2017-08-19 07:41:08 clouds 27o High | Kigali Rwanda

Dukurikire:
 
 

Rusizi:Barashimira Leta yabegereje amashanyarazi ikabafasha kwihangira imirimo

Yanditswe na IMVAHO NSHYA

Kuya 2017-05-31 05:53:58

 
Share on:
 
Yasuwe:91
 
Yavuzweho:200
 
10
 
10

Abasore 3 bakorera umwuga wo gusudira inzugi n’ibindi bitandukanye bisudirwa muri santere y’ubucuruzi ya Mashya iri hagati y’imirenge ya Nyakarenzo na Gashonga mu karere ka Rusizi, barashima Leta yabahaye amashanyarazi muri iyi santere y’ubucuruzi bigatuma babona akazi bakesha kwihangira imirimo.

Aba basore bavuga ko uyu mwuga ubateje imbere cyane, bakaba bafite intego yo kwigurira amamodoka yabo mu gihe cya vuba cyane, kuko isoko barifite kandi n’ifaranga baribona ritubutse.

Iri faranga ngo bararikesha uyu muriro w’amashanyarazi iyi santere y’ubucuruzi imaze imyaka 3 ibonye, bakaba barabaye aba mbere mu kuwubyaza umusaruro bakora uyu mwuga wo gusudira ibyuma, bikaba byararuhuye abaturage bajyaga gukoresha inzugi n’ibindi bikenewe gusudirwa mu mujyi wa Rusizi bateze imodoka, ubu bakaba barabayobotse kuko ari hafi kandi bakaba na bo basudira mu buryo bwishimiwe n’abakiliya babo, cyane cyane ibigo by’amashuri bihari.

Tuyizere Jean Claude, uturuka mu kagari ka Rusayo mu murenge wa Gashonga muri aka karere ka Rusizi yagize ati “Mfite imyaka 19 gusa kandi uyu mwuga ndawushoboye ndanawukunda ku buryo numva uzampa ibyo nifuza mu buzima, kuko dusudira turi 3 gusa hano muri iyi santere, ubwanjye nshobora kubona amafaranga atari munsi ya 8.000 ku munsi kuko urugi turugurisha hagati y’amafarnga 55.000 na 80.000.

Tukaba twakora nk’inzugi 3 mu cyumweru, tugasudira n’ibindi biduha andi, ukumva ko amafaranga yo aboneka.”

Yakomeje agira ati “Ibi byose tubikesha umutekano n’imiyoborere myiza dufite n’ubuyobozi bwifuriza urubyiruko gutera imbere, kuko iyo amashanyarazi atahagera nta kazi tuba dufite cyangwa twaragiye kugashakira ahandi turinda gukodesha amazu, ariko hano nta kibazo na kimwe, turitahira mu ngo.

Aya mashanyarazi tumaranye imyaka 3 atumye dutera imbere kuruta imyaka irenga 30 iyi santere y’ubucuruzi imaze ibayeho.”

Avuga ko nubwo atagize amahirwe yo gukomeza amashuri kubera ubushobozi buke, ariko ko ibyo akora bizamuhoza ayo marira akazabaho neza kuko atigeze acika intege.

Mugenzi we Tuyizere Jean de Dieu w’imyaka 20, avuga ko amaze imyaka 3 gusa asudira, ariko kuko yigiriye inama yo gukorana na SACCO hakiri kare ayo abonye akayajyanayo, ashobora gukorera amafaranga atari munsi ya 10.000 ku munsi, akaba amaze kwikuriramo byinshi atari kubona vuba.

Yagize ati “Natangiye nkorera abandi none ubu maze kwigurira ibyuma byo gusudira bihagije, maze kwibonera inka mu rugo kandi kimwe na mugenzi wanjye dufite intego yo kwigurira imodoka bitarenze imyaka 3 kuko tugiye kwagura imikorere n’imitekerereze ku buryo ibi twumva nta kabuza tuzabigeraho, kuko sinshobora gukorera ari hasi ya Frw 300.000 mu kwezi”.

Umuyobozi w’akarere ka Rusizi Harelimana Frédéric, asaba abaturiye ahamaze kugera ibikorwa remezo birimo amashanyarazi, imihanda myiza n’ibindi kubibyaza umusaruro ufatika, abasore nk’aba akabasaba kwibumbira hamwe n’abandi mu makoperative, bakagura imikorere, bikazatuma hari benshi mu rubyiruko bava mu bushomeri bakihangira imirimo iha na bagenzi babo akazi.

BAHUWIYONGERA SYLVESTRE

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE