2017-08-22 09:34:31 clouds 27o High | Kigali Rwanda

Dukurikire:
 
 

Rusizi: Ku myaka 56 yamenye gusoma no kwandika, arakebura abakiri mu bujiji

Yanditswe na IMVAHO NSHYA

Kuya 2016-09-05 15:14:57

 
Share on:
 
Yasuwe:2
 
Yavuzweho:200
 
10
 
10

Mbilizi Théoneste w’imyaka 56, utuye mu kagari ka Turambi, mu murenge wa Giheke, mu karere ka Rusizi, akaba ari umucuruzi uciriritse ariko ubu wiyita umusirimu, kuko yabashije kurihira abana be kugera muri kaminuza, ndetse nawe akaba yasoje amasomo yo kwandika no gusoma.

Uyu mugabo avuga ko ibyo byose yakoraga ateza umuryango we imbere kutamenya gusoma no kwandika hari aho byagiye bimuzitira cyane, agasaba abiyita abasirimu ntibige gusoma no kwandika kureka kwihagararaho bakabyiga aho gukomeza kugendana ubujiji kandi Leta barabyoroheje.

Aganira n’Imvaho Nshya ubwo yari amaze guhabwa n’itorero Inkuru nziza, paruwasi ya Kamembe, impamyabushobozi mu gusoma, kwandika no kubara, akayihabwa hamwe n’umugore we w’imyaka 46, yavuze ko yishimye cyane kuko atuye umutwaro w’ubujiji wari umuremereye.

JPEG - 83.8 kb
Uyu mugabo yanze gusazana ubujiji yiga gusoma no kwandika (Foto Bahuwiyongera S).

Kuba afite umwana wiga kaminuza, mu cyaro ubundi kiba ari icyubahiro kidasanzwe yakongeraho n’ubucuruzi bikaba akarusho, ku buryo yagendaga abaturage bagenzi be bakamuha icyubahiro bibwira ko azi gusoma no kwandika, ariko uko bamenye ko atabizi bakarushaho kumusuzugura.

Guhora yiyorobeka mu bantu ngo arahisha ko atazi gusoma no kwandika byaramurambiye, bituma yiyemeza kuva ku izima arabyiga.

Yagize ati “Kumva ko mfite abiga mu mashuri yisumbuye na kaminuza no kumva ko mfite udufaranga ncuruza byabanje kumpeza mu kwihagararaho, ngo hatazagira ubona njyanye n’umugore kwiga gusoma,kwandika no kubara akanseka kandi banyubahaga.

Najyaga nereka abantu ko mbizi, rimwe na rimwe ngatwara ikaramu ku mufuka w’ishati njijisha, ariko haba nk’inama bavuga ngo ninandike imyanzuro nkabura icyo nkora, batangira kuntahura, nkajya ngendana ipfunwe rikaze.

Ni bwo ntekereje ko gukomeza kwihagararaho ntaho bizangeza, kuri iyi myaka mpitamo kuza kwiga none ndanezerewe cyane, kuko noneho ntwarira ikaramu ku mufuka ukuri.”

Avuga ko yakoreshaga amasaha 4 buri gihe ajyanye kwiga n’umugore none babimenyeye rimwe, ubujiji bucitse iwabo.

Ati “Hari abo nzi muri uyu mujyi wa Rusizi no mu yindi mijyi, bamwe twagiye dukorana, bacyihagararaho ngo ni abasirimu cyangwa bafite abana biga za kaminuza, hakaba n’abavuga ko bakuze batabishobora, n’abavuga ko bagiye kwiga gusoma abana n’abagore babasuzugura.

Abo bose ndababwira ko bari mu bujiji kurushaho, kuko kuvuga ngo uri umusirimu utazi no gusoma ugeze aho icyapa kiri, utakwandika ibyavugiwe mu nama, utatorwa ngo uhagararire abandi, n’ibindi, ni ubujiji burenze ubwa mbere, bose bakaba bakwiye kwiga bakareka gukomeza kwihagararaho mu mafuti.”

Pasiteri Zirimabagabo Emmanuel, uyobora paruwasi ya Kamembe mu itorero Inkuru nziza, avuga ko imiryango ikinguye ku muntu wese ushaka kwiga gusoma no kwandika, ko nta kigero cy’imyaka cyangwa icy’ubukungu bireba, ko kwitwa umusirimu kwa mbere birangwa no kuva mu bujiji.

Umukozi ushinzwe amakoperative n’iterambere ry’ishoramari mu murenge wa Kamembe, Niyonzima Onesphore, avuga ko nta muntu wari ukwiye kwiyita umusirimu muri iki gihe agendana ubujiji, kuko umuvuduko w’iterambere u Rwanda rugenderaho ushingiye ku bumenyi, cyane cyane gusoma no kwandika, utabizi wese akaba akwiye kubyiga hakiri kare.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE