2017-05-23 06:21:20 clouds 27o High | Kigali Rwanda

Dukurikire:
 
 

Rusizi:Igiciro cy’ifu y’imyumbati cyazamutse ku kigero kidasanzwe

Yanditswe na IMVAHO NSHYA

Kuya 2016-07-15 12:55:02

 
Share on:
 
Yasuwe:2
 
Yavuzweho:200
 
10
 
10

Kuva umwaka ushize, imyumbati abaturage b’umurenge wa Bugarama bahingaga yafatwa n’indwara ya Kabore bakayikura imburagihe kugeza ubu, bavuga ko bategereje indi mbuto amaso agahera mu kirere.

Aba baturage bavuga ko ikigo cy’igihugu gishinzwe ubuhinzi n’ubworozi (RAB) cyari cyayibijeie ariko amaso akaba ngo yaraheze mu kirere.Aba baturage n’abacuruzi b’ibikomoka ku myumbati bakaba bavuga ko ingaruka zo kubura iyi mbuto zatangiye kwigaragaza kuko ubu ngo ubugari burya umugabo bugasiba undi.

Mu kiganiro n’Imvaho Nshya aba bahinzi bavuze ko RAB yabatengushye kuko yabijeje imbuto bakayibura, bagasabwa guhinga ibigori ngo uyu mwaka bazahinge imyumbati, ariko ngo bakaba nta cyizere bafite cyo kuyihinga kuko imbuto bagombaga gutubura n’ubu batarayibona.

JPEG - 268.9 kb
Abahinzi babuze imbuto nshya y’imyumbati nyuma y’uko iya mbere irwaye Kabore (Foto Bahuwiyongera S)

Bavuga ko ingaruka bamaze guhura nazo ari uko ifu y’imyumbati yabaga igura amafaranga 250 ikilo muri ibi bihe, ubu ari amafarnga 400, ndetse i Kamembe ho akaba ari amafaranga 500 no hejuru yayo, ibintu ngo bitigeze bibaho mbere.

Agoronome w’uyu murenge Ndorimana Clément, ahuza imvugo n’aba baturage, aho avuga ko kugeza ubu bikanga inzara yaterwa n’iri bura ry’imyumbati kandi abatuye uyu murenge, abarundi n’abanyekongo bose wasangaga aya mezi batangiye kwerekera mu masoko y’uyu murenge bashaka imyumbati n’ifu, ariko ubu n’ibigori bejeje ntibazi ko bazabihunika ngo bibamare inzara nk’iyo bamarwaga n’imyumbati.

Yagize ati:“Aya mezi twabaga tuyikura, tukayihunika, mu Ukuboza na Mutarama tukaba nta kibazo dufite, ariko ubu n’utwumbati tukiboneka ni utwahinzwe ku misozi tw’imbuto isanzwe itera cyane, mu gihe indi yahingwaga mu gishanga ahahingwaga igiterane cya hegitari 500, tuheza toni 20 kuri hegitari imwe, none kabore iducyuje umunyu n’indi mbuto nta cyizere cyo kuyibona.”

Avuga ko RAB yari yababwiye ko izabaha imbuto mu kwa 11 ntibayibona, ibabwira ko izayibaha mu kwa kabiri bagatubura hakaboneka izaterwa mu kwa cyenda na yo ntibayibona, kandi ikenewe na benshi cyane, bakaba barabuze icyo babwira abahinzi.

Umuybozi wa RAB mu Ntara y’Uburengerazuba Nuwumuremyi Jeannine, avuga ko iki kigo kitatinze kubaha iyi mbuto kuko ngo iyo bayibaha mu kwa 2 yari guhura n’izuba n’ubundi ntiyere, akavuga ko mu kwa cyenda bazahabwa imbuto yo gutubura izahingwa n’abaturage bake bazayitubura, abahinzi bakazabona imbuto ihagije umwaka utaha, bagasabwa kwihangana.

Yagize ati:“Birumvikana ko ari ikibazo kandi koko kariya gace ari ikigega cy’akarere mu buhinzi bw’imyumbati, no kuzamuka kw’igiciro cy’ifu ntitwabihakana ariko ntitwavuga ko bizatuma bicwa n’inzara.

Ahubwo baba bahinga ibindi, imbuto yazamara gutuburwa umwaka utaha bakazongera kuyihinga ari benshi.”

Imbuto yarwaye kabore ni iyitwa Rwizihiza, bakaba bibaza uko ifu izaba ihagaze igihe indi myumbati ihagije izabonekera.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE