage kwamaganira kure ibiyobyabwenge kuko byangiza ubuzima by’umwihariko urubyiruko rugaraga mu ngeso yo gukoresha ibi biyobyabwenge.

Yagize ati:”Aha hantu ni hamwe mu karere hakunze kugaragara ikibazo cy’ibiyobyabwenge, noneho igiteye agahinda nuko usanga igitsina gore aricyo gikunda gufatwa, ibi biragayitse, turasaba urubyiruko kumenya ko ari rwo igihugu giteze ahazaza hacyo kandi kwangizwa n’ibiyobyabwenge ntaho byatugeza”.

Rumwe mu rubyiruko rutuye mu santere ya Gakeri, ruhamya ko ibiyobyabwenge byiganjemo urumogi bihaboneka, ariko rugasaba inzego z’umutekano gukomeza kubafasha kubirwanya.

Mujyawamariya Jacqueline, umwe muri bo aragira ati:”Usanga inaha ibiyobyabwenge aho kugabanuka byiyongera umunsi ku munsi, umwana arakura yasanga urungano rubikoresha nawe akabikoresha, turasaba inzego z’umutekano kujya zituba hafi byacika buhoro buhoro.”

Umuyobozi wa Polisi y’igihugu mu karere ka Rutsiro Supt. Boniface Kagenza, asaba urubyiruko kureka ibiyobyabwenge kuko bidindiza iterambere ry’ubikoresha ndetse n’iry’igihugu muri rusange.

Uyu muyobozi wa Polisi kandi nawe yemeza ko ababifatanwa akenshi usanga biganjemo igitsina gore, akabasaba kugira indangagaciro z’umuco nyarwanda zikwiye umwari.

Amategeko ahana ibyaha mu Rwanda ateganya ko ufatanywe ibiyobyabwenge ahanishwa ingingo ya 594 mu gitabo cy’amategeko ahana ibyaha, aho ahanishwa igifungo cy’imyaka itatu n’ihazabu y’amafaranga y’u Rwanda kuva ku bihumbi ijana kugeza kuri miliyoni imwe, iki gihano kikiyongera bitewe n’uburyo iki cyaha cyakozwemo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE