2017-06-28 15:02:12 clouds 27o High | Kigali Rwanda

Dukurikire:
 
 

Rusizi:Bamwe mu bagabo barashinjwa gutiza umurindi imirire mibi mu bana

Yanditswe na IMVAHO NSHYA

Kuya 2017-04-06 06:59:04

 
Share on:
 
Yasuwe:114
 
Yavuzweho:200
 
10
 
10

Bamwe mu bagore bo mu murenge wa Giheke mu karere ka Rusizi bavuga ko kurwaza imirire mibi bikunda kubagaragaraho babiterwa na bamwe mu bagabo batita ku ngo zabo.

Aba bagore bavuga ko bamwe mu bagabo bata abagore bakigira i Kigali bavuga ko bagiye gushaka imirimo ntibazagaruke, abandi bakabona amafaranga bayashora mu tubari, kwibuka umugore n’abana bikaba ibibazo, ibi n’ibindi bibazo bigatera ingorane mu ngo zirimo no kurwaza imirire mibi, bagasaba ubuyobozi gukebura abagabo nk’aba.

Ikibazo cy’abagabo bata abagore bakigendera ngo kireze mu murenge wa Giheke muri aka karere, aho usanga hari abagabo bamwe bata abagore bakigira mu nshoreke, abandi bakababeshya ko bagiye gushaka imirimo i Kamembe cyangwa i Kigali, bagategereza ko bazaza bagaheba, hakaba n’ababaha nimero za telefoni hashira iminsi bakazajya bazitelefona ntizicemo, bakifasha abana bakarinda babarwarana imirire mibi.

JPEG - 69.2 kb
Hari abagabo bo muri aka karere babeshya abagore ko bagiye guhaha i Kigali bakigumirayo

Havugwa kandi na bamwe mu bagabo b’abasinzi bafata amafaranga bakoreye yose bayamarira mu tubari badashaka gukorera ingo zabo, abagore bakirya bakimara bonyine, aba bagabo bakajya bataha baka ibiryo gusa ngo nta n’umunyu baguze, bigasubiza ingo inyuma bizitera no kurwaza imirire mibi.

Mu kiganiro na bamwe mu bagore bo mu ngo zifite ikibazo cy’imirire mibi, babwiye Imvaho Nshya ko basaba ubuyobozi guhagurukira abagabo bamwe bigize abo gushaka kurya gusa badakora, n’abandi bumva bakwibera mu maraha gusa kandi bafite ingo bagomba gutunga, byabashobera bakazita kandi barabyaye abana benshi, bikaba intandaro y’imirire mibi izahaza abana bamwe na bamwe.

Umugore utuye mu mudugudu wa Isha mu kagari ka Kamashangi, yabwiye Imvaho Nshya ko umugabo yamutanye abana 5 akigira mu mujyi wa Kigali, bamwe muri bo bakaza kumurwarana imirire mibi kubera kubura uko agira.

Yagize ati “Twarasezeranye rwose ariko tumaze kubyarana abana 5 ambwira ko agiye gushaka akazi mu mujyi wa Kigali n’ubu simenya amakuru ye, nkeka ko ashobora kuba yariboneyeyo undi mugore akanta.Nakomeje guhangayikana abana njyenyine nta n’ingurube yo korora yasize, kugeza ubwo bindenze kubera no kubashakira amakayi, bandwarana imirire mibi.

Twifuza ko abagabo nk’aba bakeburwa kuko kubona umugabo ubyaye gatanu ata abana ngo agiye i Kigali guhaha, bakazategereza amahaho bagaheba bakarinda barwara imirire mibi, ni igisebo kuri twese ari yo mpamvu tubona bakwiye guhagurukirwa.”

Umunyamabanga N shingwabikorwa w’umurenge wa Giheke,Nsabimana Théogène, avuga ko ingeso nk’iyi y’abagabo batita ku ngo zabo bagatuma ziterwa n’indwara zituruka ku mirire mibi bayihagurukiye binyuze mu mugoroba w’ababyeyi, aho babigarukaho kenshi.

Yagize ati “Imirire mibi yo iracyagaragara kandi koko hari aho usanga abagabo baba ba nyirabayazana wayo, tukaba twaratangiye guhashya ingeso y’abagabo bamwe baya umutungo w’urugo n’abata abagore bagasigara barera abana bonyine bigatera ibibazo birimo n’imirire mibi kandi biragenda bitanga umusaruro mwiza.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE