Advertisement
 
 
 
 
 
 
 
 

Amakuru | Mu Ntara | Intara

Rusizi: Umutingito wahitanye umwana, abandi 20 barakomereka   

  Yanditswe na BAHUWIYONGERA Sylvestre
 5 months ago

 
 

Umutingito ukomeye wumvikanye mu karere ka Rusizi ku mugoroba wo ku wa Gatandatu wahitanye umwana w’imyaka ine, ukomeretsa abandi bantu 20 barimo abagore batwite.

Umuyobozi w’ibitaro bya Gihundwe, Dr. Nshizirungu Placide avuga ko uwo mutingito wari ku gipimo cya 4.8 wateye bamwe ihungabana, kandi ko umubare w’abagezweho n’ingaruka zawo ukomeje kwiyongera.

Nshizirungu yongeyeho ko uwo mwana wapfuye yari atuye mu murenge wa Kamembe mu mujyi wa Rusizi, yajanjaguritse umutwe ashiramo umwuka saa tatu n’igice z’ijoro.

Umuyobozi w’akarere ka Rusizi, Harelimana Frederic yabwiye Imvaho Nshya ko umutingito watangiye kumvikana saa kumi n’imwe n’iminota umunani z’umugoroba, undi ukumvikana mu ma saa kumi n’ebyiri n’igice z’umugoroba.

JPEG - 53.2 kb
UYu mutingito wangije imitungo myinshi irimo n’imodoka

Meya Harelimana asobanura ko nubwo hari n’ahandi wumvikanye ariko mu mujyi wa Rusizi ho wahashegeshe cyane, aho inzu nyinshi zangiritse harimo izigera ku umunani zangiritse mu buryo bukomeye cyane, muri izo harimo imwe yagwiriye imodoka 2 na zo zirangirika cyane.

Avuga ko abaturage badakwiye kumva ko ari imperuka yageze.

Yagize ati “Turakomeza guhumuriza abaturage bacu ngo bumve ko atari Isi yashize cyangwa ngo hagire ubibashuka agamije kubashakamo izindi nyungu, bakumva ko umutingito udahoraho, niba waje watambutse, bajye mu nzu zabo baryame bareke kugira ubwoba bwatuma barara hanze, gusa bitwararike, hagize ugaruka babe bamenya uko babyitwaramo, bareke guhita bahubuka biruka kuko bashobora guhura n’ibikuta bikabagwira, bajye bitonda.’’

Uyu muyobozi yavuze ko agaciro k’ibyangiritse kakibarwa, anavuga ko mu murenge wa Nkanka na ho hangiritse inzu eshatu, hakaba n’andi makuru avuga ko no mu murenge wa Nkungu muri santere y’ubucuruzi ya Rugabano, hangiritse inzu ebyiri z’ubucuruzi.

Amakuru ava i Bukavu muri Repubulika Iharanira Demoakarasi ya Congo avuga ko na ho hari abapfuye bawuzira, inzu z’amagorofa zangiritse harimo n’izacitsemo kabiri, na ho bakaba bagikurikirana ngo hamenyekane ibyangiritse byose.

Uyu mutingito uje ukurikira undi wumvikanye ku wa 10 muri uku kwezi utaragize icyo wangiza muri aka karere ariko bivugwa ko wari uri kuri 5,7 ukaba warahitanye abantu benshi muri Tanzania.

Umutingito ukomeye wibasiye abanyarusizi ku wa 3 Gashyantare, 2008 wahitanye imbaga y’abaturage bari mu nsengero no mu kiliziya, uzisenyana n’izindi nzu, unakomeretsa benshi.

 

Comments

 
 
Abarangije kaminuza muri INES basabwe guhanga imirimo bagaca ubushomeri
Abarangije kaminuza muri INES basabwe guhanga imirimo bagaca ubushomeri

Abanyeshuri 1080 bahawe impamyabushobozi z’icyiciro cya 2 n’icya gatatu(masters) mu ishuri rikuru rya INES Ruhengeri, basabwe guharanira guteza imbere gahunda yo kwihangira umurimo, hagamijwe (...)

Barasaba Akarere ka Nyanza  kubishyuriza asaga miliyoni bambuwe na Rwiyemezamirimo
Barasaba Akarere ka Nyanza kubishyuriza asaga miliyoni bambuwe na Rwiyemezamirimo

Abaturage bo mu karere ka Nyanza bahawe akazi mu bikorwa byo kubaka isoko ry’amatungo, ibagiro n’ubwiherero mu isoko rya Rurangazi riherereye mu mu murenge wa Nyagisozi, barasaba ubuyobozi (...)

Rubavu:Barasaba ubufasha bwo kubaka inzu 25 zangijwe n’imvura ivanze n’umuyaga
Rubavu:Barasaba ubufasha bwo kubaka inzu 25 zangijwe n’imvura ivanze n’umuyaga

Mu gihe cy’icyumweru kimwe inzu zigera kuri 25 mu tugari tubiri tw’umurenge wa Busasamana mu karere ka Rubavu yibasiriwe bikomeye n’imvura ivanze n’umuyaga, yagurukanye ibisenge byazo. Abafite inzu (...)

Abadindiza Girinka barye bari menge - Guverineri Musabyimana
Abadindiza Girinka barye bari menge - Guverineri Musabyimana

Mu gihe hatangizwaga gahunda y’icyumweru cyahariwe Girinka Munyarwanda mu ntara y’Amajyaruguru, Guverineri Musabyimana Jean Claude, yihanangirije bamwe mu bayobozi bagira uruhare mu kudindiza iyi (...)

Kirehe: Bugarijwe n’ubujura bakeka ko bukorwa n’abari mu nkambi ya Mahama
Kirehe: Bugarijwe n’ubujura bakeka ko bukorwa n’abari mu nkambi ya Mahama

Abaturage bo mu kagari ka Munini, umurenge wa Mahama mu karere ka Kirehe baravuga ko babangamiwe n’abajura babiba mu ngo ibyiganjemo imyaka n’amatungo, no mu mirima, bagatanguranwa gusarura imyaka (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.