2017-05-24 10:43:15 clouds 27o High | Kigali Rwanda

Dukurikire:
 
 

Rusizi:Abaturage bagiye gukoma mu nkokora iyubakwa ry’imihanda ya kaburimbo

Yanditswe na IMVAHO NSHYA

Kuya 2016-07-14 08:59:52

 
Share on:
 
Yasuwe:10
 
Yavuzweho:200
 
10
 
10

Mu gihe biteganijwe ko guhera mu kwezi kwa Nzeri uyu mwaka mu mujyi wa Rusizi hazubakwa imihanda myinshi ya kaburimbo, haravugwa imbogamizi zishobora kwitambika muri iki gikorwa cyangwa zikagikerereza.

Imihanda izubakwa irimo 4 yo mu mujyi rwagati aho bakunze kwita muri Cité, hakaba n’undi uzava nanone mu mujyi rwagati unyura ku biro by’aka karere werekeza ku muhanda munini wa kaburimbo Rusizi- Bugarama, uciye ahari Gereza nkuru ya Rusizi.

Amakuru Imvaho Nshya yabwiwe na bamwe mu batuye aho muri Cité iyi mihanda izaca ariko badashaka ko amazina yabo atangazwa, avuga ko badashobora kwemera ko iyi mihanda yubakwa batishyuwe.

Aba baturage bavuga ubuyobozi bukwiye gukemura ibibazo byose abatuye aho iyo mihanda izaca bafite, ngo niba hari abimurwa bimurwe, usenyewe urupangu yishyurwe, bityo iyi mihanda itangire byose byarangiye.

JPEG - 163.7 kb
Ba nyiri aya mazu ntibakozwa ibyo gukodesherezwa inzu ngo bazubakirwe nyuma (Foto Bahuwiyongera S)

Nyamara akarere ko kavuga ko aya mafaranga ntayo gafite,ariko ngo abaturage bemeye ko buri wese azigomwa kugira ngo iki gikorwa kizagende neza.

Umwe muri aba baturage yagize ati:“Batubwiye ko uwo umuhanda uzagongera inzu bazaba bamukodeshereje akazubakirwa nyuma, ariko twe ibyo ntitubishaka, kuko kuva mu nzu yawe ngo bagiye kudukodeshereza twumva atari byo.

Nibatwimure bigire inzira, cyangwa bashake ikindi badukorera kuko aha ari kuri gakondo, ariko kubaka umuhanda ntacyo baratubwira byo turumva tutabyemera.”

Umuyobozi w’aka karere Harelimana Frédéc, we avuga ko bagiranye inama n’aba baturage bakomeje kwifuza kuva kera ko bakeneye imihanda ijyanye n’icyerekezo cy’umujyi, bakumvikana ko ufite urupangu azigomwa umuhanda warusenya bakazamwubakira urundi umuhanda umaze kuhaca, uwo inzu igonzwe akazaba ashakiwe aho aba. akazimurwa nyuma mu mezi nibura 6 ubushobozi bubonetse.

Yakomeje ashimangira ko abaturage babyemeye, ariko nyuma ngo barumva amagambo agenda akwira ko aba baturage bisubiyeho.

Ati:“Ibi byo kwisubiraho ni byo bidindiza iterambere kandi intego y’akarere kacu ari ubufatanye mu iterambere.

Ubwo se icyo gihe bwa bufatanye bwaba buri he? Nibakomeza umugaga tuzaba tubiretse tubanze twumvikane na bo kuko tutagomba kubahutaza, ariko kandi bamenye ko bazaba bihemukira.”

Ibi byatumye bamwe bibaza niba iyi mihanda izubakwa cyangwa izasubikwa, ariko hakaba n’amakuru avuga ko abagomba gukora iyi mihanda bamaze gutsindira isoko, ndetse ngo amasezerano yanashyizweho umukono, yemwe ngo n’amafaranga yo kubikora ahari.

Biteganijwe ko iyi mihanda yose izubakwa izatwara akayabo ka miliyoni 440.000 z’amafaranga y’u Rwanda, ayo kwimura aba baturage atarimo, ikazaba yuzuye mu gihe kitarenze umwaka umwe uhereye igihe izaba yatangiriye.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE