2017-05-24 10:43:15 clouds 27o High | Kigali Rwanda

Dukurikire:
 
 

Rusizi:Ubuyobozi buramagana utubari two mu ngo

Yanditswe na IMVAHO NSHYA

Kuya 2016-05-19 15:25:54

 
Share on:
 
Yasuwe:1
 
Yavuzweho:200
 
10
 
10

Ubuyobozi bw’umurenge wa Kamembe ugize igice kinini cy’umujyi wa Rusizi mu karere ka Rusizi, buravuga ko budashobora kwihanganira abaturage bashinga utubari mu ngo batuyemo.

Mu kiganiro yagiranye n’Imvaho Nshya, Umunyamabanga Nshingwabikorwa w’uyu murenge Ntivuguruzwa Gervais, yavuze ko iyi ngeso bayica ariko ikanga ikagaruka kandi ari ingeso mbi.

Avuga ko bitumvikana ukuntu umuntu ashobora gufata inzu arimo n’umugore n’abana bane cyangwa batanu, n’abandi barengaho, akayihindura akabari aho abantu bashobora kuza kunywera inzagwa, n’ibindi bisindisha.

JPEG - 228.5 kb
Uru rugo rutuwemo kandi rukaba n’akabari (Foto Bahuwiyongera S)

Muri utu tubari two mu ngo bamwe baranywa bakageza mu masaha akuze cyane cyangwa bakanakesha ijoro bakirimo, babujije abana kuryama, basakuza kandi abenshi banavuga ibitubaka umuryango, akavuga ko iyi ari ingeso mbi cyane ikwiye gucika.

Yagize ati:“Ntidushobora gukomeza kwihanganira aba bose bahindura utubari amazu batuyemo, kuko uretse ko nta n’itegeko ryabyemera, aba bantu bateza umutekano muke kuko hari n’abashobora gusinda bakarwanira mu rugo rw’umuntu, we yise akabari ejo bakavuga ko barwaniye mu kabari, wajya kureba ugasanga barwaniye mu nzu twe twita iy’umuturage bikaba ikibazo.

Ikindi ni impungenge z’uburere bw’abana bakurira muri ubwo buzima, cyane cyane ab’abakobwa kuko ibyo baba babona aho biba bitabubaka bigatuma uburere bwabo buhatakarira, no kuba abana baraye mu nzu nk’iyo badashobora gusinzira kandi haba harimo ababyuka bajya mu mashuri, bikaba ibibazo bikomeye cyane ubuyobozi budashobora kujenjekera.”

Asaba abayobozi b’imidugudu yose n’utugari tugize uyu murenge guhangana n’iyi ngeso mbi, akabari kakaba ari akabari nyine kakagira n’amategeko akagenga, inzu irarwamo n’umuryango na yo ikagira uko irindirwa umutekano abayirimo bagasinzira neza batarara mu rusaku rw’abanywi b’inzoga, kenshi na kenshi baba banafite n’indaya aho hantu.

Yanagarutse kandi ku kibazo cy’isuku nke kuko usanga ubwiherero ingo nk’izi ziba zifite buba butaragenewe akabari, ugasanga zishobora gukurura indwara ziterwa n’umwanda nka kolera n’izindi.

Icyakora umwe mu bafite inzu yahinduwe akabari kandi abamo we n’umuryango we mu mudugudu wa Burunga, akagari ka Gihundwe muri uyu murenge, yavuze ko nta kindi afite akora, kandi akaba atareka gukora akabari muri iyi nzu kuko ari ko kamutunganye n’umuryango we.

Avuga kandi ko nta mafaranga afite ahagije yo kujya gukodesha inzu yo gukoreramo, n’ubwo nawe ubwe azi neza ko gucururiza mu rugo bibangamira ituze n’umutekano w’umuryango we.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE