2017-07-23 11:30:24 clouds 27o High | Kigali Rwanda

Dukurikire:
 
 

Rusizi: Umugabo yapfuye urw’amayobera kumushyingura biba ihurizo

Yanditswe na IMVAHO NSHYA

Kuya 2016-10-19 10:58:19

 
Share on:
 
Yasuwe:15
 
Yavuzweho:200
 
10
 
10

Boneza Lambert w’imyaka 50, wari utuye mu mudugudu wa Kankuba, akagari ka Mashesha, umurenge wa Gitambi, mu karere ka Rusizi, wari usanzwe ari umumotari, yasanzwe imbere y’uburiri bwe yapfuye, biteza urujijo ku buryo kumushyingura bikiri ihurizo.

Abaturage bavuga ko ubwo yapfaga ku wa Kabiri atari yakoze, kugeza mu ma saa yine yari ku rusisiro rw’ubucuruzi rwa Mashesha ntacyo ataka, avugana n’abantu barimo na gitifu w’akagari.

Umunyamabanga Nshingwabikorwa w’Umurenge wa Gitambi, Niwemugeni Marie Claire, yabwiye Imvaho Nshya ko umugore wa nyakwigendera, Nyiransabimana Julienne yazindukiye mu mirimo asize umugabo agiye kwiyogoshesha i Mashesha.

Nyiransabimana ngo yaratashye saa sita asanga urugi rw’inzu rwegetseho, ageze ku rw’icyumba bararamo yumva rukingishije agasumari, asunitse cyane rurakinguka ahita agwa ku murambo w’umugabo we imbere y’igitanda.

Gitifu Niwemugeni ati’’ Umugore yahise yihuta ajya gutabaza ubuyobozi bw’akagari kuko bumwegereye, gitifu ahageze asanga koko Boneza yapfuye, bahita batabaza polisi n’abaturage, umurambo wa nyakwigendera uhita ujyanwa ku bitaro bya Mibilizi gukorerwa isuzuma,uhita unagarurwa ubu uri mu rugo utegereje gushyingurwa.”

Gushyingura biracyari ihurizo

JPEG - 94.9 kb
Gitifu Niwemugeni yemeza ko kugeza ubu bataramenya uko bashyingura Boneza

Uyu muyobozi avuga ko umurambo wa Boneza wagaruwe imuhira ariko ntushobore gushyingurwa kuko umugore n’umuhungu we na we w’umumotari wubatse ariko babana mu rugo, bahise batabwa muri yombi ngo bafashe mu iperereza, bakaba bafungiye kuri sitasiyo ya polisi ya Nyakabuye.

Niwemugeni avuga ko ntacyo bakeka cyamwishe, ahubwo ko bagitegereje icyo polisi ivuga ku isuzuma ryakorewe ku bitaro bya Mibilizi.

Icyakora ngo mu cyumweru gishize yigeze kurwara akeka ko afite malariya, ageze ku kigo nderabuzima cya Mashesha ntibagira indwara bamusangana, bamuha imiti isanzwe arataha.

Yagize ati’’ Twabuze icyo dukora n’icyo tureka ku byerekeranye n’ishyingurwa rye, kuko umugore we n’umuhungu we bakiri mu maboko ya polisi kandi gushyingura badahari kikaba ari ikibazo, tugiye gusaba polisi idufashe hamenyekane ukuri ku rupfu rwe, niba bariya bakomeje gufungwa turafatira icyemezo hamwe niba yashyingurwa badahari cyangwa ikindi cyakorwa kuko nanjye byanyobeye.’’

Gitifu Niwemugeni asaba abaturage kuba ijisho rya bagenzi babo, umuntu akagira amakenga igihe asize undi mu rugo utari asanzwe ahasigara nta n’impamvu azi ibimuteye, cyane cyane ko urwo rugo nta muntu wundi n’umwe wari urusigayemo.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE