2017-12-11 14:03:29 clouds 27o High | Kigali Rwanda

Dukurikire:
 
 

Rusizi: Ubuyobozi bwahagurukiye abagabo bamarira umutungo w’urugo mu kabari

Yanditswe na IMVAHO NSHYA

Kuya 2017-03-28 09:35:22

 
Share on:
 
Yasuwe:453
 
Yavuzweho:200
 
10
 
10

Amakimbirane yo mu miryango mu karere ka Rusizi akenshi ashingira ku businzi bukabije bw’umwe mu bagize umuryango, aho hari aho usanga umugabo akorera amafaranga yose aho kuyacyura akayamarira mu kabari, abana bakicwa n’inzara, cyangwa n’umugore ayo abonye akayapfusha ubusa.

Umwaka ushize habaruwe ingo zigera kuri 720 zibanye nabi ziraganirizwa, zimwe ziyemeza guhinduka izindi birananirana.

Mu kiganiro n’Imvaho Nshya, umuhuzabikorwa w’inama y’igihugu y’abagore muri aka karere, Uwizeyimana Perpetue, yavuze ko ziriya ngo 720 zabaruwe zikanaganirizwa ari nke cyane ugereranyije n’ibitera amakimbirane bazibonyemo ngo bikaba biri mu ngo nyinshi, ziriya zikaba ari izabaga zabishyize hanze bigeze ku rwego rwa byacitse.

JPEG - 219.7 kb
Ibibazo abaturage bakunze kubaza abayobozi babasuye biba bishingiye ku makimbirane yo mu ngo

Uwizeyimana yavuze ko bagiye gukora ibarura ryimbitse ryazo, uyu mwaka ukazarangiza hazwi neza umubare ndashidikanywaho w’ingo zose zibana mu makimbirane ahoraho.

Avuga ko uretse ubusinzi bukabije, hari no gucana inyuma bigenda bifata indi ntera mu miryango myinshi, kwaya umutungo w’urugo mu buryo bunyuranye, n’ibindi.

Yagize ati “Ziriya twabaruye ni nke cyane. Ni izabaga zageze kuri byacitse na ho ubundi izibana mu makimbirane zo zirenze ziriya kure, tuzazihabwa n’ibarura ryimbitse tugiye gukora, kuko ziriya twazihabwaga n’abakuru b’imidugudu, tukabarura ingo 40 muri buri murenge, tukazisura tukaziganiriza.”

Yakomeje agira ati “Twagendaga turi ikipe, buri wese agafata umwanya wo kumva ibibazo by’umuryango runaka, akababwira gusasa inzobe bagashyira ahagaragara ibyo bapfa byose n’icyo bumva cyakorwa ngo babane mu mahoro.

Bake cyane bahitaga bemera ko bagiye kubana neza, abandi bagatsimbarara ku butane, tukababwira ko ibyo bisaba kugana inkiko, abandi bakavuga ko bagiye kubyigaho, ari yo mpamvu dushaka gufata undi mwanya tugasubirayo tukareba uko bimeze nyuma yo kugirwa inama.”

Avuga ko zabaruwe umwaka ushize zikaganirizwa muri Mutarama uyu mwaka, aho wasanganga iyi mibanire mibi itera ibibazo byinshi mu miryango. Ati “Hari aho twasangaga abana batacyiga barahindutse mayibobo mu mihanda hirya no hino, hari aho twasangaga nta n’ubwiherero buri mu rugo, abana barwaye indwara z’imirire mibi, mbese umuryango warahungabanye bikabije, ubona ari ibibazo bikomeye cyane.”

Avuga ko hakenewe imbaraga zikomatanyije hagati y’ubuyobozi, abaturage n’izindi nzego kugira ngo aya makimbirane yo mu ngo agabanuke kuko aho yageze asenya byinshi.

Umuyobozi w’aka karere wungirije ushinzwe imibereho myiza y’abaturage, Nsigaye Emmanuel, avuga ko iki kibazo cyahagurukiwe, ari yo mpamvu n’iryo barura riba ryakozwe.

Ati “Ni ikibazo gihari ariko cyahagurukiwe n’inzego nyinshi zirimo n’inama y’igihugu y’abagore ku buryo twumva hamwe no kuzigenderera tukaziganiriza hari byinshi bizagenda bikosoka, ibinaniranye na byo bigahabwa undi murongo wo gukemurirwamo aho kugira ngo bagere aho bamburana ubuzima.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE