2017-08-19 07:41:08 clouds 27o High | Kigali Rwanda

Dukurikire:
 
 

Rusizi:Ikibazo cy’imbwa zizerera zikarya abaturage cyahagurukiwe

Yanditswe na IMVAHO NSHYA

Kuya 2017-04-28 17:04:47

 
Share on:
 
Yasuwe:492
 
Yavuzweho:200
 
10
 
10

Ikibazo cy’imbwa zizerera zirya abantu mu karere ka Rusizi ngo ntigihangayikishije abaturage gusa, ahubwo gihangayikishije n’ubuyobozi, bukaba busaba abaturage kuba bihanganye igihe cy’imvura nyinshi cyarangira zikaba ari bwo ngo izi mbwa zizategwa imitego izica, nk’uko bitangazwa n’umuyobozi w’aka karere Harelimana Frédéric.

Ikibazo cy’imbwa zizerera zirya abantu n’amatungo si ubwa mbere kivuzwe muri aka karere ka Rusizi, kuko no mu myaka ishize cyagiye kivugwa cyane mu mirenge y’umujyi ya Kamembe na Gihundwe, aho zategaga abantu zikabarya, cyangwa zasanga aho amatungo ari zikayarya, bamwe bakaba baravugaga ko binaterwa no kuba hari ibagiro, zimwe mu mbwa zariburamo inyama igihe izo zitoragura hanze yaryo zashize, zikirara mu baturage cyangwa mu matungo yabo zikarya.

JPEG - 176 kb
Meya Harelimana Frédéric yijeje abaturage ko ikibazo cy’imbwa zirya abantu kigiye guhagurukirwa

Umuyobozi w’aka karere Harelimana Frédéric aganira n’abanyamakuru nyuma y’inama y’umutekano, y’aka karere, yavuze ko ikibazo cy’imbwa zizerera zirya abaturage n’amatungo atari icyo gukinisha kuko ngo icyo gihe zari zimaze kurya abantu 4.

Yagize ati “Ikibazo cy’imbwa zizerera zirya abantu n’amatungo kirahari nubwo kiri ku rwego rudakabije cyane kuko tumaze kubona abantu 4 zimaze kurya, ariko na cyo twaragihagurukiye nk’uko byari mu myanzuro y’inama y’umutekano iheruka, ni uko izo mbwa zigomba gutegwa zikicwa.

Umuti rero utega imbwa nta bwo ukoreshwa mu gihe cy’imvura, kuko ukoreshejwe mu gihe cy’imvura nubwo imbwa yawurya nta cyo yaba. Tuza gusanga ibyiza ari ugutegereza igihe cy’imvura kikabanza kikarangira tukabona kuzitega tugasigarana ingamba zo gukumira n’abantu bose baba bafite imbwa kuzikingiza no kuzizirika tukaba twumva ari cyo cyerekezo dufite.”

Bamwe mu baturage baganiriye n’Imvaho Nshya bavuze ko bishimishije kuba akarere kumvise ko iki ari ikibazo gikomeye cyane kuko izi mbwa zihangayikisha, cyane cyane ku babyeyi basiga abana bakagenda, cyangwa abana bajya ku mashuri bonyine, cyangwa abazirika amatungo bakagenda, bagasaba ko zakwicwa kuko hari n’igihe zirya umwana ababyeyi batiteguye amafaranga yo kumuvuza ugasanga biteye umuhangayiko urushijeho.

Aka karere kazihagurukiye mu gihe mu karere ka Nyamasheke mu murenge wa Bushekeri izi mbwa ziherutse kuharya ihene 5 mu gihe mu murenge wa Cyato zari zahariye izindi hene, bamwe bakaba banagira impungenge ko izi mbwa hari n’igihe ziba zasaze zikaba zatera n’ibisazi mu bo ziriye cyangwa amatungo zariye abaturage bayarya bakaba bakurizamo urupfu.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE