2017-05-29 15:01:40 clouds 27o High | Kigali Rwanda

Dukurikire:
 
 

Rusizi: Umusore w’ikinege mu muryango yarohamye mu Kivu arapfa

Yanditswe na IMVAHO NSHYA

Kuya 2016-04-04 14:19:18

 
Share on:
 
Yasuwe:2
 
Yavuzweho:200
 
10
 
10

Mu mudugudu wa Bahemba, akagari ka Kamanyenga, mu murenge wa Nkanka, mu karere ka Rusizi, haravugwa urupfu rw’umusore w’imyaka 18 y’amavuko wari ikinege mu muryango we, wapfuye ubwo yogeraga mu kivu akitse imirimo ya VUP yakoraga.

Umunyamabanga Nshingwabikorwa w’umurenge wa Nkanka Uwambaje Aimée Sandrine, mu kiganiro yagiranye n’Imvaho Nshya, yemeje ko babwiwe ko uwo musore witwa Musabyimana Théophile arohamye mu kivu, bagerayo bagiye gutabara bagasanga yashizemo umwuka, umubiri we ugahita uboneka ukajyanwa mu bitaro bya Gihundwe gukorerwa isuzuma.

Yagize ati:“Urwo rupfu rwabayeho koko, uyu musore yari arimo akorana n’abandi umuhanda muri VUP, kuko yari yasimbuye se muri aka kazi ngo wumvaga afite intege nke, barangije akazi uyu musore ajyana n’abandi koga mu kivu, ari na ho yarohamiye ahita ahasiga ubuzima.

Rukaba ari urupfu rwatubabaje cyane, cyane cyane ko uyu mwana ari na we wenyine ababyeyi be bari bafite ari ikinege, kandi akaba yitangaga ku mirimo ye, akaba agiye twari tukimukeneye cyane.”

Mu butumwa yahaye abaturage, Uwambaje yabasabye kutibwira ko bakenetse ikiyaga cya kivu cyane ngo bumve ko bashobora koga nta myambaro yabugenewe bambaye, cyangwa ngo bagere kure bibwira ko nta kibazo, ahubwo ko bagomba kwitonda bakoga mu buryo butabavutsa ubuzima.

Yagize ati:“Iki kiyaga si ubwa mbere kidutwara abantu kuko n’umwaka ushize harohamye undi na we wari urimo yoga, uretse n’aboga hakaba hanagwamo bamwe mu baroba na bamwe bagenda mu mato bisanzwe.

Tukaba dusaba abaturage kutumva ko ari abahanga mu koga kuko baturiye ikiyaga, ahubwo bakajya bajyamo bakurikije amabwiriza bahabwa, cyane cyane ayo koga bambaye imyambaro yabugenewe, kogera hafi, uwumva atizeye neza ko azi koga bihagije akaba yavoma n’amazi akogera i musozi ariko ikivu ntigikomeze kudutwara abantu uruhongohongo gutya tubireba, kuko tutabuza abantu koga.”

Uyu musore ngo wari waranarangije amashuri yisumbuye, ubuyobozi bw’uyu murenge bwiyemeje gufata mu mugongo umuryano we buhereye ku kwishyura amafaranga y’isuzuma ryo kwa muganga, abaturanyi na bo bakaba bakanguriwe kuwuba hafi, muri ibi bihe bikomeye urimo byo gupfusha ikinege amanzaganya.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE